YaNGI YIL MADHI

Koʻp soʻrasak, balki insofdanmasdir,

Asli qilday nafdan toʻladi koʻngil.

Tinchlik, salomatlik boʻlsa-ku basdir,

Bu neʼmatlar moʻl koʻl boʻlsin, Yangi yil!

Aka-uka, opa-singil-qarindosh,

Bari bir yoqadan chiqarishib bosh,

El-yurt xizmatida boʻlishsin bosh-qosh,

Yurtimiz chiroyli boʻlsin, Yangi yil!

Bir bayram qilaylik chaqnab koʻzimiz,

Doʻst-u yor eshitsin tabrik soʻzimiz,

Qorbobo-oʻzimiz, Qor qiz-qizimiz,

Bolalar kutganin olsin, Yangi yil!

Yurtim kelajagi-sogʻlom bolalar,

Bu bayramda behad quvonar ular,

Bizning eʼtibordan olib bahralar,

Bir sof qalbli inson boʻlsin, Yangi yil!

Bugun qor tagida uxlayotgan yer,

Elning rizqiga kuch yigʻmoqdaman der,

Dehqon eldoshlarim qancha toʻksa ter,

Shunchalar zoʻr xirmon boʻlsin, Yangi yil!

"Qari biganini bilmaydi pari”,-

Degan-ku elimning donishmandlari,

Yoshlari ulgʻayib borgani sari,

Keksalar eʼzozda boʻlsin, Yangi yil!

Ahmad NAFASOV

Yillarning ketidan, yillar almashib

Iqbol tilab kelar, bugun yangi yil

Oq libos kiydirib, yeru-samoga

Qorga belab kelar, bugun yangi yil

Qorbobo qorqizin yetaklab, shoshib

Necha oʻlkalar-u, necha qir oshib

Sogʻlom bolalarga sovgʻa ulashib

Boshin silab kelar bugun yangi yil

Sarishta-saranjom har bir uyimiz

Ne ajib ushalsa, orzu-oʻyimiz.

Xushchaqchaq oʻtkazib, har bir toʻyimiz-

Toʻyga ulab kelar bugun yangi yil.

Quvonch-shodlik bilan har bir xonadon

Yangi yil kutadi oʻgʻil-qiz shodon.

Qorbobo, qorqiz-la boʻlishib mehmon,

Toshib, toʻlib kelar bugun yangi yil.

Oʻzbekka toʻy-bayram azal-azal xos,

Toʻy oʻzbekka loyiq, oʻzbek toʻyga mos.

Bu yilgi yangi yil soʻzimga asos-

Dalil boʻlib kelar bugun yangi yil.

Barcha baxti kulgan bolajonlarin,

Moʻʼtabar, mexribon onajonlarin,

Moʻysafid, keksa-yu, otaxonlarin

Eʼzoz qilib kelar bugun yangi yil.

Shomurod XOʻJANOV