“SOGʻLOM ODAMGINA BAXTIYoR BOʻLA OLADI”

Mamlakatimizda amalga oshirilayotgan jamiki oʻzgarishlar, bunyodkorliklar, islohotlar zamirida inson omiliga eʼtibor, uning baxtiyor, farovon va oʻz hayotidan rozi boʻlib yashashiga erishishdek ezgu maqsadlar mujassamdir.

Bu borada soʻz yuritganda, eng avvalo, aholiga tibbiy xizmat koʻrsatish sifatini oshirishga alohida eʼtibor berilayotganini tilga olish joiz. Inson hayotda tetik, oilasi tinch, farzandlari sogʻlom boʻlsagina chinakam baxtiyor boʻlishi mumkin. Bemor shohdan sogʻlom gado baxtlidir, degan xalq naqli bejiz aytilmagan.

Shu boisdan ham 2017-yil 29-martda “Oʻzbekiston Respublikasida birlamchi tibbiy-sanitariya yordami muassasalari faoliyatini tashkil etishni yanada takomillashtirish chora-tadbirlari toʻgʻrisida” qabul qilingan Prezident Qarorida sogʻliqni saqlash sohasini tubdan isloh qilish, uning birlamchi boʻgʻinidagi boʻlinmalari va qishloq vrachlik punktlari faoliyatini tubdan takomillashtirish yuzasidan amalga oshirilishi lozim boʻlgan ishlar belgilab berilgan edi.

Oʻtgan davr mobaynida bu borada olis-olis hududlarda ham aholiga eng yaqin tibbiy boʻgʻinlarda qator oʻzgarishlar qilindi. Qarorga muvofiq birlamchi tibbiyot muassasalarida koʻrsatilayotgan tibbiy xizmatlar sifati oshirilib, aholi kasallanish darajasini pasaytirish maqsadida profilaktika ishlari yaxshilanmoqda. Muassasalarda malakali mutaxassislarning faoliyat yuritishi taʼminlanmoqda.

Xitoy ovulida joylashgan 6-sonli qishloq oilaviy poliklinikasi Xitoy, Boʻzyop ovullari va  Namuna, Toryop mahallalarida istiqomat qiluvchi 18189 nafar aholiga xizmat koʻrsatadi.

Hududda 1 yoshgacha boʻlgan bolalar 338 nafar, 14 yoshgacha boʻlgan bolalar 4646 nafar, 18 yoshgacha boʻlganlar 5119 nafarni tashkil etadi. Shuning oʻziyoq qishloq oilaviy poliklinikasi tibbiyot xodimlari zimmasida nechogʻlik masʼuliyatli vazifalar borligini anglatadi. Negaki sogʻlom hayot tarzi, tibbiy madaniyat, sanitariya-gigiyena qoidalarini oʻzlashtirish, oʻz sogʻligʻi uchun har kimning oʻzi javobgarlik tushunchasi bolalikdan singdirilishi va tarbiyalanishi lozim. Muassasada pediatr Shohsanam Begmonova, jarroh Tojiboy Bozorboyev, stomatolog Shuhrat Davletov, laborant Dinora Yavidova, umumiy amaliyot shifokorlari Omonboy Yeluboyev, Xosiyat Xudoyberganovalar aholiga sifatli tibbiy xizmat koʻrsatish bilan bir qatorda kasalliklardan saqlanish borasida targʻibot-tashviqot ishlarini ham olib borishayapti.

Muassasaga tashrif buyurgan bemorlarga zarur hollarda ultratovush tekshiruvi, qon va peshob tahlillarini tekshirish orqali aniq tashhis qoʻyiladi va davo muolajalari amalga oshiriladi. Har qanday tashhis natijalarini aniqlatish uchun hatto tuman markaziga ham ovora boʻlib yurmay, oʻz hududida kasalliklariga aniq tashhis qoʻyilib, samarali davolanayotganidan, ayniqsa, keksalar juda minnatdor.

- Aholiga koʻrsatilayotgan tibbiy xizmat sifatini oshirish 6-sonli qishloq oilaviy poliklinikamiz shifokorlarining asosiy faoliyati mezoniga aylangan – deydi QOP mudirasi Gavhar Qoʻchqarova biz bilan suhbatda. – Chunki sogʻlom odamgina baxtiyor boʻla oladi.

O.RAJABOVA.