“Navoiy siymosiga ulugʻ ehtirom” nomli tadbir boʻlib oʻtdi

Alisher Navoiy - oʻzbek xalqining ulugʻ shoiri va buyuk mutaffakiri boʻlib, uning nomi dunyoning eng mashhur shoirlari qatorida tilga olinadi. Navoiy butun ijodiy faoliyatini insoniyatning baxti uchun kurashga, xalqning osoyishtaligi, obodonchilik ishlari, sanʼat hamda adabiyot taraqqiyotiga bagʻishladi.

Ulugʻ mutafakkir, soʻz mulkining sultoni Alisher Navoiyning boy maʼnaviy merosi asrlar osha butun bashariyatni hayratga solib, insonlar qalbiga, ong-u shuuriga ezgulik, insonparvarlik, saxovat, mehr-muruvvat ziyosini taratib kelmoqda. Mamlakatimizda ulugʻ bobokalonimizga ehtirom koʻrsatish, asarlarini oʻrganish, uni dunyoda keng targʻib etishga doimiy eʼtibor qaratilmoqda.

9-fevral sanasi buyuk siymo tavalludi sifatida har yili keng miqyosda nishonlanadi. Barcha taʼlim muassasalarida ababiy-badiiy kechalar tashkil qilinadi.
Xususan, tumanimizdagi 65-sonli umumtaʼlim maktabida ham Alisher Navoiy tavalludining 579-yilligi munosabatiga bagʻishlangan badiiy kecha boʻlib oʻtdi.
Shu oʻrinda taʼkidlash kerakki, bunday tadbirlar tashkil qilinishi ulugʻ bobokalonimizning boy adabiy merosini oʻrganish va targʻib etishni keng yoʻlga qoʻyish, oʻquvchi-yoshlar qalbi va ongiga Navoiy asarlarining mazmun-mohiyatini, badiiy xususiyatini va tarbiyaviy ahamiyatini chuqur singdirishga xizmat qiladi.

Shu maqsadda oʻtkazilgan “Navoiy siymosiga ulugʻ ehtirom” deya nomlangan tadbirda maktabning 6-sinf oʻquvchilari ajoyib chiqishlar qildilar. Badiiy kecha 6-“B” sinf oʻquvchilari hamda sinf rahbari, ona tili va adabiyot fani oʻqituvchisi Dilnoza Xudoyberganova tashabbuskorligida boʻlib oʻtdi. Tadbirni maktabning maʼnaviyat-maʼrifat ishlari boʻyicha direktor oʻrinbosari Baxtiyor Nasrullayev ochib berdi hamda mutafakkir isteʼdodi va ijodi haqida iliq fikrlar bildirdi.
Badiiy kecha boshida oʻquvchilar buyuk siymo mashaqqatli hayoti hamda betakror ijodi xususida qiziqarli maʼlumotlar bayon qildilar.

Darhaqiqat, Alisher Navoiy ham sheʼriyatda, ham nasrda mislsiz maʼnaviy meros qoldirdi. Uning asarlarini butun jahon xalqlari sevib mutolaa qiladi. Navoiy ijodining gultoji, turkiy tilda yozilgan ilk “Xamsa” asari beshta dostonni oʻz ichiga olib, bular “Hayrat ul-abror”, “Farhod va Shirin”, “Layli va Majnun”, “Sabbai sayyor”, “Saddi Iskandariy” dostonlaridir.

Shuningdek, Navoiy asarlarining barchasida asosiy mavzusi komil insonni tarbiyalash boʻlib, bunga esa faqatgina ilm oʻrganish orqaligina erishish mumkinligi taʼkidlandi.

Darhaqiqat, xalqimizning ulugʻ mutafakkiri, maʼrifatparvari va buyuk shoiri Alisher Navoiy yoshlarni tarbiyalash ishiga alohida eʼtibor bergan. U har bir asari orqali farzandlarni ilm-hunarni, mehnatni sevishga undab, oʻrganilgan ilm va hunarni xalq, Vatan ravnaqi yoʻlida sarf qilish zarurligini uqtirgan.

Badiiy kechada oʻquvchilar Alisher Navoiy gʻazallari, ruboiylaridan parchalar aytdilar. Shuningdek, oʻquvchilar tomonidan Navoiy va Guli suhbati, Husayn Boyqaro va Navoiy suhbati sahna koʻrinishlari ijro qilindi. Kechada ishtirok etayotganlar sahna koʻrinishlarini maroq bilan tomosha qildilar. Ayniqsa, sinf qizlari ijrosidagi “Bibixonim” raqsi barchaga koʻtarinki kayfiyat bagʻishladi. Tadbirda nafaqat oʻquvchilarning, balki ishtirok qilayotgan boshqa fanlar oʻqituvchilarining adabiyotga va badiiy soʻz sanʼatiga boʻlgan qiziqishlari yanada oshdi.
Badiiy kecha barchada katta taassurot qoldirdi.

Charos Arslonova.