Pillachilik - daromad manbai

Tumanimizda ipak qurti boqib, pilla yetishtirayotgan va daromad olayotgan yurtdoshlarimiz talaygina. Xususan, Toʻlqin ovulida yashovchi Azima Oʻrozboyeva oila aʼzolari bilan birgalikda 20 gramm ipak qurtini parvarishlab, pilla yetishtirmoqda. Pillakorning 7-may kuni olgan ipak qurti shu kunga qadar toʻrtinchi uyquga kirdi.

Ipak qurti boqish juda katta, mehnat hamda masʼuliyat talab qilishi bois, uni parvarishlashga koʻp qoʻl kuchi kerak boʻladi. Azima Oʻrozboyeva turmush oʻrtogʻi hamda farzandlari bilan birgalikda ushbu mashaqqatli ishning uddasidan chiqishmoqda. Har yili rejadagi pillani ortigʻi bilan topshiradigan pillakor Azima Oʻrozboyevaning bu yilgi hosildan ham umidi katta.

Ovulning ana shunday mehnatsevarlaridan biri Qunduz Sultonova ham ipak qurti parvarishi bilan shugʻullanmoqda. Oilaviy pilla yetishtirish ishiga kirishgan yurtdoshlarimiz bu yilgi rejani ortigʻi bilan bajarish hamda koʻproq daromad olish niyatida kecha-yu kunduz tinimsiz mehnat qilishmoqda. U oila aʼzolari bilan 8-may kuni olingan 15 gramm ipak qurtidan moʻl hosil olish maqsadida astoydil ter toʻkmoqda.

Shu oʻrinda taʼkidlash joizki, yurtimizda ipakchilik sohasini yanada rivojlantirishga katta eʼtibor qaratilmoqda. Mamlakatimizning iqlim sharoiti va mavjud salohiyati qishloq xoʻjaligining har bir tarmogʻi kabi pillachilikni ham yanada rivojlantirishda muhim omildir. Yaratilayotgan imkoniyatlardan samarali foydalanish, qishloq joylarda aholi bandligini taʼminlash, tarmoqning eksport salohiyatini oshirish, jahon bozorida ipak mahsulotlarimizning salmogʻini koʻpaytirish va ularning raqobatdoshligini oshirish uchun davlatimiz rahbariyati tomonidan bir qancha amaliy ishlar olib borilmoqda.

Prezidentimizning joriy yil 17-yanvardagi “Pillachilik tarmogʻida ipak qurti ozuqa bazasini rivojlantirish boʻyicha qoʻshimcha chora-tadbirlar toʻgʻrisida”gi Qarori mamlakatimizda pilla yetishtirishni koʻpaytirish va uning sifatini yaxshilashda muhim dasturilamal boʻlib xizmat qilmoqda.

Ushbu qarorda pillachilik sohasi korxonalarini moliyaviy qoʻllab-quvvatlash, modernizatsiya qilish, ozuqa bazasini mustahkamlash, pilla yetishtirish hajmini koʻpaytirish, uni qayta ishlash va tayyor mahsulotlar ishlab chiqarishni keng yoʻlga qoʻyish maqsadida 2023-yil 1-yanvargacha mazkur yoʻnalishdagi korxonalar yagona soliq, yagona ijtimoiy toʻlovdan ozod qilinishi koʻzda tutilgan.

Shuningdek, kasanachilarning jismoniy shaxslarga hisoblanadigan daromad soligʻidan ozod qilinishi, pilla boquvchilar va kasanachilarning pilla mavsumidagi davrda bajargan ishlari ularga pensiya tayinlashda bir yillik ish staji deb hisoblanishi alohida belgilab qoʻyilgan. Ushbu imtiyozlar pillachilik sohasi, ipak qurti urugʻi va pilla yetishtiruvchilar, ikkinchi tomondan pillani qayta ishlash va tayyor mahsulotlar ishlab chiqarish sanoati uchun katta imkoniyat va qulayliklar yaratib beradi. Natijada pilla yetishtirish bilan band aholining moddiy manfaatdorligi ortadi.

Pilla – bu daromad manbai. Hozirgi kunda bir quti ipak qurti boqqan oila 2 million soʻmga yaqin daromad olishga imkoniyati boʻladi. Bandlikka koʻmaklashish markazi tomonidan 1 quti ipak qurti parvarishlagan boquvchilarga pilla yetishtirishdan olingan daromaddan tashqari 200 ming soʻmdan qoʻshimcha haq olishi belgilangan.

Hozirda mazkur imkoniyatlardan samarali foydalanayotgan Toʻlqin ovulidagi 133 nafar kasanachiga jami 228 quti ipak qurti parvarishlab pilla yetishtirish uchun berilgan boʻlib, pillakorlarning ipak qurtlari uch yoki toʻrt yoshiga kirgan, ish ayni qizigan palla.  Tumanimizdagi barcha pillakorlar oʻzlari kutgan moʻl hosilni olib, rejani ortigʻi bilan bajarishlariga ishonamiz.

Charos Arslonova, tuman hokimligining Axborot xizmati.