15-aprel – Madaniyat va sanʼat xodimlari kuni

MILLIY MADANIYaTIMIZ VA SANʼATIMIZNI YaNADA BOYITIB, XALQIMIZGA XIZMAT QILAMIZ

Insoniyat hayotida alohida oʻrin tutib kelayotgan madaniyat va sanʼatning millat taraqqiyoti, rivoji yoʻlidagi hissasi beqiyos. Azal-azaldan sanʼat va madaniyat butun xalq, qolaversa, yosh avlod qalbida milliy va umumbashariy qadriyatlarga hurmat, yurtga muhabbat va sadoqat tuygʻularini mustahkamlashda oʻziga xos taʼsir kuchiga ega boʻlib kelgan.

Aytish joizki, mamlakatimizda soʻnggi yillarda mazkur sohani rivojlanishning yangi bosqichiga koʻtarish yuzasidan hukumatimiz tomonidan tub oʻzgarishlar, islohotlar olib borilmoqda. Davlatimiz rahbari rahnamoligidagi madaniyat va sanʼatga boʻlgan ulkan eʼtibor, sohadagi ijobiy burilishlardan ruhlangan tuman Madaniyat boʻlimi va hududlardagi Markazlarda faoliyat yuritayotgan xodimlar madaniy bayram tadbirlarining chuqur gʻoyaviy mazmun bilan boyitilishini  taʼminlab, xizmat koʻrsatib kelmoqda.

Soha xodimlari aholining milliy  madaniyatini  rivojlantirish,  keng jamoatchilik  orasida  milliy  qadriyatlarimizni tiklash, ularni asrab-avaylash va rivojlantirish, muqaddas dinimiz, urf-odatlarimizni, tarixiy-madaniy  merosimizni  yuksaltirishga munosib hissa qoʻshishmoqda. Shu qatori yoshlarning isteʼdodlarini yuzaga chiqarish, har tomonlama qoʻllab-quvvatlash, kitobxonlarga  namunali  kutubxona  xizmati  koʻrsatish,  tarbiyaviy  ahamiyatga ega ishlarni tashkil etish, madaniyatimizni  dunyoga  tanitish  maqsadida  koʻpgina ijobiy  ishlarni  amalga  oshirishmoqda.

Amudaryo tuman Madaniyat boʻlimiga qarashli 7 ta madaniyat  markazi, 3 ta ashula va raqs,  folklor, tsirk sanʼati yoʻnalishidagi xalq jamoalari mavjud. Undan tashqari, 2 ta Bolalar musiqa va sanʼat maktabi, 1 ta maxsus koʻzi ojizlar kutubxonasi, Mangʻit madaniyat va istirohat bogʻi ham tumanimiz ahlining madaniy-maʼnaviy kamolotiga hissa qoʻshib kelmoqda. Ayni paytda “Qoʻshayev Raim” xususiy korxonasiga qarashli istirohat  bogʻida mavjud  attraktsionlar qatoriga yangi zamonaviy  oʻyin  qurilmalari  imtiyoz  boʻyicha keltirilib, 6 ta  yangi attraktsion  ishga tushirildi. Shuningdek, 9-sonli Bolalar musiqa va sanʼat maktabida 11 ta yoʻnalish boʻyicha 258 nafar bolalar, 21-sonli Bolalar musiqa va sanʼat maktabida 9 ta yoʻnalish boʻyicha 267 nafar bolalar tahsil olib, musiqa va sanʼat sirlarini oʻrganishmoqda.

Madaniyat markazlarida 20 dan ortiq havaskorlik toʻgaragi faoliyati yoʻlga qoʻyilgan boʻlib, 250 nafardan ziyod oʻquvchilar bor. Yosh avlodni madaniyat va sanʼatga keng jalb etish, ularning boʻsh vaqtlarini mazmunli oʻtkazish maqsadida qoʻshimcha tashkil qilingan maqom, nazm va nasr, tsirk, ovoz yozish, raqs, bichish-tikish, badiiy oʻqish, baxshichilik, estrada, masxaraboz sanʼati kabi 20 ga yaqin toʻgaraklarda ham 250 nafardan ziyod yoshlar sanʼat sirlarini oʻrganishmoqda.    

Tumanimizda tinchlik va mustaqillik uchun qurbon boʻlgan qahramonlarni yod etish maqsadida “Xotira va Qadrlash maydoni”, maʼnaviyat dargohi,  jonli tariximiz koʻzgusi boʻlgan muzey  tashkil qilingani soha xodimlari faoliyatidagi samaradorlikni yanada oshirishda alohida ahamiyat kasb etmoqda. Endilikda muzey faoliyatini kengaytirish, rivojlantirishga, aholi eʼtiborini jalb etishga imkon boricha harakat qilamiz. Shu bilan birga muzeydagi tarixiy yodgorliklar, maʼnaviy-maʼrifiy xazinalarni  kelajak avlodga yetkazish uchun koʻz  qorachigʻidek asraymiz, ulardan oqilona foydalangan holda, yillar davomida imkon qadar boyitib boramiz.

Biz Madaniyat boʻlimi mehnat jamoasi milliy madaniyatimiz va sanʼatimizni yanada boyitib, yosh avlod ongiga singdirishga, bayram va boshqa muhim sanalarda xalqqa xizmat qilib, koʻtarinkilik bagʻishlashga, yuksak natijalar, yuqori koʻrsatkichlarga erishishga harakat qilamiz.

 Shuhrat Yusupov, tuman Madaniyat boʻlimi mudiri.