ELEKTR ENERGIYaSI UChUN TOʻLOVLAR onlayn tizimida amalga oshiriladi
Keyingi yillarda elektr energiyasi isteʼmoli tobora ortib bormoqda. Bu holat aholi farovonligining oshayotgani, turmush darajasining yaxshilanayotgani bilan izohlanadi. Masalan, ilgari xonadonlarimizda bitta televizor va sanoqli maishiy elektr buyumlari ishlatilgan boʻlsa, bugun bunday vositalar soni ancha koʻpaydi.
Taraqqiyotning bu kabi shiddat bilan kechayotgani soha oldiga qator masalalarni qoʻymoqda. Albatta, isteʼmolchilarga yetarli miqdorda va sifatli tovar yetkazib berishning eng dastlabki sharti – toʻlov intizomini mustahkamlash hamda ishonchli va qulay toʻlov vositalarini joriy qilishdir. Shuning uchun barcha sohalar qatori elektr energetikasi sohasiga ham axborot-kommunikatsiya texnologiyalari jadal surʼatlarda joriy qilinmoqda.
"Elektr energetikasi toʻgʻrisida”gi Oʻzbekiston Respublikasi Qonuni hamda Vazirlar Mahkamasining 2009-yil 22-avgustdagi "Elektr va issiqlik energiyasidan foydalanish qoidalarini tasdiqlash toʻgʻrisida”gi qarori talablari asosida "Elektr hisob” dasturiy taʼminoti ishlab chiqilgan edi.
Dasturning yaratilishi yetkazib berilgan elektr energiyasi uchun toʻlovlarni oʻz vaqtida va samarali yigʻish, inson omilining hisob-kitobga va toʻlovlarning haqqoniyligiga salbiy taʼsirini kamaytirish imkonini berdi.
Endilikda har bir yuridik va maishiy isteʼmolchi kompaniyaning asosiy portali orqali shaxsiy kabinetga kirish va undan foydalanish imkoniyatiga ega. Shaxsiy kabinetda hisobdagi joriy balansni koʻrish, kelib tushgan toʻlov, hisoblagichdan olingan koʻrsatkichlar, hisob-kitob tarixi va uning joriy holati toʻgʻrisidagi maʼlumotlar mavjud boʻladi.
Eng muhimi, dasturiy taʼminot yaratilganidan keyin foydalanilgan elektr energiyasi uchun toʻlovlarni avtomatlashtirilgan toʻlov tizimining mukammallashtirilgan turlari orqali amalga oshirish imkoniyati yuzaga keldi.
Avtomatlashtirilgan toʻlov tizimining afzalligi shundaki, elektr taʼminot korxonasining toʻlov qabul qilish boʻlimiga borib navbatda turish shart emas va amalga oshirilgan toʻlov bir necha soniyalarda Sizning shaxsiy hisobingizga tushadi. Masalan, oʻzingizga yaqin boʻlgan PAYNET shoxobchasi orqali elektr energiyasi toʻlovlarini real vaqt rejimida, 500 soʻmdan to 100 000 soʻmgacha kunning istalgan paytida amalga oshirishingiz mumkin. Buning uchun PAYNET punktlaridan biriga kelib, shaxsiy hisob raqamini hamda toʻlanadigan pul miqdorini aytish kifoya.
Elektr energiyasini hisobga olish, nazorat qilish va toʻlovlarni qabul qilishning avtomatlashtirilgan tizimi yoʻlga qoʻyilishi isteʼmolchilarga qulaylik yaratishi bilan birga oʻzaro hisob-kitoblarda aniqlikni taʼminlashga ham xizmat qilmoqda.
Muhammadjon BEKChANOV,
«Qoraqalpoq hududiy elektr tarmoqlari korxonasi» OAJ
Amudaryo tuman elektr taʼminoti korxonasi boshligʻi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
