Jayxun ilhomlari

Yangi Oʻzbekistonim!

Olamga tanitdi oʻzliging sening,

Yogʻdular taratdi yulduzing sening.

Elaro mashhurdir nufuzing sening,

Ey ona yurt, yangi Oʻzbekistonim!

 

Kundan-kun yashnaydi bogʻ-u boʻstoning,

Yuksakka boshlaydi oʻtguvchi oning.

Aytmoqqa arziydi qutlugʻ dostoning,

Ey ona yurt, yangi  Oʻzbekistonim!

 

Oʻtmishdan boshlanar hayot sabogʻi,

Qaddingni tiklaydi yuksaklik togʻi.

Hayot nashidasi senda ardoqli,

Ey ona yurt, yangi Oʻzbekistonim!

 

El nafin koʻzlovchi qonunlaring bor,

Osmoning porloqdir, yering unumdor.

Aslo tuganmasday boyliklaring bor,

Ey ona yurt, yangi Oʻzbekistonim!

 

Tugʻildi yangicha imkoning bu kun,

Ishga tushmoqdadir mis koning bu kun.

Kelajaging goʻyo quyoshdek yorqin,

Ey ona yurt, yangi Oʻzbekistonim!

 

Ish yuritar senda ahli donolar,

Kundan-kun boʻy choʻzar baland binolar.

Xalqqa manzur boʻlar nurli xonalar,

Ey ona yurt, yangi Oʻzbekistonim!

 

Har jabhada bordir buyuk oʻzgarish,

Yangicha tadbirlar, yangicha yurish.

Goʻzallik tarziga pardozlar berish,

Ey ona yurt, Yangi Oʻzbekistonim!

 

Sport maydonida bayrogʻing baland,

Iqtidorli yoshlarga ardogʻing baland.

Jahon aro sening dovrugʻing baland,

Ey ona yurt, yangi Oʻzbekistonim!

 

Bilim maskanida bor tengsiz misol,

Kelajak yoshlaring topadi iqbol.

Oʻzbek degan noming ellarga timsol,

Ey ona yurt, yangi Oʻzbekistonim!

 

Yangi Mangʻit bu kun koʻtarmoqda qad,

Talpingan dillarda bordir jasorat.

Yangiliklar sari chorlar irodat,

Ey ona yurt, yangi Oʻzbekistonim!

 

Oʻtmishni bu kunga gar etsak qiyos,

Yangicha hayotga tugʻilar ixlos.

Har bitta uduming insonlarga xos,

Ey ona yurt, yangi Oʻzbekistonim!

 

Dilsayyor mamnundir hayot yoʻlidan,

Shodlikka vobasta iqbol nuridan.

Ilhomi joʻsh urar tuygʻularidan,

Ey ona yurt, yangi Oʻzbekistonim!

Xudoybergan JUMAMURODOV.

 

Amudaryo

Bogʻlaringda gullar boʻlib ochilsam,

Har qadamda ifor boʻlib sochilsam.

Rayhon boʻlib porlasam koʻchalarda,

Amudaryom, hech armonim boʻlmasdi.

 

Kelgan mehmon goʻzallikdan zavqlansa,

Ishtiyoqi oshib, koʻzi xumorlansa,

«Bogʻi Eram», deya dillar havaslansa,

Amudaryom, hech armonim boʻlmasdi.

 

Bagʻringda bir mevazorga aylansam,

Hayrat toʻla yuraklarga joylansam.

Bir bor kelgan mehmon qayta sogʻinsa,

Amudaryom, hech armonim boʻlmasdi.

 

Bugun tarix soʻzlamoqda adolatdan.

Har goʻshangda koʻngil obod tarovatdan.

Toʻrtta fasl bergan rizq-u barokatdan,

Amudaryom, mangu yorqin kelajaging!

Zuhra Ahmedova.

 

Orolim

Orolim, sen mening taqdirim, borim,

Koʻzimdagi nurim, tomirda qonim,

Qismatingdan soʻzlab, ingrar bu jonim.

Faqat sen ketmagil, ketmagil orim,

Kuzgi xazon yangligʻ soʻlma, Orolim.

 

Xalqimning qalbida ushalmas armon,

Barchaning tunlari uyqusiz, bedor,

Nobud boʻlib ketmoqda qanchalab jonlar...

Faqat sen ketmagil, ketmagil orim,

Kuzgi xazon yangligʻ soʻlma, Orolim.

 

Mayli ,tashvishlarga toʻlsin bu boshim,

Mayli, keragicha oqsin koʻz yoshim,

Mayli, chidab bersin soʻnggi bardoshim.

Faqat sen ketmagil, ketmagil orim,

Kuzgi xazon yangligʻ soʻlma, Orolim.

 

Ketsang-da chekinib qirgʻoqdan zor-zor.

Hali umid quyoshi porlagay dilda,

Quchoqlaring toʻlgay limmo-lim suvga.

Faqat sen ketmagil, ketmagil orim,

Kuzgi xazon yangligʻ soʻlma, Orolim.

Mahbuba Sariyeva,

69-sonli maktab oʻqituvchisi.

 

FAXRIMSAN!

Kindik qonim toʻkilgan qadrdon ota makon,

Faqat sening quchogʻingda orom olar shirin jon.

Mening jism-u jonim-la tursin noming yonma-yon,

Oʻgʻil-qizing baxtisan, faxrimsan, Amudaryo!

 

Qayga borsam, atasinlar meni Amu qizi, deb,

Shuning uchun nurga toʻla, porlab turar koʻzi, deb.

Ushbu elning insonlari farishtaning oʻzi, deb,

Oʻgʻil-qizing baxtisan, faxrimsan, Amudaryo!

 

Taqir yerda nihollar oʻstirgan bogʻbonlaring,

Ona yerni isrof qilmay yashaydi dehqonlaring.

Bolalarga ilm-u hunar oʻrgatgan ustozlaring,

Oʻgʻil-qizing baxtisan, faxrimsan, Amudaryo!

 

Haqiqatni gapiramiz, bizda quruq maqtash yoʻq,

Aql bilan ish tutamiz, shuning uchun kulfat yoʻq.

Hamma bilib turibdi-ku, aytishga hech hojat yoʻq,

Oʻgʻil-qizing baxtisan, faxrimsan, Amudaryo!

 

Sen haqingda kuylasam, saxiy deymi nomingni?

Axir faqat bizlar uchun baxsh etgansan boringni.

Ming yillarki, yuvib yotar Jayhun aziz poyingni,

Oʻgʻil-qizing baxtisan, faxrimsan, Amudaryo!

 

Noming tildan tushmas sira, eng goʻzal va jarangdor,

Ajdodlarning duolari qoʻllayveradi takror.

Sen uchun fido jonlar har yumushingga tayyor,

Oʻgʻil-qizing baxtisan, faxrimsan, Amudaryo!

 

Farzandlaring har sohada bilimdon-u peshqadam,

Baland-baland marralarni koʻzlab, tashlaydi qadam.

Xalqim, degan ne mardlaring ezguliklarga hamdam,

Oʻgʻil-qizing baxtisan, faxrimsan, Amudaryo!

 

Sening mehring erur xalqni birdamlikka koʻndirgan,

Shu birdamlik ila barcha illatlarni soʻndirgan.

Sen buyuksan, ogʻushingda buyuklarni oʻstirgan,

Barno qizing baxtisan, faxrisan, Amudaryo!

Barno Samandarova.

 

VATANIM!

Vatanim, bagʻringda oʻsayapman baxtli,

Sen borsan, gʻamim yoʻq, yuraman shaxdli.

Sen bizga iftixor, noming sharafli,

Har olgan nafassan, bizga kerakli.

 

Sendan aslo ayro tushmasin yoʻlim,

Sen-la birga boʻlsam, samoda qoʻlim.

Koʻkni boʻylayverar sarvqomat boʻyim,

Sen bilan tatiydi bayramim, toʻyim.

 

Hech qaysi Vatanga alishmam seni,

Axir bolam, deding ulgʻaytib meni.

Endi ayt, farzanding senga deb neni

Ilinsin, sen unga ilingan kabi!

 

Senda topgan oʻsha huzur-halovat,

Boshqa hech jahonda qilmas tarovat.

Sening chiroyingdan gullar xijolat,

Men uchun bu borliq sendan iborat!

Feruza Rahimova.

 

VATAN

Vatanga bir nazar sol,

Iforidan orom ol.

Toʻrt tomoni chamanzor,

Avlodlar topgay kamol.

Vatanim qudratidan,

Haybat-u savlatidan.

Faxr etaman hamisha,

Hurriyat davlatidan.

Mevazor bogʻlarida,

Purviqor togʻlarida,

Ochilmagan sirlar bor,

Oq-marmar tonglarida.

Gullarini hidlasang,

Vatan hidi keladi.

Zilol, tiniq suvlari,

Dilga orom beradi.

Mashhura Rajabova.

 

Oʻzbekiston

Vatanim Oʻzbekiston,

Osmonlari musaffo.

Shunchalar soʻlim makon,

Havosi tanga shifo.

Vatanim, gul chamanim,

Jon qadar aziz makon.

Mehrga toʻla bagʻring,

Jonajon Oʻzbekiston.

Rayhon Tojiboyeva,

50-maktab oʻquvchisi.