AMUDARYoDA ChIGIT EKISh IShLAPI QIZGʻIN OLIB BOPILMOQDA

Mehnatkash xalqimiz uchun har yili bahor fasli turli sinovlar bilan kechadi. Baʼzan tabiat injiqliklari, sel-u yomgʻirli kunlar meʼyordan oshib ketsa, baʼzan aksi – qurgʻoqchilik dehqonning  irodasini sinovdan oʻtkazadi. Bu yil esa...
Bahorning erta kelganidan quvonib, katta-katta, salmoqdor rejalar tuzgan bobodehqon misli koʻrilmagan sinovga roʻbaroʻ keldi. Butun dunyo xalqlarini zir titratgan koronavirus pandemiyasi tufayli 23-martdan mamlakatimizda karantin holatining joriy qilinishi tufayli ekin-tikin ishlarini olib borishda oʻta ehtiyotkorlik bilan yondashishni taqozo etmoqda. Xususan, ekish mavsumida ishtirok etadigan har bir ishchi, muhandis-texnik xodimlarning salomatligini muhofaza etish maqsadida ularni zarur tibbiy buyumlar, antiseptik vositalar bilan taʼminlashga alohida eʼtibor berildi.

Avvalo, chigit ekish mavsumiga puxta hozirlik  koʻrilib, 65 ta otryad tuzildi. Mazkur otryadlar ixtiyoridagi 211 dona seyalka agregatlari mavsumga taxt qilib qoʻyildi. Ayni kunda tumanimiz boʻyicha 64 ta otryad chigit ekish ishlarida toʻla quvvat bilan ish olib bormoqda. 156 ta seyalka agregati kunlik rejada belgilangan gektarlarda samarali ishlatilmoqda.

Bu yilgi mavsumda tumanimizda 362 ta fermer xoʻjaliklari tasarrufidagi umumiy 15 ming 250 gektar maydonga  chigit ekish rejalashtirilgan. Shundan 9650 gektar maydonga 60 sm kenglikda va 5600 gektar maydonga qoʻshqatorlab chigit ekiladi. Buning uchun 1100 tonna sifatli urugʻlik chigit tayyorlab qoʻyildi. Yerlarni ekishga tayyorlashda qatnashayotgan 149 ta texnikadan samarali foydalanilayotgani tufayli kuniga 1016 gektardan, mavsum boshidan esa 14-aprel holatiga rejadagi 7107 gektar oʻrniga 8143 gektar yer chigit ekish uchun taxt qilib qoʻyilgani  uchun ish surʼati yuqori boʻlmoqda.

Ayni kungacha tumanimiz fermer xoʻjaliklari  dalalariga kuniga 813 gektar maydonga sifatli baraka urugʻi qadalmoqda. Tumanimiz boʻyicha mavsum boshidan beri salkam 6000 gektar  yerga chigit ekildi. Buning uchun kuniga 58,5 tonnadan, mavsum boshidan beri jami 409,9 tonna urugʻlik chigit sarflandi.

Mavsum yumushlari Xitoy ovulidagi “Qahramon Oʻrozimbetov” fermer xoʻjaligi dalalarida uyushqoqlik bilan olib borilmoqda. Mazkur fermer xoʻjaligi dehqonlari bu yilgi mavsumda 67 gektar yerga chigit ekishni  rejalashtirishgan.  Xoʻjalik yerlari 34 nafar ijarachiga boʻlib berilgani tufayli barcha maydonlar oʻz vaqtida qondirib sugʻorildi. Tobiga kelgan dalalar peshma-pesh haydalib, chigit ekish ishlari jadallik bilan olib borilmoqda. Bunda TTZ-100 rusumli traktor haydovchisi  Zamir Sobirov va seyalka agregati kuzatuvchi ishchisi Oybek Otamurodovlarning mehnati tahsinga loyiq. Chigit ekiladigan  qatorlarning toʻgʻri sifatli boʻlishi, chigitning uyalarga aniq va bexato tushishi traktorchi bilan seyalka agregati ishchisining mahoratiga bogʻliq. Agregatga urugʻlik chigitni yetkazib berishda esa Xurshid Abdullayevning xizmati katta boʻlmoqda. Mazkur fermer xoʻjaligining 18 gektar maydondagi kuzgi bugʻdoyi ham moʻl hosil nishonalarini koʻrsatib, baravj oʻsmoqda.

***

Doʻrman ovulidagi “Maʼmura Maxsad” fermer xoʻjaligi dehqonlari ham chigit ekish ishlarini aniq va puxta reja asosida tashkil etganlari bois, bu boradagi barcha yumushlar risoladagiday olib borilmoqda. Mavsumda 70 gektar maydonga chigit ekishni rejalashtirgan xoʻjalik dehqonlari ayni kunlarning  har bir lahzasidan unumli foydalanmoqdalar. Fermer xoʻjaligi raisi Karimboy Xolmurodov rahbarligida ish olib borgan 25 nafar ijarachi-dehqonlar zimmalaridagi bahorgi agrotexnik tadbirlarni oʻz vaqtida, sifatli bajarganlari bois, ekin-tikin ishlari jadal boshlab yuborildi.

Ayni kunlarda xoʻjalik dalalarida chigit ekish uyushqoqlik bilan olib borilmoqda. Traktorchi Xudoybergan Pajabov, seyalka agregati kuzatuvchi ishchilari Xayrulla Xoʻjamurodov va Shokir Bozorboyevlar kunlik ish unumining yuqori boʻlishini taʼminlashmoqda.

Pobiya YOʻLDOShEVA.