“SPORT BILAN SOGʻLOM HAYoT SARI!” ShIORI OSTIDA QIShKI MARAFON OʻTKAZILDI

Doʻrman ovulida hududdagi umumtaʼlim maktab  oʻquvchilarining darsdan boʻsh vaqtlarini mazmunli oʻtkazish maqsadida OFY raisi Otamurod Yusupov rahbarligida turli sport musobaqalari, maktablararo bellashuvlar, koʻngilochar tadbirlar oʻtkazilib kelinadi. Yangi yil bayrami arafasida 20-,84-, 70-sonli umumtaʼlim maktablari oʻquvchilari ishtirokida oʻtkazilgan qishki marafon “Sogʻlom hayoti sari!” deb nomlandi.
Qishki marafonni  oʻtkazishga bagʻishlangan tadbirda tumanimizdagi 9202 “K” harbiy qismidan katta leytenant Mirshod Hamroyev, tuman Ichki ishlar boʻlimi inspektori  Oʻmirboy Nosirovlar ishtirok etishdi. Doʻrman OFY raisi Otamurod Yusupov  oʻquvchi-yoshlarga marafonni oʻtkazishdan koʻzlangan maqsad, avvalo, ularning darsdan boʻsh vaqtlarini mazmunli oʻtkazish, qolaversa, sport bilan doimiy shugʻullanishlari uchun zarur sharoit yaratishdan iborat ekanligini taʼkidladi. Oʻz navbatida 9202 “K” harbiy qism katta leytenanti Mirshod Hamroyev va IIB inspektori Oʻmirboy Nosirovlar sportning inson kamolotidagi roli haqida toʻxtaldilar.
Oʻzaro ahillik, doʻstlik ruhida oʻtgan “Sport bilan sogʻlom hayot sari!” qishki marafonida oʻgʻil bolalar oʻrtasida  Nodir Otajonov, qiz bolalar oʻrtasida Maftuna Erkaboyevalar 1-oʻrinni egallashdi. Ikkinchi oʻrin Asrorbek Madrahimov va Farida Boboxonovalarga, uchinchi oʻrin esa Elbek Erkinboyev hamda Munisa Tojiboyevalarga nasib etdi.
Marafon gʻoliblariga Doʻrman OFY raisi Otamurod Yusupov qimmatbaho sovgʻalar va pul mukofotlari taqdim etdi.
Shuningdek, ovul yoshlari va 9202 “K” harbiy qism askarlari oʻrtasida futbol musobaqalari ham oʻtkazildi. Qizgʻin bahslar va doʻstona oʻtgan futbol oʻyinlaridan ovul yoshlari va 9202 “K” harbiy qism yosh askarlari olam-olam zavq oldilar.

Mahmudjon ShOMURODOV.