6-mart kuni ayol-qizlar oʻrtasida sport musobaqalari tashkil qilindi

Ayol-qizlar salomatligini mustahkamlash, oilalarda ijtimoiy-maʼnaviy muhit barqarorligini taʼminlashda sportning ahamiyati katta. Sport – qizlar salomatligini mustahkamlash bilan birga ularning dunyoqarashini kengaytirib, tibbiy madaniyatini yuksaltirmoqda. Mashgʻulotlarda toblangan qizlar oila, jamiyat, Vatan oldidagi masʼuliyatini teran anglab, sogʻlom va baxtli turmush qurmoqda.

Shu yil 6-mart sanasida tumanimizdagi 16-sonli ixtisoslashtirilgan davlat  umumtaʼlim maktabining sport zalida ayol-qizlar oʻrtasida sport musobaqasi tashkil etildi. Ushbu musobaqa “Ilm, maʼrifat va raqamli iqtisodiyotni rivojlantirish  yili”  dasturini amalga oshirish,  oʻqituvchi, murabbiylar va boshqa xodimlarni  sport turlariga kengroq jalb qilish,  xodimlarning  faolligini oshirish va salomatligini mustahkamlash, ularning sport bilan shugʻullanishiga imkoniyat va sharoit yaratish maqsadida tashkil qilindi.

Tuman Xalq taʼlimi boʻlimiga qarashli umumtaʼlim maktablari, maktabgacha taʼlim muassasalarida faoliyat yuritayotgan ayol-qizlar ushbu musobaqalarda sportning voleybol, 100 metrga yugurish, stol tennisi, shaxmat va shashka turlari boʻyicha oʻzaro kuch sinashdilar.

Aytish joizki, mamlakatimizda sogʻlom va barkamol avlodni tarbiyalash, yoshlarning ijodiy, intellektual salohiyatini roʻyobga chiqarish, komil, har tomonlama yetuk insonlar qilib voyaga yetkazish maqsadida yetarli shart-sharoitlar va imkoniyatlar yaratilmoqda. Mamlakatimizning barcha hududlarida zamonaviy sport komplekslari, jumladan, gimnastika zallari, tennis kortlari, suzish havzalari, fitnes zallari bunyod etilgani, ularda xotin-qiz murabbiylar faoliyat yuritayotgani, qizlar oʻrtasida sportning ommalashishida muhim omil boʻlmoqda. Qurib bitkazilgan va rekonstruktsiya qilinayotgan sport inshootlari, mamlakatimizda ishlab chiqarilayotgan sport anjomlarning chekka-chekka qishloqlargacha yetkazib berilayotganligi farzandlarimiz, ayniqsa, xotin-qizlarimizning maʼnan va jismonan barkamol boʻlib tarbiyalanishida muhim omil boʻlib xizmat qiladi.

Tadbirda xotin-qizlar oʻrtasida sportni ommalashtirish, ularni jismoniy tarbiya va sportga keng jalb etish, ayol murabbiyalar safini kengaytirishga alohida eʼtibor qaratilayotgani taʼkidlandi. Zero, xotin-qizlarni sportga jalb etish, nafaqat ular salomatligida, balki kelajakda farzandlari sogʻlom boʻlib tugʻilishi va ulgʻayishida muhim ahamiyatga ega.

Oʻtkazilgan sport musobaqalarining yakuniy natijalariga koʻra sportning shaxmat turi boʻyicha 22-sonli umumtaʼlim maktabi oʻqituvchisi Pavshanoy Paimova, shashka boʻyicha 65-sonli umumtaʼlim maktabi oʻqituvchisi Payhon Gaipova, stol tennis turi boʻyicha 56-sonli umumtaʼlim maktabi oʻqituvchisi Dilshoda Pajapova, 100 metrga yugurish boʻyicha 19-sonli umumtaʼlim maktabi oʻqituvchisi Shukurjon Jumamurodova, sportning darts turi buyicha 19-sonli umumtaʼlim maktabi oʻqituvchisi Muhabbat Shamayevalarga faxrli 1-oʻrin nasib qildi. Shuningdek, musobaqada ayol-kizlar jamoalari oʻrtasida oʻtkazilgan voleybol sport turi boʻyicha faxrli 1-oʻrinni 28-sonli umumtaʼlim maktabi jamoasi egalladi.

Sport musobaqalari qizgʻin bahslarga boy boʻldi. Musobaqalar mobaynida taʼlim sohasida faoliyat olib borayotgan ayol-qizlarning sportga boʻlgan qiziqishlari yanada ortdi.

  Musobaqa gʻoliblari Taʼlim, fan va madaniyat xodimlari kasaba uyushmasi  tuman Kengashi tomonidan “Faxriy yorliq” va esdalik sovgʻalar bilan takdirlanishdi.

U.Abdurahmonov, Taʼlim, fan va madaniyat xodimlari  kasaba
 uyushmasi tuman Kengashi raisi.