«Sogʻlom bola yili» Davlat dasturi – yurt istiqboli yoʻlidagi muhim hujjatdir

Sogʻlom farzand – millat kelajagi. Shu sababli mustaqillikning ilk yillaridan boshlab yurtimizda sogʻlom ona – sogʻlom bola tamoyili asosida keng koʻlamli ishlar amalga oshirilmoqda.

Muhtaram Yurtboshimiz tomonidan har tomonlama sogʻlom avlodni voyaga yetkazish borasidagi tizimli ishlarni izchil davom ettirish va yangi bosqichga koʻtarish maqsadida 2014-yil mamlakatimizda "Sogʻlom bola yili” deb eʼlon qilingan edi.

Shu munosabat bilan 2014-yil 19-fevral kuni Oʻzbekiston Respublikasi Prezidentining «Sogʻlom bola yili» Davlat dasturi toʻgʻrisida»gi PQ-2133-sonli Qarori qabul qilindi.

Mamlakatimizda jismoniy sogʻlom, maʼnaviy yetuk, har tomonlama uygʻun va barkamol rivojlangan, mustaqil fikrlaydigan, intellektual salohiyatga, chuqur bilim va zamonaviy dunyoqarashga ega, Vatanimizning taqdiri va kelajagi uchun masʼuliyatni oʻz zimmasiga olishga qodir boʻlgan yosh avlodni tarbiyalab voyaga yetkazish vazifasini izchil davom ettirish uchun aniq maqsadga qaratilgan keng koʻlamdagi kompleks chora-tadbirlarni amalga oshirish, davlat va jamiyatning barcha kuch va imkoniyatlarini shu yoʻlda safarbar etish maqsadida qabul qilingan ushbu dastur 7 boʻlim va 125 banddan iborat.

Prezidentimizning yuqoridagi qarori bilan «Sogʻlom bola yili» Davlat dasturini amalga oshirishning ustuvor vazifalari va yoʻnalishlari belgilab berildi. Jumladan, sogʻlom va har tomonlama barkamol avlodni shakllantirish uchun qonunchilik va normativ-huquqiy bazani yanada takomillashtirish, sogʻlom bolaning dunyoga kelishi masalasiga sogʻlom va ahil oilaning mevasi sifatida qarab, oilalarni har tomonlama qoʻllab-quvvatlash, sogʻlom bolani voyaga yetkazishda sogʻliqni saqlash tizimi va tibbiyot xodimlarining roli va masʼuliyatini oshirish, bu borada taʼlim-tarbiya tizimi va sportning rolini kuchaytirish, sogʻlom va barkamol avlodni tarbiyalab voyaga yetkazishda davlat va jamiyat tomonidan koʻrsatiladigan yordam va madadni kuchaytirish, sogʻlom bolani, ayniqsa, qiz bolalarni tarbiyalab voyaga yetkazishda mahalla va boshqa jamoat tuzilmalarining rolini oshirish hamda Davlat dasturining maqsad va vazifalari hamda uning bajarilishi toʻgʻrisida keng axborot-tushuntirish ishlari olib borish kabi masalalar shular jumlasidandir.

Sogʻlom va har tomonlama barkamol avlodni shakllantirish uchun qonunchilik va normativ-huquqiy bazani yanada takomillashtirish maqsadida «Bolalarni ularning jismoniy va maʼnaviy rivojlanishiga salbiy taʼsir koʻrsatuvchi axborotdan himoya qilish toʻgʻrisida»gi, «Aholining sanitariya-epidemiologik xotirjamligi toʻgʻrisida»gi Oʻzbekiston Respublikasi qonunlari loyihalarini ishlab chiqish, yangi tahrirdagi «Jismoniy tarbiya va sport toʻgʻrisida»gi, «Oʻzbekiston Respublikasida yoshlarga oid davlat siyosati asoslari toʻgʻrisida»gi qonunlari loyihalarini ishlab chiqish, kodekslar, qator qonun va qonun osti hujjatlariga oʻzgartish va qoʻshimchalar kiritish hamda Oʻzbekiston Respublikasi Prezidentining va Vazirlar Mahkamasining qarorlari loyihasini ishlab chiqish kabi tadbirlar bajarilishi belgilangan.

Sogʻlom bola – avvalo sogʻlom va ahil oilaning mevasidir. Shu maqsadda dasturning ikkinchi bobida oilada oʻzaro hurmat va mehr-muhabbat, yuksak axloqiy va maʼnaviy qadriyatlar muhitini shakllantirish, yosh oilalarning oyoqqa turib olishi uchun moddiy yordam koʻrsatish, onalik va bolalik himoyasini taʼminlash, ona va bolaning salomatligini mustahkamlash, ayollarning oʻz qobiliyat va imkoniyatlarini roʻyobga chiqarishi, ularning roʻzgʻor tashvishlarini yengillashtirish uchun zarur shart-sharoitlarni yaratish masalalariga alohida eʼtibor qaratilgan.

Dasturda shuningdek, sogʻlom bolani voyaga yetkazishda sogʻliqni saqlash tizimi va tibbiyot xodimlarining oʻrni va masʼuliyatini oshirish, taʼlim-tarbiya tizimi va sportning rolini kuchaytirish boʻyicha aniq chora-tadbirlar belgilangan.

Dasturning 6-boʻlimida mahalla va boshqa jamoat tuzilmalari zimmasiga katta masʼuliyatlar yuklangan.

Darhaqiqat, "Bir bolaga yetti mahalla ham ota, ham ona” degan xalq hikmatida chuqur hayotiy haqiqat mujassam. Shu nuqtai nazardan kelib chiqib, joriy yilda mahalla oqsoqollari, diniy maʼrifat va maʼnaviy-axloqiy tarbiya masalalari boʻyicha maslahatchilar, mahalla posbonlarining jamiyatimizdagi tinchlik va osoyishtalik, oʻzaro hurmat va hamjihatlik, mehr-oqibat muhitini yanada mustahkamlashdagi masʼuliyati yanada ortadi.

Shuning bilan birga erta nikohlarning, oilaviy nizolarning oldini olish, oilaviy marosimlarni ixcham va tartibli oʻtkazish kabi masalalarda koʻpni koʻrgan, tajribali mahalla faollarimiz fidoyilik namunalarini koʻrsatishi kerak. Kam taʼminlangan oilalarga moddiy va maʼnaviy yordam koʻrsatish, tadbirkorlikni rivojlantirish va boshqa masalalar ham borki, ularni amalga oshirishda koʻrsatgan jonbozligimiz elning bizga nisbatan hurmat va ishonchini oshiradi.

Davlat dasturining 5 ta bandida "Mahalla” xayriya jamoat fondi asosiy ijrochi, 19 tasida esa hamijrochilar qatorida belgilangani ham bizning tuzilmamizga Davlatimiz tomonidan bildirilayotgan ishonchning amaliy ifodasidir. Oʻylaymanki, tumanimizdagi har bir ovul va mahalla fuqarolar yigʻinlari shu masʼuliyatni his qilgan holda ish olib boradilar.

Eng muhimi shundaki, Respublikamizda mavjud ikki yuzdan ortiq shahar va tumanlar orasida 2 ta hudud "Sogʻlom bola yili” davlat dasturini amalga oshirishda tayanch hududlar deb belgilandi. Shulardan biri – Amudaryo tumanidir. Bu masʼuliyat tumanimizda yashayotgan har bir fuqaroni dastur ijrosiga, shu orqali ona Vatanimiz rivojiga oʻz mehnati, kasb faoliyati bilan munosib hissa qoʻshishga chorlaydi.

Rustam ROʻZMETOV,

"Mahalla” xayriya jamoat fondi tuman boʻlinmasi raisi, xalq deputatlari tuman Kengashi deputati.