"QIZIL YaRIM OY" JAMIYaTI TOMONIDAN XAYRIYa MABLAGʻLARI TARQATILDI

Oʻzbekiston “Qizil yarim oy” jamiyati koʻngilli, insonparvarlik tashkiloti boʻlib, ayni paytda 15 ta mintaqaviy, 206 ta tuman, shahar va 1500 dan ortiq boshlangʻich tashkiloti, 200 mingdan ortiq faol aʼzo va 40 mingdan ortiq volontyorlari yordamida jamoatchilik asosida faoliyat yuritadi. Jamiyatda “Mehr-shafqat” xizmati tashkil qilingan va yolgʻiz keksalar, nogironlar, surunkali kasalligi bor bemorlar, koʻp farzandli, kam taʼminlangan oilalarga doimiy gʻamxoʻrlik qilib, har yili yuz minglab kishilarga insonparvarlik yordami koʻrsatib kelmoqda.

18-dekabr kuni Oʻzbekiston “Qizil yarim oy” jamiyati tuman boʻlimiga «YuSAID» hamda hamkor tashkilotlar tomonidan xayriya maqsadlari uchun joʻnatilgan sanitariya-gigenik toʻplamlari va kir yuvish kukunlarini tarqatish aktsiyasi oʻtkazildi.

Oʻzbekiston “Qizil yarim oy” jamiyatining mamlakatda infektsion kasalliklar jumladan, koronavirus infektsiyasi tarqalishining oldini olish boʻyicha amalga oshirilayotgan chora-tadbirlarni qoʻllash maqsadidagi ushbu begʻaraz yordami tumandagi boʻlim hisobida turuvchi fuqarolarga tarqatib berildi.

Xayriya tadbiri davomida tashkilotning Amudaryo tuman boʻlimi ijrochi direktori Ibodulla Nurimbetov, tibbiy birodar Chorsham Ernazarov, tuman Tibbiyot birlashmasi epidemiolog shifokori Hojiboy Sobirov, volontyorlar Oybek Xolmurodov, Ravshanoy Xolmurodovalar «YuSAID» tomonidan moliyalashtirilgan «COVID-19» loyihasi asosida ajratilgan sanitar-gigenik toʻplamni 7 nafar fuqaroga, loyiha hamkorlari tomonidan begʻaraz homiylik yordami sifatida ajratilgan kir yuvish kukuni va yuvish vositalarini 60 nafar fuqarolarga tarqatdilar.

Ushbu oilalarga Oʻzbekiston “Qizil yarim oy” jamiyati tomonidan tayyorlangan koronavirus kasalligidan saqlanish chora-tadbirlari toʻgʻrisidagi bukletlar ham ulashildi. Xayriya mablagʻlarini tarqatishda ishtirok etgan tibbiyot xodimlari fuqarolarga sogʻlom turmush tarziga amal qilish, shaxsiy gigena qoidalariga rioya qilib, hovli-joyini ozoda saqlash va turli kasalliklardan himoyalanish yuzasidan suhbatlar oʻtkazdilar.

Xayriya mablagʻlari yetkazib berilgan xonadonlar egalari insonparvarlik yordami uchun chuqur minnatdorchilik bildirdi.

Koronavirus pandemiyasi tufayli xalqimiz joriy yilda jiddiy sinovlarni boshidan oʻtkazdi. Biroq har qanday  murakkab sharoitda ham hech bir inson oʻz holiga tashlab qoʻyilmaydi, ijtimoiy himoyaga olinadi.

Xalqimiz pandemiyani mustahkam hamjihatlikda, qoʻlni qoʻlga berib, yengib oʻtmoqda.

Oygul RAJABOVA.