ChOYKOʻLLIK YoShLAR UChUN KONTsERT DASTURI NAMOYISh ETILDI

Mamlakatimiz aholisining 55 foizini 30 yoshgacha boʻlgan yoshlar tashkil etadi. Har yili mehnat bozoriga minglab yoshlar kirib keladi. Ularga sifatli taʼlim berish, kasb-hunarga oʻqitish va bandligini taʼminlashga alohida eʼtibor qaratilmoqda.

Yoshlar bilan ishlash, ularning muammolarini mahallada hal etish, ularni tadbirkorlikka jalb qilish, ishlab daromad topishlariga va salohiyatini namoyon etishiga sharoit yaratish borasida tizimli ishlar amalga oshirilayapti. Ish bilan band boʻlmagan, dehqonchilik qilishga qiziqishi bor yoshlarga ijaraga ekin maydonlari uzoq muddatga ijaraga berilib, ijtimoiy himoyaga muhtoj, kasb-hunar bilan shugʻullanishni xohlovchi yoshlarga subsidiya asosida asbob-uskunalar berilayotir.

Yoshlar orasida barchaning doimiy eʼtibori va gʻamxoʻrligiga muhtoj, imkoniyati cheklanganlari ham borki, ular ovul-mahallalarda shakllantirilgan “Yoshlar balansi”da alohida roʻyxatga qoʻyilgan. Ularning holidan xabar olib turish, qiziqishlari, qobiliyatiga koʻra bandligini taʼminlash, boʻsh vaqtlarini mazmunli oʻtkazish tegishli sohalar masʼullarining vazifasi qilib belgilangan.

Mamlakatimizda iyun – Yoshlar oyligi doirasida yoshlarga oid maʼnaviy targʻibot tadbirlari, turli festivallar, tanlovlar, koʻngilochar tomoshalar oʻtkazilmoqda, yoshlarni mafkuraviy tahdidlardan ishonchli himoya qilishga eʼtibor kuchaymoqda.

9-iyun kuni tuman Madaniyat va turizm boʻlimi tomonidan Choykoʻl madaniyat markazida “Yoshlar oyligi” doirasida koʻngilochar tadbir oʻtkazildi.

Choykoʻllik yoshlar bilan uchrashuv tarzida boshlangan tadbirni ovul oqsoqoli Behzod Aytekov ochdi va yigʻilgan yoshlarni “Yoshlar oyligi” va yaqinlashib kelayotgan Yoshlar kuni bilan qizgʻin qutladi. Ovul yoshlariga hududini obod va farovon goʻshaga aylantirishda oʻz mehnatlari bilan hissa qoʻshishiga ishonch bildirdi. Ovul yoshlari yetakchisi Xursand Shukurullayev, Choykoʻl madaniyat markazi mudiri Bahodir Rajabovlar ham soʻzga chiqib, yoshlarni tabriklab, ular uchun yaratilayotgan imkoniyatlardan unumli foydalanishga daʼvat etdi.

Shundan soʻng tumanimizning iqtidorli sanʼatkorlari ijrosida kontsert dasturi tashkil etildi. Shuningdek, kontsert davomida tuman Madaniyat va turizm boʻlimi tomonidan yoshlar uchun tayyorlangan bayram sovgʻalarini boʻlimning yoshlar bilan ishlashish boʻyicha mutaxassisi Nasibaxon Eshchonova, Xursand Shukurullayevlar topshirdilar.

Yoshlik! Inson mustahkam bilim, kasb-hunari bilan oʻz kelajagiga dadil qadam qoʻyadigan fasl. Bu davrda ularga oʻqish-oʻrganishga, ulkan marralarni zabt etishga ruhlantirish juda muhim.

Shu maʼnoda olib qaraydigan boʻlsak, Choykoʻl yoshlari bilan tumanimiz sanʼatkorlarning uchrashuvi, ular uchun namoyish etgan kontsert dasturining ahamiyati ulkan boʻldi, deyish mumkin.

Oygul RAJABOVA.