OLMAZOP MAHALLASIDA YaNGI SPOPT MAYDONChASI OʻZ FAOLIYaTINI BOShLADI

Mamlakatimizda iyun oyi “Yoshlar oyligi” deya eʼlon qilinib, ushbu oylik doirasida qator madaniy-maʼrifiy tadbir va loyihalar amalga oshirilmoqda.
Oʻzbekiston Yoshlar ittifoqi tuman Kengashi ham mazkur oylik doirasida, shuningdek, davlatimiz rahbarining yoshlarimizning buyuk kelajak egalari boʻlib voyaga yetishlari yoʻlida ilgari surgan 5 ta muhim tashabbusni yoshlar orasida keng targʻib qilish maqsadida samarali ishlarni amalga oshirmoqda.
Xususan, tumanimiz yoshlarining sportga boʻlgan qiziqishlarini yanada oshirish, sogʻlom va barkamol avlodni shakllantirishga hissa qoʻshish maqsadida “Yoshlar oyligi”da tumandagi Olmazor mahallasi hududida yana bitta sunʼiy qoplamali mini futbol sport maydonchasi oʻz faoliyatini boshladi. Tashabbuskor yosh tadbirkorning tadbirkorlik loyihasi qoʻllab-quvvatlanib, “Yoshlar – kelajagimiz” Davlat dasturi asosida 1450 metr kvadrat yer maydoni ajratildi. Qolaversa, “Har bir oila – tadbirkor” Davlat dasturi doirasida 223 mln. imtiyozli kredit ajratilib, yosh tadbirkor Sanjar Qozoqboyevning yangi tadbirkorlik faoliyati yoʻlga qoʻyildi.
Mazkur tadbirkorlik loyihasi asosida tashkil qilingan “Diyor Best Kompleks” MChJda 3 ta yangi ish oʻrni yaratilib, yoshlar bandligi taʼminlandi.
Shu oʻrinda taʼkidlash kerakki, soʻnggi yillarda mamlakatimizda yoshlarning intellektual va ijodiy salohiyatini namoyon qilish, ularning fuqarolik javobgarligini va olib borilayotgan islohotlarga daxldorligini oshirish borasida ulkan ishlar amalga oshirildi. Shu bilan birga, joylarda yoshlarning ijtimoiy-iqtisodiy faolligini oshirishga, ularni tadbirkorlik faoliyatiga keng jalb qilishga, yosh tadbirkorlarning istiqbolli gʻoyalari va loyihalarini roʻyobga chiqarishga, shuningdek, shu asosda yoshlar bandligini taʼminlashga katta eʼtibor qaratilib, keng imkoniyat hamda sharoitlar yaratilmoqda.
Xususan, yoshlar tadbirkorligini kompleks rivojlantirish va yoshlarni tadbirkorlik faoliyati bilan shugʻullanishga faol jalb qilish boʻyicha joylarda maqsadli dasturlar amalga oshirilib, yangi ish oʻrinlari yaratilmoqda. Jumladan, “Yoshlar - kelajagimiz”, “Har bir – oila tadbirkor” Davlat dasturlari ham ushbu maqsadlarga xizmat qilmoqda.
Mazkur dasturlar doirasida tumanimizda oʻtgan yillar mobaynida ham samarali ishlar amalga oshirilgan. Xususan, “Yoshlar - kelajagimiz” Davlat dasturi doirasida 2019-yilda 25 ta loyihaga 9 mlrd. 401 ming 200 soʻmlik kredit mablagʻlari ajratilib, 165 ta yangi ish oʻrinlari yaratildi. Dastur doirasida 12 nafar yosh tadbirkorlarga ishlab chiqarish va maishiy xizmat koʻrsatish sohalarini rivojlantirish maqsadida maishiy xizmat koʻrsatish va boshqa qurilishlar uchun yer maydonlari ajratib berilgan.
Shuningdek, joriy yilning shu davriga qadar, «Yoshlar - kelajagimiz” dasturiga asosan 15 ta loyihaga jami 3 mlrd 800 mln soʻm kredit mablagʻlari ajratildi. Mazkur loyihalar asosida 57 ta yangi ish oʻrni yaratilib, yoshlar bandligi taʼminlandi.
Yoshlar – yurt kelajagi. Ular tashabbuskorligi va barcha yutuqlari bilan mamlakatni taraqqiyot sari yetaklaydi. Shu bois navqiron avlod vakillari har tomonlama qoʻllab-quvvatlansa, jismonan sogʻlom, vatanparvar va fidoyi etib tarbiyalansa ertangi kunimizning poydevori shuncha mustahkam boʻlib boraveradi.

Tuman hokimligi Axborot xizmati.