Amudaryo tumani hokimi Sultonboy Yoʻldashevning madaniyat va sanʼat xodimlari kuni munosabati bilan soha vakillari hamda faxriylariga BAYRAM TABRIGI

Qadrli madaniyat sohasi fidoyilari, aziz faxriylar!

Sizlarni va Siz orqali yurtimizdagi barcha madaniyat va sanʼat jonkuyarlarini kasb bayramingiz bilan chin qalbimdan tabriklab, oʻzimning yuksak hurmatim va samimiy ehtiromimni izhor etishdan xursandman! 

Maʼlumki, odamlarni ezgu gʻoyalar atrofida birlashtirib, ularga quvonch va shodlik ulashishda, mamlakatni dunyoga tanitishda madaniyat va sanʼatning oʻrni va taʼsiri beqiyosdir.

Shu sababli ham soʻnggi yillarda mamlakatimizda milliy madaniyatni yanada rivojlantirish, ajdodlarimizdan qolgan moddiy va madaniy merosni saqlash va targʻib etish, bir soʻz bilan aytganda, madaniyat va sanʼat sohasini zamon talablariga mos ravishda rivojlantirish boʻyicha tizimli ishlar amalga oshirilmoqda.

Tumanimizda ham soha fidoyilari xalqimizning maʼnaviy-axloqiy va madaniy darajasini yanada yuksaltirish ishlariga munosib hissa qoʻshib kelmoqdalar.

Tuman Madaniyat va turizm boʻlimi, boʻlim tasarrufidagi madaniyat markazlari, Bolalar musiqa va sanʼat maktablari, Madaniyat va istirohat bogʻi hamda tuman tarixi muzeyi mehnat jamoasi aholi, ayniqsa, yoshlar qalbi va ongiga yuksak maʼnaviyat, insonparvarlik gʻoyalarini singdirishda jonbozlik koʻrsatmoqdalar.

“Uchqun” ashula va raqs xalq ansambli, “Ofarin” folklor-etnografik xalq  ansambli, “Jayxun moʻʼjizasi” anʼanaviy sahna-tsirk xalq havaskorlik jamoalari ham musiqa, tsirk va xalq ijodiyotining betakror asarlarini aholi orasida keng targʻib qilib kelmoqda.

Bolalar musiqa va sanʼat maktablarida esa kelgusida xalqimiz sanʼatini jahon sahnalariga olib chiqishga qodir boʻlgan umidli yoshlar bilim olmoqdalar.

Bugungi bayram munosabati bilan tumanimizda madaniyat va sanʼat sohalarida ishlayotgan barcha xodimlarni, sohada koʻp yillar samarali mehnat qilib, bugun keksalik gashtini surayotgan faxriylarimizni yana bir bora chin qalbimdan samimiy tabiklayman!

Aziz yurtdoshlar!

Shu kunlarda mamlakatimizda muhim siyosiy jarayon – umumxalq Referendumiga tayyorgarlik ishlari muhim pallaga kirgan. Yangilanayotgan Konstitutsiyamizda barcha sohalar qatori madaniyat va sanʼatni yanada rivojlantirish, fuqarolarning ushbu sohalarda huquq va erkinliklarini taʼminlash masalasiga ham katta eʼtibor qaratilmoqda.

Yangilanayotgan Konstitutsiyamizda alohida bobning “Iqtisodiy, ijtimoiy, madaniy va ekologik huquqlar” deb nomlanayotgani, 53-moddasida esa “Har kimga ilmiy, texnikaviy va badiiy ijod erkinligi, madaniyat yutuqlaridan foydalanish huquqi kafolatlanadi. Intellektual mulk qonun bilan muhofaza qilinadi. Davlat jamiyatning madaniy, ilmiy va texnikaviy rivojlanishi haqida gʻamxoʻrlik qiladi” deya belgilab qoʻyilayotgani fikrimizning isbotidir.

Shunday ekan, barchangizni yurtimizda inson huquqlarini ulugʻlab, mamlakatimiz taraqqiyotini yangi bosqichga olib chiqadigan ushbu muhim hujjat boʻyicha Referendumda faol ishtirok etishga chaqiraman.

Hurmatli madaniyat va sanʼat xodimlari, qadrli faxriylar!

Sizlarni yana bir bora kasb bayramingiz – Oʻzbekiston Respublikasi madaniyat va sanʼat xodimlari kuni bilan tuman hokimligi va shaxsan oʻz nomimdan samimiy tabriklayman.

Barchangizga mustahkam sogʻliq, ijodiy ishlaringizda ulkan zafarlar, xonadonlaringizga tinchlik va farovonlik tilayman.

Kasb bayramingiz muborak boʻlsin, aziz madaniyat va sanʼat fidoyilari!