RESPUBLIKA IShChI GURUHI AʼZOLARI OʻQUVChILARNING SOGʻLOM TURMUSh TARZI BORASIDAGI BILIMLARINI SINOVDAN OʻTKAZDI

Aholi, ayniqsa, yoshlar oʻrtasida sogʻlom turmush tarzini targʻib qilishni tizimli yoʻlga qoʻyish, jamiyatda sogʻlom turmush tarzi afzalliklarini yoshlar ongiga chuqur singdirish, oʻsib kelayotgan yosh avlodni zararli odatlardan asrash maqsadida sportga keng jalb qilish, boʻsh vaqtlarini mazmunli oʻtkazishlariga erishish dolzarb vazifalardan hisoblanadi. Chunki sogʻlom turmush tarzini tanlagan, jismoniy faol, maʼnaviyatli yoshlar oʻz hayot yoʻlini toʻgʻri tanlay oladilar, ularga hech qanday maʼnaviy tahdidlar xavf sola olmaydi.

Yoshlar bilan bu borada olib borilayotgan saʼy-harakatlar samarasini sarhisob qilish maqsadida tumanimizda boʻlib turgan Respublika ishchi guruhi aʼzolari Mangʻit shahrida faoliyat yuritayotgan 38- va 40-sonli umumiy oʻrta taʼlim maktablarining yuqori sinflari oʻquvchilari orasida “Sogʻlom turmush tarzi – uzoq umr koʻrish garovi” mavzusida insholar tanlovini oʻtkazdi.

Ishchi guruh aʼzolari oʻquvchilar insholarini diqqat bilan tekshirib, ularning mavzu yuzasidan bildirgan fikrlari bilan tanishdilar.

Maʼlumki, sogʻlom turmush tarziga rioya etish – hayotda koʻpgina muammolarning oldini olishga xizmat qiladi. Jismoniy faollik, badantarbiya bilan shugʻullanish, toʻgʻri ovqatlanish, tamaki va alkogol mahsulotlari qabul qilishdek zararli odatlardan tiyilish, kun tartibiga amal qilish – yaʼni organizmni zoʻriqtirmasdan meʼyorida uxlash, ishlash, dam olish, hayotdan zavqlana olish, tushkunlikka tushmaslik shuningdek, toza havodan nafas olish, uy va ish xonalarining havosi musaffoligini taʼminlash, shaxsiy gigiyena qoidalariga amal qilish bir qarashda mushkul ishday koʻrinishi mumkin. Biroq uni kundalik yumushga aylantirish sogʻlom hayot sari muhim qadamdir. Hayotda baxtiyor, sogʻlom, ishchan holatda uzoq yashashni istagan odam albatta, uddasidan chiqadi.

Oʻtkazilgan insholar tanlovi bu borada oʻquvchilarning muayyan bilimlarga ega ekanligini koʻrsatdi.

Ishchi guruh aʼzolari tanlovda birinchi, ikkinchi, uchinchi oʻrinlarga loyiq koʻrilgan insholar mualliflari tuman Tibbiyot birlashmasi maʼmuriyati tomonidan esdalik sovgʻalari va diplomlar bilan taqdirlandi.

Shuningdek, 38-sonli maktab boshlangʻich sinf oʻquvchilari orasida shaxsiy gigiyena qoidalari xususida Respublika ishchi guruhi aʼzolari oʻtkazgan suhbat ham diqqatga sazovor boʻldi. Oʻquvchilar oʻzlarini qiziqtirgan savollariga javoblar oldilar.

Oygul RAJABOVA.