Amudaryolik gʻallakorlar Qoraqalpogʻistonda birinchilardan boʻlib shartnomaviy rejalarini ortigʻi bilan bajardi

Amudaryolik fermerlar har yilgi anʼanalariga sodiq qolgan holda bu yil ham Qoraqalpogʻistonda birinchilardan boʻlib davlatga gʻalla topshirish boʻyicha shartnomaviy rejalarini ortigʻi bilan bajardilar. Navbatdagi lavhamiz shu xususida.

Amudaryo tumanida 2020-yil hosili uchun 332 ta fermer xoʻjaliklari hamda qishloq xoʻjaligi korxonalari tomonidan 3350 gektar maydonga gʻalla ekilib, davlatga jami 7303 tonna gʻalla yetkazib berish boʻyicha kontraktatsiya shartnomalari tuzilgan edi. Shundan 14 ta fermer xoʻjaliklarida 279,3 gektar maydonda urugʻlik gʻalla ekilib, 838 tonna urugʻlik don yetishtirish rejalashtirildi. Dalalarni begona oʻtlardan tozalash, sugʻorish, oziqlantirin, suspenziya qilish va boshqa agrotexnik tadbirlar oʻz vaqtida amalga oshirilgani bois bugʻdoyzorlarda moʻl hosil toʻplandi.

Hosilni qisqa muddatlarda oʻrib-yigʻib olish boʻyicha tuman shtabi hamda 16 ta oʻrim-yigʻim otryadlari tashkil etildi. Oʻrim otryadlariga jami 16 ta don  oʻrish kombayinlar biriktirilib, ushbu  kombaynlar  soz holatga  keltirildi hamda mavsum davomida tinimsiz ishlashini taʼminlash maqsadida  ehtiyot qismlar zahiralari yaratildi.

Mavsum davomida 54 ta  yuk  avtomobillari, 72 ta  transprot traktorlari, 144 ta tirkamalar, 16 ta koʻchma taʼmirlash ustaxonalari, 16 ta  yoqilgʻi  tashish agregatlaridan samarali foydalanildi.

Oʻrim-yigʻim ishlarining uyushqoqlik bilan tashkil qilinishi natijasida amudaryolik gʻallakorlar 20-iyun holatiga jami 7500 tonnaga yaqin gʻalla topshirib, shartnomaviy rejalarini ortigʻi bilan ado qildilar.

Tumanimiz gʻallachilik xoʻjaliklarida moʻl hosil yetishtirilishida sektorlar rahbarlari tomonidan olib borilgan nazorat tadbirlari ham muhim ahamiyat kasb etdi.

Tuman hokimi Sultonboy Yoʻldashev rahbarligidagi 1-sektor hududiga kiruvchi hududlarda qishloq xoʻjaligi sohasi mutaxassislari tomonidan har bir dalaning xoʻjalik xaritasidagi oʻrni, meliorativ holati puxta oʻrganilib, barcha agrotexnik tadbirlar sifatli olib borildi. Xususan, Qipchoqlik gʻallakorlar 2020-yil hosili uchun 163 gektar yerga kuzgi bugʻdoy ekdilar. Oʻz vaqtida oziqlantirilib, barcha agrotexnik tadbirlar maromida oʻtkazilgan dalalarda hosil moʻl boʻldi. “Jumaniyazov Arzimbat”, “Haytimbetov Sulton”, “Tursunboyeva Umida” “Ismoilov Poʻlatbek”, “Oʻrozboyev Doston” fermer xoʻjaliklarida oʻrim-yigʻim ishlari  tumanda birinchilar qatorida boshlab yuborildi va mazkur xoʻjaliklarning har birida hosildorlik gektar boshiga 60-70 tsentnerga yetkazildi. Jami bugʻdoy ekilgan 163 gektar yerning har gektaridan koʻtarilgan xirmon oʻrtacha 30-32 tsentnerdan toʻgʻri keldi va qipchoqliklar jami 1100 tonnadan ortiq hosil yetishtirib, shuning rejadagi 343 tonna oʻrniga 432 tonnasini qabul maskaniga topshirdi va rejani 125 foizga bajarishdi.

Shuningdek, Xitoy ovuli gʻallakorlari 430 tonna gʻalla topshirib, rejani 124 foizga, Qanglilik gʻallakorlar 512 tonna hosil topshirib, shartnomani 114 foizga, Qilichboyliklar 692 tonna hosil bilan shartnomani 114 foizga, Boʻz yop ovulidagi fermerlar 489 tonna hosil topshirib, rejani 108 foizga, Toʻlqinlik gʻallakorlar esa 554 tonna hosil topshirib, rejani 105 foizga bajardilar. Bundan tashqari, Turkmaniston, Doʻrman ovullarida faoliyat yuritayotgan fermer xoʻjaliklari ham gʻalladan moʻl hosil yetishtirishga muvaffaq boʻldilar.

Bu yil davlat resurslariga boshoqli don xarid qilish uchun qoʻshimcha qiymat soligʻi bilan birgalikda 1 tonna bugʻdoy uchun 2 mln. 543 ming 180 soʻm narx belgilandi. Bu esa fermer xoʻjaliklarining moddiy manfaatdorligini oshirishga turtki boʻldi.

Ayni kunda Amudaryo tumanidagi barcha fermer xoʻjaliklarining gʻalladan boʻshagan maydonlarini takroriy ekin ekishga tayyorlash ishlari jadallik bilan olib borilmoqda.

Fursatdan foydalanib, amudaryolik gʻallakorlarni mehnat zafari bilan samimiy muborakbod etamiz!