“Yangi oʻzbekiston – yangicha dunyoqarash” shiori ostida targʻibot tadbirlari davom etmoqda

Davlatimiz rahbari tomonidan mamlakatni har tomonlama ijtimoiy-iqtisodiy, siyosiy, madaniy jihatdan rivojlantirish maqsadida ishlab chiqilgan Harakatlar strategiyasida belgilangan vazifalar ijrosini taʼminlash maqsadida tumanimizga tashrif buyurgan targʻibot guruhi tomonidan barcha hududlarda madaniy-maʼrifiy tadbirlar oʻtkazildi. Undan tashqari, tadbirlarni oʻtkazishdan yoshlarni adabiyot, sanʼat, sport, axborot texnologiyalariga boʻlgan qiziqishlarini yanada oshirish boʻyicha ilgari surilgan beshta muhim tashabbusni keng targʻib qilish kabilar ham koʻzlandi. Tuman aholisi tomonidan ushbu tadbirlarning barchasi katta qiziqish bilan qarshi olindi.

17-noyabr kuni adabiyot, sanʼat, taʼlim vakillaridan iborat targʻibot guruhi tomonidan tashkil etilgan tadbirlar chekka hududlardagi Qangli ovulida joylashgan 29-sonli maktabda, Nazarxon ovulidagi 3-sonli maktabda hamda Qipchoq shaharchasidagi 21-sonli Bolalar musiqa va sanʼat maktabida boʻlib oʻtdi. Targʻibotchilar, avvalo, maktablar hayoti bilan yaqindan tanishdilar, oʻquvchilarning taʼlim-tarbiya olishlari uchun maktablarda yaratilgan shart-sharoitlarni katta qiziqish bilan oʻrgandilar. Boʻlib oʻtgan tadbirlarda maktablarning ijodkor, izlanuvchan oʻquvchilarining ijod namunalari, qoʻl mehnatlari mahsullari mehmonlar eʼtiboriga havola qilindi. Madaniy-maʼrifiy tadbirlarda kitob oʻqish, adabiyot va sanʼatning inson hayotidagi ahamiyati, sport bilan shugʻullanishning inson salomatligidagi oʻrni, axborot texnologiyalarining hayotimizga jadallik bilan kirib kelayotgani, ularni oʻrganish zamon talabi ekanligi, yoshlarni har tomonlama qoʻllab-quvvatlashga, yoshlar va xotin-qizlar bandligini taʼminlashga qaratilayotgan eʼtibor xususida soʻz yuritildi.

Taʼkidlanganidek, adabiyot va sanʼat  inson hayotini mazmunli qiladi, maʼnaviy jihatdan boyitadi. Ular insonning goʻzallikka boʻlgan ehtiyojlarini qondirishi barobarida, uning his-tuygʻularini uygʻotadi, ijodiy qobiliyatini rivojlantiradi, ezgulik sari yetaklaydi. Bu bilan insonning maʼnaviy oʻsishiga sharoit yaratadi, ijtimoiy va shaxsiy hayotida eng murakkab muammolarni hal etishga yordam beradi, har bir kishi hayotda oʻz oʻrnini topishiga ham koʻmaklashadi. Buning uchun, eng avvalo, adabiyot va sanʼatni tushunish, u bilan oshno boʻlish lozim. Tadbirlarda ijro etilgan adabiyot va sanʼat namunalari, nafis sheʼrlar, goʻzal kuy-qoʻshiqlar yurtdoshlarimizda koʻtarinki kayfiyat uygʻotdi.

Maʼnaviy-maʼrifiy tadbirlar kunning ikkinchi yarmida Qum yop mahallasidagi 39-sonli maktabda, Besh tom mahallasidagi 24-sonli maktablarda davom ettirildi. Yuqori kayfiyatda oʻtkazilgan tadbirlarda yurtdoshlarimiz mamlakatimizda barcha sohalarda amalga oshirilayotgan keng koʻlamli islohotlar mazmun-mohiyati bilan tanishtirildi. Targʻibot tadbirlarini tashkil qilishdan koʻzlangan asosiy maqsadlarga erishildi.

“Yangi oʻzbekiston – yangicha dunyoqarash” tadbiri koʻp sonli aholi qalbiga quvonch ulashdi. Targʻibot guruhi aʼzolari ham oʻz navbatida maʼnaviy-maʼrifiy tadbirlarning saviyali, koʻtarinki ruhda oʻtishida amaliy yordam koʻrsatgan maktablar jamoalariga va boshqa tashkilotlar masʼullariga oʻz minnatdorchiliklarini bildirdilar.

Charos Arslonova.