“Jayxun ilhomlari” NNT tomonidan 57-sonli maktabda sayyor kutubxona tadbiri oʻtkazildi

Hozirgi kunda mamlakatimizda yoshlarning har tomonlama yetuk, bilimdon boʻlib yetishishlari uchun ulkan diqqat-eʼtibor qaratilmoqda. Kelajagimiz yaratuvchilari boʻlgan oʻgʻil-qizlar zamonaviy maktablarda eng soʻnggi rusumdagi oʻquv jihozlari bilan taʼminlangan sinflarda bilim sirlarini oʻrganmoqdalar. Shuningdek, maktablarda kitoblarga boy kutubxonalar, koʻrgazmali qurollar bilan taʼminlangan fan kabinetlari, sport zallarida ular uchun barcha sharoitlar yaratilgan.
Shuningdek, Prezidentimiz tomonidan ilgari surilgan 5 ta muhim tashabbus ham mamlakatimiz yoshlari hayotida muhim ahamiyat kasb etmoqda. Mazkur 5 ta muhim tashabbus yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirib, isteʼdodini yuzaga chiqarishga, jismoniy chiniqtirish,  sport sohasida qobiliyatini namoyish qilishlari uchun zarur sharoitlarni yaratishga, kompyuter texnologiyalari va internetdan samarali foydalanishni, maʼnaviyatni yuksaltirish, kitobxonlikni keng targʻib qilish boʻyicha tizimli ishlarni tashkil etishga, xotin-qizlarni ish bilan taʼminlashga qaratilganligi sababli yoshlarning oʻzlarini namoyon etishlariga imkon yaratmoqda.

Bundan koʻrinib turibdiki, ilgari surilayotgan 5 ta muhim tashabbus yoshlarning kelajakdagi hayot yoʻllarini puxta belgilab olishlari uchun muhim imkoniyatdir.
Shu boisdan joylarda 5 ta muhim tashabbus qoʻllab-quvvatlanib, turli yoʻnalishlarda toʻgaraklar tashkil qilinib, tadbirlar oʻtkazib kelinmoqda.
Bu amaliy ishlarning barchasi yoshlar, ayniqsa, maktab oʻquvchilari uchun xizmat qiladi.

Tumanimizdagi “Jayxun ilhomlari” nodavlat-notijorat tashkiloti tomonidan ushbu 5 ta muhim mashabbusning ahamiyati keng qoʻlamda targʻibot qilib kelinmoqda. Tashkilot tomonidan tegishli reja asosida “Ijodkorlar bilan uchrashuv”, “Sayyor kutubxona”, “Kutubxonaga tashrif”, “Mahorat maktabi”, “5 ta muhim tashabbus” kabi tadbirlar oʻtkazib kelinmoqda. Bu tadbirlar muntazam oʻtkazilayotgani bois maktab oʻquvchilari taniqli jurnalistlar, shoir va yozuvchilar, rassomlar musiqashunoslar bilan uchrashib, oʻzlarini qiziqtirgan savollarga javoblar olib, bilim va maʼnaviy dunyosini boyitib bormoqdalar.
Tashkilot tomonidan tumanimiz markazida olis boʻlgan maktab oʻquvchilariga kitoblar yetkazib berilmoqda.

Tumanimizning 57-sonli umumtaʼlim maktabida “Sayyor kutubxona” tadbiri oʻtkazildi. Unda maktab direktori Masharif Roʻzmetov hukumatimiz tomonimizdan oʻquvchi-yoshlarga qaratilgan katta eʼtibor, imkoniyatlar haqida gapirib berdi.

“Jayxun ilhomlari” nodavlat notijorat tashkiloti raisi Oʻrozali Reyimov tashkilot tomonidan ijodkor yoshlarni qoʻllab-quvvatlash, kitobxonlikka jalb etish maqsadida oʻtkazilayotgan tadbirlar, hududlarda tashkil etilgan kutubxonalar haqida soʻzlab berdi. Ijod qilishga qiziquvchi yoshlar bilan alohida suhbat qilib, yoʻl-yoʻriqlar koʻrsatdi. Shundan soʻng, maktab oʻquvchilarini tashkilot kutubxonasiga aʼzo qildi va ularga qiziqarli kitoblarni topshirdi. Oʻquvchilar tashkilot tomonidan keltirilgan kitoblar bilan tanishib, oʻzlariga maʼqul boʻlgan mavzulardagi kitoblarni tanlab oldilar.
Maktab oʻquvchilari uchun bu qoʻshimcha badiiy adabiyotlar chin maʼnodagi qimmatbaho sovgʻa boʻldi.

Oʻrozali Reyimov.