5-SONLI MAKTAB OʻQUVChILARI 2-SONLI KASB-HUNAR MAKTABIGA SAYoHATGA BORIShDI

Mamlakatimizda oʻsib kelayotgan yosh avlodga puxta bilim berish, ularga fan asoslarini yangi pedtexnologiyalardan foydalangan holda puxta singdirish va yuksak maʼnaviyatli, goʻzal xulq-atvorli qilib voyaga yetkazish umumiy oʻrta taʼlim muassasalari zimmasidagi vazifadir.

Shuningdek, oʻquvchi-yoshlarning turli kasb-hunarlarga qiziqishlarini erta aniqlash, taʼlim muassasalari bitiruvchilarini zamonaviy kasb-hunarlarni egallashga yoʻnaltirish ham juda muhim. Chunki har yili respublikadagi umumiy oʻrta taʼlim muassasalarini bitirayotgan oʻquvchilarning sanoqliginasi oliy taʼlim muassasalariga oʻqishga kiradilar. Qolganlarining asosiy qismi ishsizlar safiga qoʻshiladilar. Shu boisdan maktab yuqori sinflari oʻquvchilarini kasb-hunarga yoʻnaltirish, biron kasbni puxta egallashiga erishish ham umumiy oʻrta taʼlimning muhim boʻgʻiniga aylanmoqda.

Bu dolzarb vazifaga Amudaryo tumanidagi umumiy oʻrta taʼlim muassasalarida ham ulkan eʼtibor qaratilmoqda. Maktab bitiruvchilarining mehnat bozoriga biron kasbni puxta egallab, maʼlum malakaga ega boʻlgan holda kirib kelishiga harakat qilinayapti.

Yaqinda 5-sonli umumiy oʻrta taʼlim maktabining 9-sinf oʻquvchilari amaliyotchi psixolog Odilbek Jumaboyev rahbarligida tumandagi 2-sonli kasb-hunar maktabiga kasbga yoʻnaltirish, kasb-hunarlar haqida yetarli maʼlumotlar olishi uchun sayohatga bordilar.

Mazkur kasb-hunar maktabida joriy oʻquv yilida 472 nafar oʻquvchilarga umumiy fanlar boʻyicha va 10ta kasb-hunarlar boʻyicha taʼlim berilayapti. Oʻquvchilar har oʻquv haftasining oxirgi kunida oʻzlari oʻrganayotgan kasb-hunarlar boʻyicha nazariy mashgʻulotlarda olgan bilimlarini amaliy mashgʻulotlarda mustahkamlab boradilar.

Muassasada oʻquvchilarning dars mashgʻulotlarini puxta oʻzlashtirishlari, uchun amaliyot mashgʻulotlari uchun barcha sharoitlar yaratilgan, fan toʻgaraklari, badiiy havaskorlik va sport toʻgaraklari muntazam faoliyat koʻrsatmoqda va oʻquvchilarning boʻsh vaqtlari mazmunli oʻtishiga xizmat qilayotir.

2-sonli kasb-hunar maktabi direktorining maʼnaviy-maʼrifiy ishlar boʻyicha direktori oʻrinbosari Jasurbek Otajonov zamonaviy kasb-hunarlar bilan tanishish maqsadida tashrif buyurgan oʻquvchilarni iliq qarshi oldi va taʼlim muassasadagi shart-sharoitlar, taʼlim-tarbiya jarayoni va amaliy mashgʻulotlar haqida batafsil maʼlumot berdi.

Oʻquvchilar oshpazlik, tikuvchilik, avtomobillarga texnik xizmat koʻrsatish, maishiy texnikalarni taʼmirlash, santexnika taʼmiri, payvandlash kasblariga oʻqiyotgan oʻquvchilarning amaliy mashgʻulotlar oʻtishi uchun maxsus amaliyot xonalaridagi jihozlar, asbob-usunalar bilan tanishtirildi. Maktab sport zali bilan tanishish, badiiy havaskorlik toʻgaragi aʼzolari ijrosidagi kasb-hunarning inson hayotidagi rolini ifoda etuvchi sahna koʻrinishlar oʻquvchilarda ulkan taassurotlar qoldirdi.

Hunarli – xor boʻlmas, deydi xalqimiz. Chindan-da, biron kasbga qiziqib uni puxta egallagan va halol mehnat qilgan inson umrini shu kasbi tufayli mazmunli va goʻzal qiladi. Yoshlarni kasb-hunarga qiziqtirish, ularning kelajagi yorqin boʻlishiga xizmat qiladi. Shu maʼnoda qaraydigan boʻlsak, oʻquvchilarning kasb-hunar maktabiga qilgan sayohati juda ahamiyatli boʻldi.

Oygul RAJABOVA.