OʻZIMIZNING KOSTYa AKA

Tez tibbiy yordam boʻlimi tuman Tibbiyot birlashmasining asosiy boʻlimlaridan hisoblanadi. Bemorga ilk tibbiy yordam koʻrsatish va ilk muolaja aynan shu boʻlim shifokorlari tomonidan amalga oshiriladi. Bemorning holati ijobiy tomonga oʻzgarishi ham tez tibbiy yordam koʻrsatish madaniyatiga bogʻliq.
Hozirgi kunda Tez tibbiy yordam boʻlimi tumanimizning 199 mingdan ziyod aholisiga uzluksiz ravishda, tun-u kun xizmat koʻrsatmoqda. Boʻlimda 15 ta brigada boʻlib, shulardan 4 tasi markaz, yaʼni 1 tasi jonlantirish hamda 3 tasi tarmoq brigadalari hisoblanadi. 11 ta brigada esa tuman hududlaridagi shoxobchalar negizida aholiga tez tibbiy yordam koʻrsatadi.
Tez tibbiy yordam boʻlimi mudiri Konstantin Shabayev ham oʻz zimmasidagi vazifa masʼuliyatini chuqur his etgan holda boʻlim dispetcheridan tortib, mutaxassis shifokorlar, kichik tibbiy va texnik xodimlargacha har bir chaqiriqqa eʼtiborli boʻlish, belgilangan tartib-qoida asosida ish olib borishlari uchun sharoit yaratishga harakat qiladi. Xususan, boʻlimga bir vaqtda kelib tushgan chaqiriqlar boʻyicha birinchi galda ahvoli ogʻir va shoshilinch tez tibbiy yordam talab etiladigan bemorlarga xizmat koʻrsatish yoʻlga qoʻyilgan. Pandemiya sharoitida esa chaqiriqlar koʻpligi inobatga olinib, qoʻshimcha dispetcherlik xizmati tashkil etildi.
Ushbu masʼuliyatli vazifani bajarib kelayotgan tajribali shifokor Konstantin Shabayev amudaryoliklar uchun birday qadrli mehr-shafqat posboniga aylangan, kim uchun “oʻzimizning Kostya”, yana kim uchun “Kostya aka” yoki samimiy doʻst sifatida koʻngillardan joy olgan.
Oʻz orzu-istaklarini amalga oshirish uchun intilgan, oʻqib-izlangan odam, albatta, koʻzlagan maqsadiga yetishadi. Intilish insonni oʻz hatti-harakatlarini nazorat qila bilish, qatʼiyatli boʻlishga oʻrgatadi. Konstantin Shabayev haqida soʻz yuritadigan boʻlsak, asli ziyoli oilada tugʻilib-voyaga yetgan bu insonning orzulari qalbida qatʼiyatga aylanganida hali oʻsmir yoshda edi.
Tumanimizdagi 1-sonli maktabda oʻqituvchi boʻlib ishlaydigan otasi Rafael Shabayev farzandlariga oilaviy tarbiya berish bilan birga ularni hayot saboqlariga chidamli, inson sifatida oriyatli, vatanparvar, oilaparvar, oʻzaro mehr-oqibatli boʻlishga oʻrgatdi. Oila davrasidagi suhbatlarda farzandlarining ham bilimini, ham dunyoqarashini sinovdan oʻtkazardi. Konstantin Shabayev ana shunday maʼnaviy-tarbiyaviy muhitda voyaga yetdi. Oʻz hayot yoʻlini tanlashda adashmadi. Umumtaʼlim maktabini tugatib, Andijon Davlat tibbiyot institutining davolash fakultetiga oʻqishga kirdi. Rus tilini mukammal bilgani, intiluvchanligi tufayli institutdagi tahsil davrida doimo aʼlochi talabalar safida boʻldi. Oʻz yoʻnalishi boʻyicha tibbiyot ilmiga oid adabiyotlarni oʻqishdan, ustozlar tajribasini oʻrganishdan aslo charchamadi. 1992-yilda institutni muvaffaqiyatli tugatgan Konstantin Shabayev Nukus shahridagi koʻp tarmoqli poliklinikada internatura bosqichini oʻtadi.
Ilk mehnat faoliyatini tuman Tibbiyot birlashmasining tez tibbiy yordam boʻlimida navbatchi shifokor sifatida boshlagan Konstantin Shabayev qisqa fursat ichida oʻz fikriga, muolaja uslubiga ega shifokor sifatida tanildi. Konstantindagi xushmuomalalik, oʻz kasbiga fidoyilik va tashkilotchilik qobiliyatini inobatga olgan rahbariyat 2017-yilda uni tez tibbiy yordam boʻlimi mudiri vazifasiga tayinlashdi.
Konstantin Shabayev rahbarlik faoliyatini eng avvalo boʻlim xodimlarining qatʼiy mehnat intizom asosida ishlashini tashkil etishdan boshladi. Chaqiriqlarga vaqtida javob berish, mutaxassis shifokorlar va hamshiralarning belgilangan rejaviy-jadval asosida chaqiriqlar boʻyicha ishlashlari uchun sharoit yaratdi.
Boʻlim rahbari sifatidagi Konstantin Shabayevning faoliyat koʻlami ancha keng. Boʻlimni sifatli dori-darmonlar bilan taʼminlash, avtomashinalarning chaqiriqlarga har bir soniyada soz va tayyor turishi, zamonaviy tibbiy bilimni chuqur oʻzlashtirgan shifokorlar safini va ularning malakasini doimiy ravishda oshirib borishlari uchun shart-sharoitlar yaratish, boʻlimning bir maromda, uzluksiz faoliyat yuritishini taʼminlash kabi vazifalar uning hayot mazmuniga aylangan.
Konstantin Shabayevning oilasi ham ibratli, oʻzaro mehr-oqibatdan rang olgan madaniyatli samimiyat goʻshasi. Umr yoʻldoshi Xosiyatxon ayni paytda Tibbiyot birlashmasining ichki dorixonasida dorishunos sifatida faoliyat yuritmoqda. Qizi Ilmira, oʻgʻli Komiljonlar oliy taʼlim muassasalarida tahsil olishadi. Kenja oʻgʻli Rashidjon esa 30-sonli maktabning aʼlosi oʻquvchisi.
Boʻlim xodimlarining asosiy ish vaqti goh yoʻlda, goh chaqiruv kelib tushgan xonadonlarda oʻtadi. Tushlik, nonushta, kechki taomlanish vaqti degan tushuncha ularning ish jarayoniga unchalik toʻgʻri kelmaydi. Chaqiriqlarga vaqtida yetib borish, bemorga tibbiy yordam koʻrsatishni har bir xodim oʻz burchi deb biladi.
Xalq salomatligini hayotidagi barcha narsadan ustun qoʻyib, fidoyilik bilan mehnat qilayotgan Tez tibbiy yordam boʻlimi fidoyilari doimo sogʻ-omon boʻlsin.

Robiya YOʻLDOShEVA.