Bahorday yashnab yuring, azizlar

 Roʻzimboy Nurimbetov – tuman tibbiyot birlashmasi kasaba uyushma qoʻmitasi raisi:

- Tuman tibbiyot birlashmasi huzuridagi shifoxonalarda mehnat qilayotgan shifokor ayollarni koʻrsam, goʻyo dunyoning barcha goʻzalligi ularning qiyofalarida, biri-biridan orasta yurishlarida, dillarga malham yangligʻ soʻzlashlarida jamlanday his qilaman. Shifoxonamiz ham ana shu oppoq libosli ayollarimiz bilan fayzli, ish kunlarimiz maroqli nazarimda. Tibbiyot birlashmamiz tasarrufidagi shifo maskanlarida 1106 nafar ayol-qizlar, shundan 168 nafar oliy maʼlumotli shifokor ayollar xalqimiz salomatligi yoʻlida mehnat qilishadi.

Bayram yaqin. 8-mart – Xalqaro xotin-qizlar kuni ham oilamiz uchun, ham kasbdosh shifokor ayollar – aziz opa-singillarimiz uchun bahorning eng latofatli, nazokatli ayyomi. Biz bu kunni nishonlash uchun jiddiy taraddud koʻrdik. Oʻz ishining fidoyilari boʻlgan, xulqi goʻzal, xushmuomala, nazokatli ayollarimizga munosib sovgʻa-salomlar hozirlab qoʻydik.

Istagim, najot farishtalari, oilalarimizning quvonchi, aziz ayollarimiz bor boʻlsinlar. Har biringizga sogʻlik-omonlik, oilaviy baxt-saodat, el-u yurt ehtiromi yor boʻlsin, deyman.

Omonboy Yerdashev, Shimoliy-Gʻarbiy harbiy okrugning "Qoʻskoʻl” gornizoni serjanti, "Toʻlqin” ovulida yashovchi onaxon Bibisara Qoʻchqorovaning oʻgʻli:

– Onajon! Sizni juda sogʻindim. Esingizdami, 1-sinfga qabul qilingan kunim menga boshdan-oyoq yangi liboslar kiydirib, bagʻringizga bosganingiz. Oʻshanda Sizning koʻzingizda yosh koʻrgan edim. "Nega yigʻlayapsiz?”, - desam, "quvonchimdan”, - degansiz. "Quvonchdan ham odam yigʻlar ekan-da”, - deya hayratlangandim oʻshanda. Endi oʻylasam, hayot qiyinchiliklarini koʻp totigan qalbingiz bir ogʻizgina shirin soʻzdan ham poyimizga toʻkilavergan ekan. Buni oʻzim ota boʻlganimda, oʻgʻlimni maktabga olib chiqqanimda his qildim, Onajon! Bu hayotda ota-ona uchun farzandlar kamolidan ham ulugʻroq baxt yoʻq ekan, aslida. Mening  oʻgʻlim harbiy, diydasi qattiq, deb oʻylamang. Sizning mehr-muhabbatingiz qoshida butun jismu jahoni erib-evrilguvchi goʻdagingizman.

Bilaman, 8-mart kuniga har doim alohida taraddud koʻrasiz. Issiq, qat-qat patirlar yopasiz, boʻgʻirsoqlar, qirmishlar pishirasiz. Ich-ichingizdan biz harbiy bolalaringizga toʻkilib turasiz: "Hammalari kelsa ekan. Mana bu neʼmatlardan totsa ekan”, - deb intiq boʻlasiz. Bizning diydorimiz Siz uchun eng ulugʻ sovgʻa ekanligini bilib, birimiz bayramdan oldin, birimiz bayram kuni yo keyin oldingizga oshiqamiz. Sizni quvontirish, Sizning bagʻringizda bir lahza boʻlish ham bizga bayram!

Onajon! Dunyoning jamiki goʻzalliklari Sizga yor boʻlsin. Oʻgʻil-qizlaringizning aziz diydorlaridan, quvonchlaridan baxtiyor, uzoq umr koʻring, bayramingiz qutlugʻ boʻlsin!

Ravshanbek Yoʻldoshev, "Toshyop” ovulida yashovchi tadbirkor: - Ota-onam doimo: "bir-birlaringga mehribon boʻlinglar, ayniqsa, qiz bolaning dilini ogʻritib boʻlmaydi, qizlar – ota uyning mehmonlari”, – deya tez-tez takrorlab turadilar. "Farzand ham mehmon boʻladimi?” – deb qoʻyardim ichimda. Lekin oʻzim ulgʻayib, avvalo opam oʻzga xonadonga uzatilib ketganlarida ota-onam  qayta-qayta takrorlaydigan bu soʻzlarning magʻzini chaqdim. Mening opa-singillarim, endi bilsam, mehr-oqibat bobida onamday jonfido ekanlar.

Onamday aziz va mehribon, otamday suyukli opa-singillarim! Sizlarni mehr-muhabbat bilan bagʻrimga bosib, 8-mart – Xalqaro xotin-qizlar kuni bilan tabriklayman. Hamisha baxtimga bahorday yashnab-yasharib yuring. Sizlarga oilaviy baxt-saodat tilayman, azizlarim!

Tabriklarni Robiya YOʻLDOShEVA yozib oldi.

(Foto - http://uza.uz)