Qoraqalpogʻiston Respublikasi Joʻqorgʻi Kengesi Raisi mahalla faollari bilan uchrashdi

5-iyul kuni Qoraqalpogʻiston Respublikasi Joʻqorgʻi Kengesi Raisi Amanbay Orinbayev amudaryolik koʻcha boshchilari va mahalla faollari bilan uchrashdi.

Uchrashuvda Joʻqorgʻi Kengesi Raisi Qoraqalpogʻiston Respublikasi aholisiga munosib turmush sharoitlarini yaratish va insonlarning oʻtayotgan har bir kunidan rozi boʻlib yashashlari uchun keng koʻlamli islohotlar amalga oshirilayotganligini taʼkidladi.

Aytib oʻtish joiz, oʻtgan yillar mobaynida Prezidentimizning alohida eʼtibori va gʻamxoʻrligi sabab qoraqalpogʻistonliklar uchun koʻplab imtiyozlarga ega yangidan yangi qaror va farmonlar qabul qilindi. 2022-yil 31-avgust kungi “Qoraqalpogʻiston Respublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi Oʻzbekiston Respublikasi Prezidentining farmoniga muvofiq tadbirkorlarga soliq imtiyozlari berilgan boʻlsa, shu yilning 25-oktyabr kuni qabul qilingan “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi qaror bilan mahallalar obodonlashtirilib, infratuzilmasi yaxshilandi.

Amudaryo tumanida ham mazkur qaror asosida 26 ta obʼektda qurilish ishlari jadal surʼatlarda olib borildi. 2 ta mahallaning maʼmuriy binosi qurilib, foydalanishga topshirildi. Umumiy uzunligi 55,2 km boʻlgan ichki yoʻllar taʼmirlandi. Elektr taʼminoti, ichimlik suvi bilan bogʻliq muammolar oʻz yechimini topdi.

Shuningdek, Oʻzbekiston Respublikasi Vazirlar Mahkamasining “Qoraqalpogʻiston Respublikasida mahallalarni qoʻllab-quvvatlash jamgʻarmasini tashkil etish toʻgʻrisida”gi qaroriga asosan Qoraqalpogʻistondagi 452 ta mahallaning har biriga toʻgʻridan-toʻgʻri 500 mln. soʻmdan ajratildi. Ajratilgan mablagʻlarni esa har bir mahallaning oʻzi, oʻz muammolarini hal qilish uchun ishlatishi belgilangan. Albatta, ushbu mablagʻlarning qanday maqsadlarga sarflanishi koʻcha boshchilarining, mahalla faollarining takliflari asosida aniqlanadi.

Ushbu qaror bilan Qoraqalpogʻiston Respublikasidagi mahallalarning inftaruzilmasini rivojlantirish, aholining turmush darajasini yanada yaxshilash, mahallalardagi ijtimoiy-iqtisodiy muammolarni hal etish, mavjud muammolarni oʻz vaqtida aniqlash va yechimini topish hamda hal qilish maqsad qilingan.

Koʻcha boshchilari bilan boʻlib oʻtgan uchrashuv shu yoʻnalishdagi ishlarning amalga oshirilishi uchun zaruriy chora-tadbirlarni belgilab olishda muhim ahamiyat kasb etdi.

Uchrashuvda faol koʻcha boshchilari, mahalla faollari soʻzga chiqib, oʻz ovul va mahallalarida, koʻchalarida amalga oshirilayotgan ishlar uchun minnatdorchilik bildirgan holda mahalla institutining jamiyatdagi nufuzini yanada oshirish, aholining birdamligini va yakdilligini taʼminlashda oʻz hissalarini qoʻshishlarini aytib oʻtdilar.

Uchrashuv yakunida yosh avlod maʼnaviyatini yuksaltirishga, ularning har tomonlama yetuk va barkamol insonlar boʻlib voyaga yetishlariga oʻz xissalarini qoʻshgan, uzoq yillar mobaynida taʼlim va boshqa sohalarda faoliyat yuritgan nuroniylar Tursunboy Abdullayev, Jangabay Rajabov, Pardagul Oʻrazbayevalar “Ardoqli nuroniy” koʻkrak nishoni bilan, Qoraqalpogʻistonda xizmat koʻrsatgan jurnalist Robiya Yoʻldasheva esa “Vatan fidoiysi” koʻkrak nishoni bilan taqdirlandi.

Tuman hokimligining Axborot xizmati