46-sonli maktabgacha taʼlim tashkilotida “Bayrogʻimiz – faxrimiz” shiori ostida bayram tadbiri oʻtkazildi

Davlat ramzlari har bir mamlakatning mustaqilligini ifodalovchi muqaddas belgidir. Respublikamiz davlat ramzlari xalqimizning shon- sharafi, tarixiy xotirasi va intilishlarini oʻzida mujassam etib, tinch va osoyishta, ozod va erkin hayotimiz, yorugʻ kelajagimizga boʻlgan ishonchimiz ifodasidir.

Davlat ramzlari hamisha muqaddas va ulugʻ sanaladi. Chunki u xalqning oʻtmishi, buguni va kelajagini oʻzida mujassam etgan Vatanning yorqin timsolidir. Bayrogʻimiz oʻzida butun Oʻzbekiston xalqining asriy orzu-istaklari, gʻayrati va shijoatini, xalqimizga xos mehmondoʻstlikni mujassam etgan.

18-noyabr kuni davlatimiz suverenitetining ramzlaridan biri – mustaqil Oʻzbekiston Respublikasining “Davlat bayrogʻi toʻgʻrisida”gi qonuni qabul qilinganligiga 28-yil toʻldi.

Ushbu sana bayram sifatida mamlakatimzda keng nishonlandi. Tumanimizdagi barcha taʼlim va tarbiya muassasalarida sana munosabati bilan bayram tadbirlari va yigʻilishlar oʻtkazildi.

46-sonli maktabgacha taʼlim tashkilotida ham ushbu bayram munosabati bilan “Fidoying boʻlgaymiz seni, Oʻzbekiston!” nomli tadbir oʻtkazildi. 

Tashkilot rahbari Sevara Tojimurodova, oʻrta guruh tarbiyachisi Nazokat Allaberganova va katta guruh tarbiyachisi Nazokat Erjanovalar tayyorlagan ushbu tadbirda tashkilotning oʻrta va katta guruh bolalari ishtirok etishdi.  

Hozirgi kunda tashkilotda jami 115 nafar bolalar tarbiyalanmoqda. Bulardan, 25 nafari katta, 25 nafari oʻrta, 25 nafari kichik va yana 40 nafari qisqa guruh tarbiyalanuvchilaridir.

“Fidoying boʻlgaymiz seni, Oʻzbekiston!” nomli tadbirda bolalar bayrogʻimiz haqida sheʼrlar aytdilar, uning har bir ranggi, oy-u yulduzlari anglatadigan maʼnolar haqida soʻzlab, davlatimiz ramzlari haqida olgan bilimlarini namoyish qildilar.

Vatanparvarlikni aks ettiruvchi sahna koʻrinishlar namoyish etildi. Xususan, Vatan tinchligi va ozodligi uchun jon bergan tarixiy shaxs –Shiroq afsonasi asosida tayyorlangan sahna koʻrinishi barcha bolajonlarning eʼtiborini tortdi.

Tadbir davomida tashkilot tarbiyalanuvchilari oʻrtasida kichik musobaqa ham oʻtkazildi. Unda ishtirok etgan bolalar oʻzlarining epchil va chaqqonliklarini koʻrsatishdi. Shundan soʻng bolalar turli kasblarning maxsus kiyimlarini kiyib, kasblarga taʼrif berib, ularga mos sheʼrlar aytishdi.     

Raqs toʻgaragi oʻquvchilari tomonidan ijro etilgan Vatanparvarlikni tarannum etuvchi kuy-qoʻshiqlar barchaga koʻtarinki ruh hamda yuqori kayfiyat baxsh etdi.

Mustaqil davlatimiz bayrogʻi tinch va osoyishta, ozod hamda erkin hayotimiz, yorugʻ kelajagimizga boʻlgan ishonchimiz timsolidir. Davlat ramzlari Vatanimizning muqaddasligini, yurt manfaati har narsadan ustunligini anglatadi.

Bayrogʻimizning balandligi yurtimizning obroʻ-nufuzi yuksakligidan dalolatdir. Sarbaland qaddimiz va qadrimiz timsolini hamisha eʼzozlaylik va boshimiz uzra baland koʻtaraylik!

Iroda Erdosheva, jamoatchi muxbir