Xalq deputatlari Amudaryo tuman Kengashining ikkinchi sessiyasi toʻgʻrisida axborot

2020-yil 27-yanvar kuni tuman hokimligi majlislar zalida Xalq deputatlari Amudaryo tuman Kengashining ikkinchi sessiyasi boʻlib oʻtdi.

Sessiyada xalq deputatlari tuman Kengashi deputatlari, tuman hokimi oʻrinbosarlari, hokimlik masʼul xodimlari, boʻlimlar, huquq-tartibot organlari, jamoat tashkilotlari rahbarlari, fuqarolar yigʻinlari raislari va ommaviy axborot vositalari vakillari ishtirok etdi. Sessiya ishiga tuman hokimi Sultonboy Yoʻldashev raislik qildi.

Deputatlar dastlab Xalq deputatlari tuman Kengashining va Kengash doimiy komissiyalarining 2020-yilga moʻljallangan ish rejalari loyihasini koʻrib chiqib, tasdiqladilar.

Soʻngra Amudaryo tumani Jinoyat, Fuqarolik, Iqtisodiy va Maʼmuriy ishlar boʻyicha sudlari raislarining axborotlari tinglandi. Axborotlarda tumanda inson huquq va erkinlari himoyasi, qonun ustuvorligini taʼminlash yuzasidan keng koʻlamli chora-tadbirlar amalga oshirilgani alohida taʼkidlandi. Shuningdek, fuqarolar huquqlari va erkinliklarini, korxonalar, muassasalar va tashkilotlarning huquqlari hamda qonun bilan qoʻriqlanadigan manfaatlarini sud orqali himoya qilishni amalga oshirish borasida 2019-yilda amalga oshirilgan ishlar yuzasidan axborotlar berildi.

Kun tartibidagi uchinchi masala – 2019-yil davomida jinoyatchilikning oldini olish va qonuniylikni taʼminlash hamda bu borada amalga oshirilgan ishlar yuzasidan tuman prokurori va Ichki ishlar boʻlimi boshligʻi hisobot berdi. Tuman Prokuraturasi hamda Ichki ishlar boʻlimi tomonidan qilingan amaliy ishlar natijasida 2019-yilda jinoyatchilik va huquqbuzarliklarning sezilarli darajada kamayganligi hisobotlarda taʼkidlab oʻtildi.

Sessiya kun tartibidagi navbatdagi masala – tuman darajasidagi davlat organlari va tashkilotlarining norma ijodkorligi va huquqni qoʻllash amaliyoti holati yuzasidan tuman Adliya boʻlimi boshligʻi Moʻminjon Matyusupovning axboroti tinglandi. Axborotda boʻlim tomonidan 2019-yil davomida jami 80 nafar fuqaroning manfaatini koʻzlab kiritilgan arizalardan 76 tasi qanoatlantirilgani, daʼvo arizalari natijasida fuqarolarning pensiya, ish haqi, farzandiga tugʻilish guvohnomasi olish kabi masalalar hal etilganligi taʼkidlab oʻtildi.

Oʻzbekiston Pespublikasi Prezidentining Amudaryo tumanidagi Xalq qabulxonasida 2019-yil davomida tumanni kompleks ijtimoiy-iqtisodiy rivojlantirish boʻyicha sektorlar va hududdagi tashkilotlar rahbarlari faoliyati, murojaatlar bilan ishlash holati boʻyicha kun tartibiga qoʻyilgan masala yuzasidan qabulxona mudiri Erkin Pajabov axborot berdi. Axborotda 2019-yilda kelib tushgan murojaatlarning 353 tasi yaʼni, 80 foizi qanoatlantirilganligi, qolgan murojaatlarni koʻrib chiqish va hal qilish boʻyicha ham amaliy choralar koʻrilishi taʼkidlandi.

Sessiyada tumanni jadal ijtimoiy-iqtisodiy rivojlantirish boʻyicha tashkil qilingan sektorlar tomonidan 2019-yil davomida amalga oshirilgan ishlar yuzasidan sektor rahbarlarining hisobotlar tinglanib, muhokama qilindi hamda tegishli qaror qabul qilindi. Hisobotlarda taʼkidlanganidek, barcha sektor aʼzolari tomonidan 2019-yilda sohalarda samarali ishlar amalga oshirildi. Hududlardagi aholining muammolari oʻrganilib, ularni oʻz vaqtida hal qilish choralari koʻrildi.

Amudaryo tumanidagi Oʻzbekiston Pespublikasi Bosh vazirining Tadbirkorlar murojaatlarini koʻrib chiqish qabulxonasi tomonidan 2019-yilda amalga oshirilgan ishlar toʻgʻrisida qabulxona mudiri Akbar Xoʻjamurodov ham sessiyada axborot berdi. Axborotda taʼkidlanganidek, qabulxonada jami 144 ta masala boʻyicha 134 ta murojaat roʻyxatga olingan. Shundan 82 tasi qanoatlantirilib, 52 tasiga tushuntirishlar berilgan.

Tuman Kengashining sessiyasida Prezidentimizning ”Mahalliy davlat hokimiyati organlarining moliyaviy erkinligini oshirish, mahalliy byudjetlarga tushumlarning toʻliqligini taʼminlash boʻyicha soliq va moliya organlari javobgarligini kuchaytirishga oid qoʻshimcha chora-tadbirlar toʻgʻrisida”gi Farmoni ijrosi yuzasidan tuman hokimining iqtisodiyot va tadbirkorlik masalalari boʻyicha birinchi oʻrinbosari Maʼmurjon Temirbayev, tuman davlat soliq inspetsiyasi boshligʻining birinchi oʻrinbosari Odilbek Ashirbayev hamda tuman Moliya boʻlimi mudiri Ulugʻbek Bekniyozovlar hisobot berdi. Hisobotlarda taʼkidlanganidek, 2019-yil davomida jami 66 mlrd. 404 mln. soʻmlik 57 ta loyihalar amalga oshirildi va natijada 253 ta yangi ish oʻrinlari yaratildi.

Sessiyada tuman fermer, dehqon xoʻjaliklari va tomorqa yer egalari Kengashi raisi Ilhom Polvonovning ham axboroti tinglandi. Axborotda sohada amalga oshirilgan loyihalarga oʻz mablagʻlari hisobidan 2 mlrd. 582 mln. soʻm sarflanib, yangidan 192 ta ish oʻrinlari yaratilganligi, 2019-yilda tumanimizda koʻp tarmoqli fermer xoʻjaliklarini rivojlantirish boʻyicha qabul qilingan dastur amalda toʻliq bajarilgani taʼkidlandi.

Tuman hokimining qishloq va suv xoʻjaligi masalalari boʻyicha oʻrinbosari Fayzulla Saʼdullayev ham sessiyada axborot berib, qishloq xoʻjaligi sohasida yakunlangan 2019-yilda ham yuqori natijalarga erishilgani, xususan, 2019-yil hosili uchun don topshirish boʻyicha shartnomaviy reja respublikamizda oldingilar qatorida ortigʻi bilan bajarilib, davlatimiz xirmoniga 9 ming 749 tonnadan ortiq don topshirilib, reja 133,6 foizga, 15 ming 250 gektar maydonga chigit ekilib, davlat xirmoniga rejadagi 32 ming 250 tonna oʻrniga, 36 ming 669 tonna paxta hom ashyosi yetkazib berilib, shartnomaviy reja 113,7 foizga bajarilgani qayt etib oʻtildi.

Kun tartibidagi navbatdagi masala yuzasidan Pespublika Maʼnaviyat va maʼrifat markazi tuman boʻlimi boshligʻi Ashirboy Qushayevning axborotida Oʻzbekiston Pespublikasi Davergeodezkadastr qoʻmitasi ekspert komissiyasining xulosasiga koʻra tumandagi 2 ming 555 ta nomsiz koʻchalarga nom berish tavsiya qilingani, 101 ta koʻcha nomi maʼno jihatidan berilayotgan obʼektga nomuvofiqligi, 11 ta nom roʻyxatda takroriy berilgan degan xulosaga kelingani taʼkidlanib, koʻchalarni yangidan nomlash boʻyicha zarur ishlar olib borilayotgani qayd etib oʻtildi.

Sessiyada koʻrilgan hamda muhokama qilingan barcha masalalar yuzasidan tegishli qarorlar qabul qilindi va shuning bilan sessiya oʻz ishini yakunladi.

Tuman hokimligining Axborot xizmati.