“MILLIY ESTARADA IJROChILIGI HAFTALIGI” DOIRASIDA QORAQALPOGʻISTONDA XIZMAT KOʻRSATGAN ARTIST I.SIYTIMOV YoSh IJROChILAR UChUN MAHORAT DARSI OʻTKAZDI

Oʻzbek xalqining asrlar davomida shakllangan va avloddan-avlodga noyob meros sifatida oʻtib kelayotgan milliy raqs, musiqa va anʼanaviy ijrochilik sanʼatini zamonaviy estrada sanʼati bilan uygʻunlikda rivojlantirish, yanada boyitish, xalqimiz, ayniqsa, yosh avlod ongiga bu bebaho boyliklarga chuqur hurmat va havas tuygʻularini singdirish, ularda milliy madaniyatimiz, qadriyatlarimizga nisbatan mehr va ehtirom hislarini yuksaltirish maqsadida Oʻzbekiston Respublikasi Madaniyat va turizm Vazirligi tomonidan joriy yilning 21-28-fevral kunlari “Milliy estrada ijrochiligi haftaligi” deb eʼlon qilindi. Unga koʻra mamlakatimizning barcha hududlaridagi madaniyat va sanʼat dargohlarida mazkur haftalik doirasida koʻrik-tanlovlar, milliy estrada sanʼati dargʻalari bilan uchrashuvlar, ushbu sanʼat turini milliy raqs, musiqa va anʼanaviy ijrochilik sanʼati bilan uygʻunlikda rivojlantirishga qaratilgan targʻibot tadbirlari, shuningdek, zamonaviy estrada sanʼatining yosh, umidli vakillari bilan sanʼatsevar yoshlarning samimiy, dildan suhbat tarzidagi uchrashuvlari oʻtkazildi.

28-fevral kuni Qoraqalpogʻiston Respublikasi Madaniyat va turizm vazirligi tasarrufidagi Amudaryo tuman 9-sonli bolalar musiqa va sanʼat maktabining tantanalar zalida “Milliy estrada ijrochiligi haftaligi” doirasida “Ustozlar mahorati – yoshlarga ibrat” mavzusida adabiy-musiqiy uchrashuv kechasi tashkil etildi.

Amudaryo tumani madaniyat va turizm boʻlimi hamda 9-sonli bolalar musiqa va sanʼat maktabi tomonidan tashkillashtirilgan mazkur uchrashuv tadbirida Qoraqalpogʻiston Respublikasida xizmat koʻrsatgan artist, taniqli estrada xonandasi Ikrom Siytimov yosh havaskor sanʼatkorlar va 9-sonli bolalar musiqa va sanʼat maktabining estrada xonandaligi yoʻnalishi oʻquvchilari uchun mahorat darsini oʻtkazdi.

Qizgʻin bahs-munozaralar, qiziqarli savol-javoblar asosida tashkillashtirilgan mahorat darsi orqali oʻquvchi-yoshlar milliy estradamiz tarixi, bugungi taraqqiyoti, milliy estrada sanʼatini rivojlantirish va boyitish borasida amalga oshirilayotgan keng koʻlamli madaniy islohotlar, yoshlarning ushbu sanʼat turi bilan shugʻullanishlari, oʻz iqtidorlarini namoyon etishlari uchun yaratilgan shart-sharoitlar haqidagi maʼlumotlarga ega boʻldilar.

Bundan tashqari, Ikrom Siytimov estrada ijrochiligida yosh xonandalar eʼtibor berishlari kerak boʻlgan eng muhim jihatlar, xususan, ashula uchun matn (sheʼr) tanlash, maʼno va mazmun, musiqiy uygʻunlikka oʻta jiddiy eʼtibor qaratish, taqlidchilikdan yiroq boʻlish, oʻz ovozi va uslubiga ega boʻlish, ijro mahoratini tinimsiz oshirish orqali oʻziga xos ijro yoʻliga, sanʼatkorlar tili bilan aytganda, originalikka ega boʻlish zarurligi haqida amaliy va nazariy tushunchalar berdi. Ayniqsa, soʻz va navo uygʻunligini taʼminlashga qaratilgan tavsiyalar yosh havaskor xonandalar uchun juda qiziqarli va qimmatli fikrlarga boyligi, qolaversa, Ikrom Siytimovning matn tanlash va musiqa yaratish mahorati uchrashuv ishtirokchilarida katta taassurot qoldirdi.

Robiya YOʻLDOShEVA.