PILLAKORLARIMIZ YeTIShTIRGAN HOSIL – MANGʻITDA QAYTA IShLANMOQDA

Mamlakatimiz iqtisodiyotni rivojlantirishning muhim sharti hisoblanmish eksportbop, xaridorgir mahsulotlar ishlab chiqarish va sotishni yoʻlga qoʻyish boʻyicha amalga oshirilayotgan tizimli ishlar bugungi kunda oʻzining ijobiy samaralarini berayapti.

“Oʻzipaksanoat” uyushmasiga qarashli “Jayhun Silk” masʼuliyati cheklangan jamiyati pillakorlarimiz yetishtirgan mahsulotni tumanning oʻzida qayta ishlashmoqda. Amudaryo tumanidan tashqari Qoraqalpogʻiston Respublikasining Beruniy, Xoʻjayli, Taxiatosh, Shumanay, Qanglikoʻl, Nukus, Kegeyli va Chimboy tumanlari pillakorlari yetishtirgan pilla hosili ham aynan “Jayhun Silk” korxonasida qayta ishlanadi va ipak tolasi holida eksport qilinadi. Korxona bu jarayonlarni amalga oshirish uchun yangi, zamonaviy texnologiyalar bilan jihozlangan. Bu yildan boshlab mazkur korxona quruq pillani qayta ishlab, xom ipak ip ishlab chiqarishga ixtisoslashtirildi.

Mazkur masʼuliyati cheklangan jamiyat tomonidan joriy yilning bahorida tumanimizdagi 1572 nafar kasanachilarga 1575 quti, 266 ta fermer xoʻjaliklariga 2193 quti ipak qurti urugʻi yetkazib berilib, 208 tonna hosil yetishtirish yuzasidan shartnomalar tuzilgan edi. Belgilangan xorijiy ipak qurti urugʻlari tumanimizdagi 16 ta inkubatoriyalarda sifatli jonlantirildi va tarqatildi.

Ipak qurti boqish mavsumini koʻp yillik tajribalar va zamonaviy ilm-fan yutuqlari asosida tashkil etgan pillakorlar joriy yilgi mavsumda ham kunni tunga ulab, fidokorona  mehnat qildilar va zimmalaridagi rejalarini ortigʻi bilan ado etdilar. Mavsum davomida Mangʻit shahridagi pillaxonada 50 nafar, Xitoy ovulidagi pillaxonada 20 nafar ishsiz fuqarolar mavsumiy ish bilan taʼminlandi.

“Jayhun Silk” masʼuliyati cheklangan jamiyatida 100 nafardan ortiq ishchi-xodimlar ish bilan taʼminlangan boʻlib, ayni paytda u yerda yetishtirilgan quruq pilladan xom ipak ishlab chiqarish jarayonlari qizgʻin kechmoqda. Xodimlar har kuni ishxonaga kirib kelishida masofadan turib, harorati oʻlchanadi va sogʻlomligi aniqlangach, ichkariga kiritiladi.

Ishchilar avvalo pillalarning sifatiga qarab, saralashadi. Saralangan pillalardan zamonaviy texnologiyalar yordamida ip olinadi va qadoqlanadi.

Masʼuliyati cheklangan jamiyatda joriy yilning koʻklamida ipak qurti boqish mavsumida Beruniy, Xoʻjayli, Taxiatosh, Shumanay, Qanglikoʻl, Nukus, Kegayli va Chimboy tumanlari pillakorlari yetishtirgan pilla hosili ham qabul qilinib, qayta ishlash uchun gʻamlab qoʻyildi.

Shuningdek, kelgusi yilda ham tumanimizda yuksak pilla xirmoni bunyod etish uchun zamin yaratildi. Ipak qurtiga moʻl ozuqa zahirasini yaratish uchun bahorda oʻtqazilgan 343 ming dona tut koʻchatlari shu kunlarda sifatli parvarish qilinmoqda.

Pillachilik – qadim-qadimdan yetti xazinaning biri, deya baholangan va ayni kunda ham qishloq xoʻjaligining muhim tarmogʻi hisoblanadi. Shu bois soʻnggi yillarda sohani ilm-fan yutuqlari asosida rivojlantirishga yanada koʻproq eʼtibor berilmoqda. Tumanimizda ham yetishtirilgan hosilni qayta ishlash yoʻlga qoʻyilgani va mahsulotning eksport qilinishi sohani yana ham daromadli qilishi tayin.

O.RAJABOVA.