Tibbiyot xodimlari kuni munosabati bilan tadbir oʻtkazildi

Azal azaldan xalqimiz tabiblik, shifokorlik kasbi bilan shugʻullanuvchilarni eʼzozlab, ularga hurmat-eʼtibor koʻrsatib keladi. Yurtimizda ushbu soha jonkuyarlarini yanada qoʻllab-quvvatlash maqsadida har yili noyabr oyining ikkinchi yakshanbasi “Oʻzbekiston Respublikasi tibbiyot xodimlari kuni” sifatida belgilanib, ushbu sana shifokorlar bayrami sifatida keng nishonlanib kelinmoqda.

Keyingi yillarda mamlakatimizda aholiga jahon andozalari darajasida, yuqori tibbiy texnologiyalar vositasida birlamchi tibbiy-sanitariya yordamidan tortib, ixtisoslashtirilgan tibbiy xizmat koʻrsatishgacha boʻlgan boʻgʻinni qamrab oluvchi mukammal tizim yaratilgani tufayli hamda tibbiyot sohasi xodimlarining mashaqqatli mehnatlari samarasi oʻlaroq aholining sogʻlom turmush tarzi taʼminlanib, oʻrtacha umr koʻrish koʻrsatkichi uzaydi.

Ushbu sana munosabati bilan 6-noyabr kuni Amudaryo tumani tibbiyot birlashmasida tadbir oʻtkazildi. Unda tuman hokimi oʻrinbosari Mahmud Shermetov ishtirok etib, hokimlik nomidan tuman Tibbiyot birlashmasi xodimlarini kasb bayramlari bilan tabrikladi.

Tadbirda soʻzga chiqqanlar yurtimizda tibbiyot sohasida olib borilayotgan islohotlar xususida toʻxtalib, shifokorlik kasbi eng masʼuliyatli va mashaqqatli kasb ekanligi, ayniqsa, butun dunyoda kechayotgan hozirgi ogʻir pandemiya sharoitida tibbiyot fidoyilari haqiqiy qahramonlik koʻrsatayotganini alohida taʼkidladilar.

Chindan ham, mamlakatimizda bugungi kunda tibbiyot sohasi vakillarining jamiyatdagi oʻrni va maqomini kuchaytirish, ularga nisbatan xalqimiz hurmatini oshirish, munosib mehnat sharoiti yaratish va daromadini koʻpaytirish boʻyicha koʻplab amaliy chora-tadbirlar amalga oshirilmoqda. Soha vakillarining moddiy manfaatdorligini oshirish, samarali ishlashi uchun munosib shart-sharoitlar yaratishga alohida eʼtibor qaratilmoqda. Xususan, Prezidentimizning 2018-yil 7-noyabrdagi “Davlat tibbiyot muassasalari va sogʻliqni saqlashni boshqarish organlari xodimlarini moddiy ragʻbatlantirishni kuchaytirish chora-tadbirlari toʻgʻrisida”gi qaroriga muvofiq, soha xodimlarining mehnatiga haq toʻlash miqdorlari oshirilganligi ana shu eʼtibor samarasidir.

Qolaversa, sohada amalga oshirilayotgan islohotlar natijasida, endilikda tibbiy xizmatning asosiy vazifasi kasalliklarni davolash emas, balki ularning oldini olishga, aholining salomatlik koʻrsatkichlarini yaxshilashga, uzoq umr koʻrishiga hissa qoʻshishga yoʻnaltirilganligi bilan ahamiyatlidir.

Prezidentimiz Shavkat Mirziyoyev 6-noyabr kuni sogʻliqni saqlash tizimining birlamchi boʻgʻinini takomillashtirish hamda aholi oʻrtasida sogʻlom turmush tarzini shakllantirish chora-tadbirlari yuzasidan oʻtkazgan videoselektor yigʻilishida sogʻliqni saqlash tizimini rivojlantirish, soha xodimlarining mehnatini munosib qadrlash, malakali kadrlar tayyorlash, xorijiy tibbiyot markazlari va oliygohlari bilan ilmiy-amaliy hamkorlikni kuchaytirish masalalari davlatimizning doimiy eʼtiborida boʻlishi taʼkidladilar.

Ishonamizki, Abu Ali ibn Sinodek buyuk ajdodlarimizning munosib vorislari, Oʻzbekiston tibbiyot maktabi anʼanalarining davomchilari boʻlgan azizlar shifkorlarimiz olijanob burchlarini bundan buyon ham sharaf bilan ado etajidar.

Tadbirda inson salomatligi uchun masʼul, hayotimiz mazmunli va bardavom boʻlishi uchun jon kuydirayotgan, oʻzini qoʻyib, boshqalarga hayot baxshida qilishga qasam ichgan va fidoyi bir guruh tibbiyot xodimlari tuman hokimligi tomonidan munosib ragʻbatlantirildi. Namunali tibbiyot xodimlari faxriy yorliq hamda esdalik sovgʻalari bilan taqdirlandi.

Fursatdan foydalanib barcha tibbiyot xodimlarini kasb bayramlari bilan muborakbod etamiz.

Tuman hokimligining Axborot xizmati.