Jumurovul mahallasida sunʼiy qoplamali mini futbol maydoni qurilib, foydalanishga topshirildi

Soʻnggi yillarda yurtimizda “Tashabbusli byudjet” doirasida fuqarolar tomonidan bildirilgan ijtimoiy takliflardan ovoz berish yoʻli orqali eng munosiblarini aniqlash va moliyalashtirish tizimi yoʻlga qoʻyilgani bugun oʻzining ijobiy samarasini bermoqda. “Tashabbusli byudjet”ning 2023-yilgi mavsumida Amudaryo tumanidagi Jumurovul mahallasi ham ijtimoiy ahamiyatga ega loyiha bilan ishtirok etib, gʻolib boʻlgan edi.

Mazkur loyiha boʻyicha mahalladagi 48-sonli maktab hududiga mini futbol maydoni qurildi va joriy yilning 3-iyun kuni byudjet mablagʻlari asosida qurilgan ushbu oʻyingohning ochilish marosimi boʻlib oʻtdi.

Bu sana jumurovullik aholi, ayniqsa yoshlar hayotida quvonchli kun boʻldi. Chunki oldinlari mahallada zamonaviy futbol yoki mini futbol maydoni mavjud emas edi. Endilikda maktab oʻquvchilari va sportchi yoshlar mashgʻulotlar bilan zamonaviy maydonda shugʻillanadigan boʻlishdi. Ayniqsa, mini futbol maydoni yonida strit vorkaut sport maydonchasining ham qurib foydalanishga topshirilishi aholi va yoshlar orasida jismoniy tarbiya va ommaviy sportni yanada rivojlantirishga qoʻshimcha imkoniyat yaratadi. Bu kabi sharoitlar aholi, ayniqsa yoshlar oʻrtasida sogʻlom turmush tarzini keng tatbiq etishda muhim vosita sanaladi.

Maydonning ochilish marosimida Amudaryo tumani hokimi Sobir Xoʻjametov, 3-sektor rahbari – tuman Ichki ishlar boʻlimi boshligʻi Jamoliddin Yusupov, Oʻzbekiston Mahallalari uyushmasi Amudaryo tuman boʻlimi boshligʻi Alisher Yuldashev, tuman Maktabgacha va maktab taʼlimi boʻlimi boshligʻi Yalgʻashboy Shomurotov, 48-sonli maktab direktori Oʻktam Qoʻshnazarov, tuman Ichki ishlar boʻlimi boshligʻining oʻrinbosari Sharapat Joldasbayev, “Amudaryo maxsus qurilish” masʼulyati cheklangan jamiyati direktori Jahongir Allamberganov , Jumurovul mahalla fuqarolar yigʻini raisi Dilmurod Boʻronov hamda mahallaning nuroniylari va yoshlar ishtirok etdi.

Tadbirni tuman hokimi Sobir Xoʻjametov tabrik soʻzi bilan ochib, mahalla ahli va yoshlarni zamoaviy sport maydonchasi qurib foydalanishga topshirilgani bilan tabrikladi hamda kelgusida mahalladan chempion sportchilar yetishib chiqishiga tilakdosh boʻldi.

Tadbirda soʻzga chiqqanlar mamlakatimizda aholi turmush tarzini yaxshlash va mahallalar farovonligi yoʻlida amalga oshirilayotgan islohotlar haqida aytib oʻtdi. Tashabbusli byudjetlashtirish jarayonlari fuqarolarning ijtimoiy muammolarini ijobiy hal etish imkoniyatlarini taqdim etuvchi muhim omil ekani, mazkur tizim byudjet mablagʻlarining sarflanishida fuqarolarning bevosita istirok etishi, shuningdek, byudjet mablagʻlarining samarali sarflanishini kuzatib borish imkoniyatini yaratayotgani alohida qayd etildi.

Tadbirda maktabning “Yosh qutqaruvchilar” va “Yosh chegarachilar” musobaqalarining tuman bosqichida 1-oʻrinni egallagan oʻquvchilarning harbiy chiqishlari hamda mahalla hududida joylashgan 46-sonli maktabgacha taʼlim tashkiloti tarbiyalanuvchilarining guruh raqs chiqishlari namoyish qilindi. Shu kuni yangi maydonda 48-sonli maktab oʻquvchilaridan tarkib topgan jamoalar ishtirokida oʻrtoqlik uchrashuvi boʻlib oʻtdi. Oʻyin yosh sportchilarning gʻoliblik uchun murosasiz bahslariga boy boʻldi.

Maʼlumot oʻrnida aytish joizki, “Tashabbusli byudjet”ning 2023-yilgi mavsumida Jumurovul mahallasi ahli mazkur mini futbol maydonchasidan tashqari Shijoatli koʻchasi uchun 1 ming 300 metr asfalt qoplamali yoʻl qurilishiga doir loyihasi bilan ham qatnashib, gʻolib boʻlgan edi. Natijada ushbu loyihalar 2 milliard 720 million soʻm qiymatida davlat hisobidan moliyalashtirildi. Mazkur mini futbol maydoni “Amudryo maxsus qurilish” masʼuliyati cheklangan jamiyati tomonidan qisqa fursatlarda, sifatli qilib qurildi. Mazkur maydon turli mavsumlarda sportchilarga qulaylik yaratish uchun yon va ustki qismi maxsus qoplamalar yordamida yopilgani bilan boshqa futbol maydonchalaridan ajralib turadi.

Bu kabi sharoitlar qachonlardir mahalla ahli va yoshlari uchun orzu edi, desak mubolagʻa boʻlmas. Endilikda yosh sportchilar mavjud imkoniyatlardan unumli foydalangan holda oʻtkazilayotgan musobaqalarda faol ishtirok etib, tumanimiz nomidan ulkan yutuqlarga erishishiga tilakdoshmiz. Biz ham fursatdan foydalanib jumurovulliklarni zamonaviy mini futbol maydoni ishga tushgani bilan tabriklaymiz.

Shohzod Qurbonboyev