VATAN HIMOYaChILARI KUNIGA BAGʻIShLANGAN SPORT MUSOBAQALARI BOʻLIB OʻTDI

    Mamlakatimizda har yili 14-yanvar – Vatan himoyachilari kuni keng nishonlanadi. Sana munosabati bilan  yurtimiz sarhadlarini ishonchli qoʻriqlab, tinchlik-osoyishtaligini taʼminlab kelayotgan  harbiy xizmatchilar, muddatli harbiy xizmat burchini oʻtayotgan askarlarga yuksak hurmat-ehtirom koʻrsatiladi, yoshlarning  ulardan  oʻrnak olishlari, munosib boʻlib voyaga yetishlari uchun  turli tadbirlar tashkillashtiriladi.

        Joriy yilda ham 2019-yilning 15-dekabri va 2020-yilning 15-yanvari oraligʻida oʻtkazilgan “Vatanparvarlik oyligi” doirasida  milliy Armiyamiz va Qurolli Kuchlarimiz  harbiy-texnik salohiyatini va harbiy xizmatchilar, muddatli harbiy xizmat burchini oʻtayotgan askarlarning  yuksak harbiy  intellektual salohiyatini targʻib etish, xalqimiz koʻnglida ularga ishonch tuygʻularini mustahkamlash maqsadida  “Vatanparvarlik – milliy yuksalish kafolati” shiori ostida koʻpgina tadbirlar boʻlib oʻtdi.

       Sana munosabati bilan  tumandagi umumiy oʻrta taʼlim, oʻrta maxsus, kasb-hunar taʼlimi muassasalarida  sogʻlom  va  barkamol  avlodni voyaga yetkazish borasidagi ishlarning  samaradorligini oshirish, yoshlarning boʻsh vaqtlarini mazmunli oʻtkazish, turli huquqbuzarliklarning oldini olish, yoshlarni sport musobaqalariga ommaviy tarzda jalb qilish, yoshlarning diniy-ekstremistik guruhlarga kirib qolishining oldini olish maqsadida  tuman hokimligi, Jismoniy tarbiya va sport boʻlimi,  tuman  Xalq taʼlimi,  Mudofaa, Madaniyat  boʻlimlari va mudofaaga koʻmaklashuvchi “Vatanparvar” tashkiloti hamkorligida oʻquvchilar orasida sport musobaqalari  oʻtkazildi. Shu yil  9-yanvar  kuni tumanimizning  8 ta hududida sportning arqon tortish, mini futbol, harbiy sport turlari, yaʼni turnikda tortilish, granata otish, oʻq otish, kuch sinash, yugurish boʻyicha musobaqalar boʻlib oʻtdi. Unda 864 nafar yoshlar ishtirok etib, gʻoliblik uchun bellashdilar.  
11-yanvar kuni esa mudofaaga koʻmaklashuvchi “Vatanparvar” tashkiloti binosida hududlar gʻoliblari boʻlgan  yoshlar oʻrtasidagi musobaqalarning tuman bosqichi oʻtkazildi. Natijalarga koʻra, arqon tortish  boʻyicha oʻtkazilgan musobaqada birinchi oʻrinni Mangʻit Iqtisodiyot kolleji, ikkinchi oʻrinni 17-sonli maktab, uchinchi oʻrinni esa 4-sonli maktab oʻquvchilari egalladilar. Yugurish,  turnikda tortilish, granata otish, oʻq otish, kuch sinash kabi harbiy sport  turlari boʻyicha  bellashuvlar ham juda qizgʻin va hayajonli kechdi. Ushbu musobaqalarda birinchi oʻrinni 17-sonli maktab, ikkinchi oʻrinni  Mangʻit Iqtisodiyot kolleji, uchinchi oʻrinni esa 4-sonli  maktab  oʻquvchilari jamoalari egalladilar. Mini futbol musobaqasi ham yoshlarining ushbu sport turiga qiziqishlari tobora ortayotganini koʻrsatdi – gʻoliblik uchun keskin kurashlar bilan kechgan oʻyin natijalariga koʻra,  birinchi oʻrinni Mangʻit Iqtisodiyot kolleji,  ikkinchi oʻrinni 17-sonli maktab, uchinchi oʻrinni esa 31-sonli  maktab oʻquvchilari  egalladilar.    Shunday qilib,  umumiy natijalarga koʻra,  umumjamoa hisobida 17-sonli maktab oʻquvchilari gʻoliblikni qoʻlga kiritishdi. Mangʻit Iqtisodiyot kolleji oʻquvchilari ikkinchi oʻrin, 4-sonli maktab  oʻquvchilari esa uchinchi oʻrin gʻoliblari boʻldilar.

Musobaqa gʻolib va sovrindorlari 14-yanvar kuni tuman Madaniyat boʻlimi  tomoshalar zalida  Vatan himoyachilari kuniga bagʻishlab oʻtkazilgan  tantanali yigʻilishda   musobaqa tashkilotchilari tomonidan qimmatbaho sovgʻalar bilan taqdirlandilar.

           O.RAJABOVA.