OʻZBEKNING ZULFIYaSIGA EHTIROM KOʻRSATILDI

Har yili bahorning ilk kuni – 1-mart mamlakatimizda ajib ohanglarga toʻla tadbirlar bilan kutib olinadi. Goʻyo  shu kundan yashnash va yasharish fasli – goʻzal bahorga monand tuygʻular uygʻonadi dillarda. Albatta, bu tuygʻular Oʻzbekning asl farzandi, baxt va mangu bahor, yoshlik kuychisi Zulfiyaxonim nomi, sharafi bilan bogʻliq. Mamlakatimizning barcha oʻquv muassasalarida, ijodiy jamoalarda, ovul va mahallalarda davralar kengdan olinib, sheʼriyat kechalari, mushoiralar biri-biriga ulanib ketadi. Atlas-u adraslarga burkangan zebo qizlar, hatto jajji qizaloqlarning “Zulfiyaxonim izdoshiman” deb sheʼr oʻqishlarini koʻrsangiz, qalbingizda havaslar uygʻonadi. Beixtiyor bu sheʼriyat davralariga qoʻshilib, jarang sochayotgan nazmiy ohanglardan bahra olasiz.

“Zulfiya – bahor kuychisi” deb nomlangan adabiy-musiqiy tadbirni katta ishtiyoq bilan tayyorlagan 75-sonli umumtaʼlim maktabining oʻzbek tili va adabiyot fani oʻqituvchilari Gulasal Matkarimova hamda Shahlo Aytboyevalardan nafaqat maktab jamoasi, balki oʻquvchilarning ota-onalari ham minnatdor boʻlishdi.

Avvalo shuni alohida qayd etish kerakki, tadbirda Zulfiya ijodi, hayoti va faoliyatiga doir koʻrgazma tashkil etildi. Shoiraning kitoblari, shoira asarlari asosida tayyorlangan adabiy-badiiy sahna asarlari haqida hikoya qiluvchi koʻrgazma ishtirokchilarda katta taassurot qoldirdi.

Tadbirni maktab direktorining maʼnaviy-maʼrifiy ishlar boʻyicha oʻrinbosari Asqar Matmurodov ochdi hamda Zulfiyaxonimning mashaqqatli, lekin sharafli hayot yoʻli haqida oʻquvchilarga soʻzlab berdi. Maktabning 7-sinf oʻquvchi-qizlari ijrosidagi “Bahor valsi” raqsi bilan boshlangan tadbirda 11-sinf oʻquvchilari Shohida Hayitboyeva va Laylo Oʻrozimbetovalar Nodirabegim hamda Zulfiyaxonim siymolarida namoyon boʻlishib, oʻzbekning ikki buyuk shoirasi ijodidan namunalar oʻqidilar.

Shundan soʻng, 8-sinf oʻquvchilari Zulfiyaxonimning suronlarga toʻla hayot va ijod yoʻli haqida, shoiraning matonati, jasorati hamda buyuk muhabbati, sadoqati xususida soʻzladilar. Tadbir davomida 5-sinf oʻquvchilari tomonidan Zulfiyaxonimning farzandlari Hulkar va Omonga, nabirasi Ulugʻbekka bagʻishlab yozgan sheʼrlari ifodali oʻqib berilgani barchaga manzur boʻldi. Bundan tashqari, ular Zulfiyaning turkum sheʼrlarini maroq bilan ifodali oʻqib berdilar. Ayniqsa, mazmunida mehribon ona, sadoqatli ayol siymolari mujassam boʻlgan “Mening mehribon onaginam”, “Bizning onalar” sheʼrlarini tadbir ishtirokchilari maroq bilan tingladilar.

Tadbirda Zulfiyaxonim haqida Oybek, Gʻafur Gʻulom, Abdulla Qahhor, Mirtemir kabi zamondoshlari tomonidan bildirilgan fikrlar va ularning samimiy ehtirom tuygʻulariga toʻla soʻzlarini keltirishib, Zulfiyaxonim ijodi dunyoning koʻplab mamlakatlarida sevib oʻqilishi haqida ifixor bilan soʻzladilar. Maktabning 7-sinf oʻquvchilari esa Gʻ.Gʻulomning “Zulfiyabegimga”, E.Vohidovning “Vafo” poemasi, Hamid Gʻulomning “Iltijo” sheʼrlaridan parchalar oʻqib berishdi.

Tadbir davomida 11-sinf  oʻquvchisi Xursandoy Jalgʻashboyeva Zulfiya hayoti va ijodiga oid viktorina oʻyinlarini tashkil etib, Zulfiyaxonim asarlarining bilimdonlarini bahsga chorladi.

Goʻzal mushoira, bilimdonlik bahslari, kuy va qoʻshiqlar, dilrabo raqslar joʻrligida oʻtkazilgan tadbir Zulfiyaxonim dahosiga samimiy ehtirom tarzida taassurotlarga boy boʻldi.

Robiya YOʻLDOShEVA.