TUMANIMIZ FUTBOLChI QIZLARI OChIQ BIRINChILIK GʻOLIBI VA SOVRINDORI BOʻLIShDI

Mini futbol sporti qizlar oʻrtasida ham ommalashtirilib, turli chempionatlar oʻtkazila boshladi. Aytish joizki, koʻpchilik mini futbol va futzalni adashtirishi mumkin. Aslida ular orasida farq anchagina. Mini futbolga qaraganda futzalda oʻyinchilar soni kamroq, oʻyin qoidalari ham birmuncha farq qiladi.

Yaqinda 7-mart kuni oʻquvchi-qizlar oʻrtasida mini futbol boʻyicha Qoraqalpogʻiston ochiq birinchiligi musobaqalari oʻtkazildi. Sogʻlom turmush tarzini shakllantirish, doʻstona aloqalarni yaxshi yoʻlga qoʻyish, futbol oʻyinini ommalashtirish, iqtidorli sportchi qizlarni aniqlab, respublika terma jamoasiga saralab olish, ularning mahoratini oshirish maqsadida oʻtkazilgan mazkur chempionatda 12 va 14 yoshdagi qizlar qatnashishdi.

Musobaqaning tumanimizda, Amudaryo qishloq xoʻjalik kasb-hunar kolleji binosi yonidagi sunʼiy qoplamali mini futbol maydonchasida oʻtkazilganligi ham bejiz emas. Avvalo bu borada tumanimizda ibratli ishlar olib borilayotganini va oʻquvchi-qizlarning ushbu sport turi bilan muntazam shugʻullanishlari uchun sharoitlar yaratilganini taʼkidlash joiz. Tumanimizning barcha ovul va mahallalarida sunʼiy qoplamali mini futbol maydonchalari tashkil etilgan boʻlib, yoshlar bu yerda mini futbol  sport turi bilan muntazam shugʻullanib kelishmoqda. Shuningdek, maktablarda ham jismoniy tarbiya fani  murabbiylari fidoyi mehnat qilishib, mini futbol sport turining ommalashuvi va rivojlanishiga munosib hissa qoʻshishmoqda. Oʻquvchilarning iqtidori, mahoratini oshirishga harakat qilishmoqda.

Qoraqalpogʻistonning tumanlari va shaharlaridan tashrif buyurgan 100 nafardan ziyod  futbolchi qizlar ishtirok etgan musobaqa natijalari ham buni yaqqol ifodalaydi. Bahslar juda keskin va murosasiz oʻtdi. Hakamlar hayʼati aʼzolari, murabbiylar va koʻpsonli tomoshabinlar ularning oʻyinini qiziqib tomosha qilib turdilar. Mini futbol musobaqasida ishtirok etgan sportchi qizlar oʻz jamoasi gʻolibligi uchun bor imkoniyatini ishga solib, harakat qildilar.

Ha, har qanday musobaqada eng iqtidorli, eng zoʻr, eng kuchli ishtirokchi gʻolib boʻlishi aniq.

Qoraqalpogʻiston Respublikasi Jismoniy tarbiya va sport vazirligi tashabbusi bilan tashkillashtirilgan ochiq birinchilik musobaqasida 12 yoshli qizlar oʻrtasida 1-oʻrinni tuman Bolalar-oʻsmirlar sport maktabi futbolchi qizlar jamoasi, 2-oʻrinni nukuslik qizlar jamoasi, 3-oʻrinni esa 41-sonli umumiy taʼlim maktabi jamoasi yengib oldilar.

Chempionatning 14 yoshli qizlar oʻrtasidagi musobaqalari ham murosasiz va qizgʻin kurashlar ostida kechdi. Natijalarga koʻra, tumanimiz Bolalar-oʻsmirlar sport maktabi futbolchi qizlar jamoasi faxrli 1-oʻrin, 41-sonli maktab oʻquvchilari jamoasi 2-oʻrinni, Boʻzatov va Kegeyli tumanlari Bolalar-oʻsmirlar sport maktablari futbolchi qizlari jamoalari esa 3-oʻrinlarni egalladilar.

Ochiq birinchilik gʻoliblari va sovrindorlari Qoraqalpogʻiston Respublikasi Jismoniy tarbiya va sport vazirligining diplom va sovgʻalari bilan taqdirlandilar.

 Oʻtkazilgan bu ochiq birinchilik musobaqasi kelgusida mazkur sport turining yana ham ommalashishiga va rivojlanishiga yoʻl ochadi.

O.RAJABOVA.