Amudaryo tumani hokimi S.Yoʻldashevning qishloq xoʻjaligi xodimlari kuni munosabati bilan BAYRAM TABRIGI

Assalomu alaykum, qadrli qishloq xoʻjaligi sohasi fidoyilari, mirishkor fermerlar va zahmatkash dehqonlar!

Sizlarni va Siz orqali oila aʼzolaringiz, mehnat jamoangiz va barcha qishloq xoʻjaligi sohasi fidokorlarini kasb bayramingiz – Oʻzbekiston Respublikasi qishloq xoʻjaligi xodimlari kuni munosabati bilan Amudaryo tumani hokimligi va shaxsan oʻz nomimdan chin qalbimdan samimiy tabriklayman!

Muhtaram Prezidentimizning tashabbusi bilan 2017-yilda qabul qilingan Qonun asosida har yili dekabr oyining ikkinchi yakshanbasi mamlakatimizda qishloq xoʻjaligi xodimlari kuni sifatida nishonlanib kelinayotgani albatta, Sizdek halol va fidoyi, zahmatkash va matonatli yurtdoshlarimizning mehnatiga boʻlgan butun xalqimizning samimiy ehtiromi deb bilamiz. Har yili turli shakldagi tabiat injiqliklari, turli hashorot va kasalliklar xuruji, yozning jaziramasi-yu qishning ayozli kunlarida – yil-oʻn ikki oy davomida tinimsiz mehnat qilib, xalqimiz dasturxoni toʻkinligini taʼminlaydigan Siz azizlarning mehnatingiz doimo tahsinga loyiqdir. Amudaryolik qishloq xoʻjaligi sohasi xodimlarining joriy yilgi suv tanqisligi sharoitida ham paxta, gʻalla va pilla yetishtirish boʻyicha shartnomalarini ortigʻi bilan bajarib, boshqa qishloq xoʻjaligi ekinlaridan ham moʻl hosil toʻplagani, albatta, barchamizga cheksiz quvonch bagʻishlaydi.

Bu yil paxtachilik sohasida klaster tizimiga toʻliq oʻtilib, tuman tarixida ilk marta yuz foiz paxta “Amudaryotex” xorijiy korxonasi klasteri buyurtmasi asosida yetishtirilgani ushbu sohada maʼmuriy boshqaruv usullari oʻrniga bozor mexanizmi tartib-qoidalarini joriy qilish imkonini berdi. Natijada, 35 ming 600 tonnadan ortiq paxta yetishtirgan fermer xoʻjaliklarimizning ham, klaster korxonasining ham manfaatdorligi ortib, daromadlari yuksaldi.

2020-yil hosili uchun 332 ta fermer xoʻjaliklarimiz tomonidan 3350 gektar maydonga gʻalla ekilib, davlat xazinasiga 8845 tonnadan ortiq gʻalla topshirildi va shartnomaviy reja Qoraqalpogʻistonda birinchilardan boʻlib ortigʻi bilan bajarildi. Mirishkor gʻallakorlarimiz 2021-yil hosili uchun 3800 gektar maydonga gʻalla ekib, bugungi kunda agrotexnik talablar asosida sifatli parvarishlamoqdalar.

Pillakorlarimiz esa davlatga pejadagi 208 tonna oʻpniga 210 tonnadan ortiq yuqopi sifatli pilla topshipishga erishdilar.

Bundan tashqari, dehqon va fermerlarimiz boshqa qishloq xoʻjaligi ekinlaridan ham moʻl hosil olib, el dasturxonining toʻkinligi, bozorlarimizda narz-navo barqarorligiga munosib hissa qoʻshdilar.

Chorvadorlarimizning samarali mehnatlari natijasida joriy yilning  1-dekabr  holatiga tumandagi yirik  shoxli qoramollar soni 156 ming 400 boshdan oshdi. Shuningdek, 104 ming 700 bosh qoʻy-echkilar, 659 ta ot zooveterinariya qoidalari asosida parvarish qilinmoqda. Parrandalar soni 1 mln. 32 ming 700 taga yetkazilib, salkam 10 ming tonna goʻsht yetishtirildi. Sut ishlab chiqarish hajmi esa 35 ming tonnadan oshdi.

Amudaryo tumanida baliqchilik sohasini rivojlantirishga qaratilayotgan eʼtibor natijasida 2020-yilda jami 1000 tonnaga yaqin baliq mahsuloti yetishtirildi. Asalarichilik bilan shugʻullanuvchi tadbirkor va dehqonlarimiz safi koʻpayishi natijasida 152 tonna yuqori sifatli asal yetishtirildi.

Tumanimizda qishloq xoʻjaligi sohasida mahsulot yetishtirish hajmini oshirishga tomorqachilarimiz ham munosib hissa qoʻshmoqdalar. Ular samarali mehnatlari natijasida har qarich yerni daromad manbaiga aylantirib avvalo oilasining, qolaversa mamlakatimizning iqtisodiy taraqqiyotiga munosib hissa qoʻshmoqdalar. Turli dasturlar va loyihalar, bank kreditlari va tomorqachilarning oʻz mablagʻlari hisobidan tashkil qilinayotgan ixcham issiqxonalar esa yerdan yil davomida 3-4-marta hosil olish imkonini bermoqda.

Mana shunday fidoyi va zahmatkash, ishning koʻzini biladigan dehqon va fermerlarimiz, tomorqachilarimizning mehnatlari evaziga joriy yil yakunlari boʻyicha tumanda qishloq xoʻjaligi mahsulotlari yetishtirish hajmi 624,1 mlrd. soʻmni tashkil qilib, oʻtgan yilga nisbatan oʻsish surʼati 103,7 foizni tashkil qilishi kutilmoqda.

Albatta, bu borada davlatimiz va hukumatimizning sohaga qaratayotgan eʼtibori, qishloq xoʻjaligida bozor mexanizmlarini joriy qilib, fermer va tomorqachilar, dehqon xoʻjaliklari egalarini har tomonlama qoʻllab-quvvatlab kelayotgani muhim ahamiyat kasb etmoqda.

Fursatdan foydalanib, dehqon va fermerlarni, gʻallakor va pillakorlarni, tomorqachi va chorvadorlarni, oddiy ishchi va mexanizatorlardan tortib, agronom va olimlarni, qoʻyingki, qishloq xoʻjaligiga aloqador barcha yurtdoshlarimizni bugungi kasb bayramlari bilan chin qalbimdan tabriklayman!

Hamisha rizqingiz butun, xirmoningiz baland boʻlib, halol mehnatingizning rohatini koʻrib yashash baxti nasib qilsin! Yana bir bora bayramingiz muborak boʻlsin, qadrli qishloq xoʻjaligi sohasi xodimlari!

Sultonboy Yoʻldashev, Amudaryo tumani hokimi.