Amudaryoda Oʻzbekiston Pespublikasi Favqulodda vaziyatlar vazirligi xodimlari profilaktik tadbir oʻtkazishdi

Ob-havo haroratining pasayib borishi natijasida gaz va boshqa turdagi muqobil yoqilgʻi isitish moslamalaridan foydalanishga boʻlgan ehtiyoj ortib boradi. Bunday paytlarda isitish moslamalaridan notoʻgʻri foydalanish oqibatida yongʻinlar hamda is gazidan zaharlanishlarga doir favqulodda hodisalar sodir boʻlib, insonlarning hayoti xavf ostida qoladi.

Mamlakatimizda shu kabi favqulodda holatlarning oldini olish yuzasidan FVV tomonidan keng koʻlamli profilaktik tadbirlar amalga oshirilmoqda.

Tumanimizda ham favqulodda sodir boʻladigan hodisalarning oldini olish, shunday vaziyatlarda xavfdan saqlanish, atrofdagilarga ham yordam koʻrsatish choralarini tushuntirish boʻyicha profilaktik tadbir oʻtkazildi. Tadbirda Oʻzbekiston Pespublikasi Favqulodda vaziyatlar vazirligidan polkovnik Sardor Atamuhamedov, tuman Favqulodda vaziyatlar boʻlimi xodimlari, tuman gaz va elektr tarmoqlari korxonasi xodimlari hamda aholi vakillari ishtirok etdilar. Profilaktik tadbirlar doirasida masʼullar, aholi yashash joylarida tabiiy va is gazidan zaharlanish, yongʻinlar, quturish kasalligi va boshqa favqulodda holatlarning oldini olish maqsadida tumandagi Navoiy hamda Boʻston mahallalaridagi xonadonlarda aholining yashash sharoitlari bilan yaqindan tanishdilar.

Maʼlumot tariqasida aytish kerakki, shu davrga qadar tuman hududida 49 ta mahallada is gazidan zaharlanishning oldini olish boʻyicha 49 ta tushuntirish- targʻibot tadbirlari tashkil qilinib, 12466 ta aholi xonadonlarining yongʻinga qarshi holati oʻrganib chiqilgan. Oʻrganishlar natijasida 809 ta kamchilik holati aniqlanib, 714 tasi joyida bartaraf etilgan hamda 24 ta fuqarolarga tabiiy resurslardan qonun doirasida foydalanmaganligi sababli maʼmuriy javobgarlik belgilangan.

Tadbir davomida tabiiy gazning toʻliq yonmasligi, bexosdan uzilib qolishi, xona ichida toʻplanishi, yoqib qarovsiz qoldirish, ulashda xavfsizlik qoidalariga rioya qilmaslik oqibatida portlash, yongʻin, hamda tabiiy va is gazidan zaharlanish holatlari bilan bogʻliq sodir boʻlayotgan favqulodda vaziyatlar haqida soʻz yuritildi. Bunday holatlar hatto insonlarning turli xil tan jarohati olishi yoki oʻlimi bilan yakunlanayotganligi ham qayd etildi.

Shuningdek, aholi oʻrtasida is gazidan zaharlanish hamda havo-gaz aralashmasi chaqnashi bilan bogʻliq favqulodda vaziyatlarning oldini, ularning bu boradagi savodxonligini oshirish maqsadida oʻtkazilgan targʻibot tadbirida bunday holatlarning oldini olish uchun qilinishi lozim boʻlgan choralar, ushbu holatlarning ayanchli oqibatlari xususida koʻplab savollar berildi. Tadbir tashkilotchilari barcha savollarga hayotiy misollar bilan javob berdilar.

Qolaversa, aholining tabiiy va is gazi, elektr energiyasi masalalarida qiynayotgan murojaatlari tinglandi. Murojaatlardagi masalalarni hal qilish boʻyicha tegishli tashkilotlar bilan kelishib olindi.

Taʼkidlash kerakki, elektr va gaz taʼminoti tizimini yanada takomillashtirish, bozor mexanizmlarini keng joriy qilish orqali energiya resurslaridan oqilona foydalanishni taʼminlash, shuningdek, mazkur sohada koʻrsatilayotgan xizmatlar sifatini yaxshilash bugungi kundagi dolzarb vazifalardan biriga aylangan. Tabiiy resurslardan oqilona foydalanish esa har birimizning insoniylik burchimizdir.

Charos Arslonova,

tuman hokimligining Axborot xizmati rahbari.