Tumanda aholining sanitariya-epidemiologik osoyishtaligi taʼminlanmoqda

Atrof-muhit tozaligi va inson salomatligi bir-biriga uzviy bogʻliqdir. Shu bois sogʻlom turmush tarzini yaratish, aholining sanitariya-epidemiologik osoyishtaligini taʼminlash juda muhim hisoblandi.

Sanitariya-epidemiologik osoyishtalikni taʼminlash, hududga yuqumli va karantin infektsiyalarining kirib kelishi, tarqalishining oldini olish boʻyicha tuman Davlat Sanitariya epidemiologiya nazorat markazi tomonidan tegishli chora-tadbirlar muntazam yoʻlga qoʻyilgan. Shuningdek, tibbiyot xodimlari va hamkor tashkilotlar bilan birgalikda salomatlikka zararli taʼsir koʻrsatuvchi omillarning oldini olishga qaratilgan ogohlantiruvchi sanitariya nazorati ham oʻtkazilib borilmoqda.

Tumanimizning barcha hududlarida sanitariya­-gigiyenik va epidemiyaga qarshi kompleks chora-tadbirlar samarali amalga oshirilmoqda. Yuqumli, oʻta xavfli viruslarning kirib kelishi, tarqalishining oldi olinmoqda. Natijada aholining sanitariya-epidemiologik osoyishtaligi va xotirjamligi taʼminlanmoqda.

Tumandagi Sanitariya epidemiologiya nazorat markazi tarkibiy tuzilmasi sanitariya-gigiyena, epidemiologiya, dezinfektsiya, parazitologiya boʻlimlaridan iborat. Shuningdek, u yerda kommunal gigiyenasi, bolalar va oʻsmirlar gigiyenasi, ovqatlanish gigiyenasi, ekologiya, mehnat gigiyenasi boʻlinmalari ham mavjud. Turli namunalar tekshiruvdan oʻtkaziladigan sanitariya-gigiyena, bakteriologiya va parazitologiya laboratoriyalari ham faoliyat koʻrsatadi.

Oʻtgan davr mobaynida markaz zamonaviy axborot texnologiyalari bilan yetarlicha taʼminlandi va internet tarmogʻi orqali elektron axborot almashinuvi yoʻlga qoʻyildi. Laboratoriyalarda joriy taʼmirlash ishlari amalga oshirilib, yangi asbob-uskunalar, jihozlar oʻrnatildi.

Markazda 29 nafar turli toifadagi shifokorlar, 68 nafar oʻrta tibbiyot xodimlari ishlashadi. Faoliyat davomida asosan tegishli nizom va Oʻzbekiston Respublikasining “Fuqarolar sogʻligini saqlash toʻgʻrisida”gi, “Aholining sanitariya-epidemiologik osoyishtaligi toʻgʻrisida”gi Qonunlari, Prezidentimizning farmon va qarorlari, hukumat qarorlari, vazirlik va yuqori tashkilotlar buyruq va huquqiy-meʼyoriy hujjatlar boʻyicha ish olib boriladi.

Nazorat markazi tomonidan aholi salomatligiga zararli taʼsir koʻrsatuvchi omillarning oldini olishga qaratilgan ogohlantiruvchi sanitariya nazorati turli obʼektlarda oʻtkaziladi. Atrof-muhit monitoringi davomida ochiq suv havzalari, atmosfera, tuproqning har xil kimyoviy, biologik chiqindilar, mikroblar, parazitar kasalliklar chaqiruvchilar bilan ifloslanishining oldini olishga eʼtibor qaratiladi. Muntazam ravishda yoʻlga qoʻyilgan nazoratlarda kommunal, madaniy-maishiy, umumiy ovqatlanish va savdo obʼektlarida, umumtaʼlim muassasalarida, sanoat ishlab chiqarish korxonalarida tozalik va sarishtalikka qatʼiy rioya qilinishi tekshirilib boriladi. Bu bilan hududda sanitariya holat yaxshilanishiga erishilib, aholining sanitariya madaniyati oshirilishi taʼminlanmoqda.

Joriy yilning 7 oyi davomida roʻyxatga olingan 812 ta obʼektning 85 tasida laboratoriya instrumental usulida sanitariya nazorati oʻtkazildi. Obʼektlardan sanitariya-gigiyena laboratoriyasiga 2 100 ta namuna olindi va 466 tasi sanitariya talablariga javob bermasligi aniqlandi. Bakteriologik laboratoriyaga 1 374 ta namuna olingan boʻlib, 23 tasi sanitariya talablariga javob bermasligi maʼlum boʻldi. Mavjud kamchiliklarni bartaraf qilish maqsadida tegishli chora-tadbirlar ishlab chiqildi va muassasa rahbarlariga qator tavsiyalar berildi.

Aholining toza ichimlik suvi bilan taʼminlanganlik darajasini aniqlash maqsadida tuman hududidagi vodoprovod tarmoqlaridan laboratoriyaga keltirilgan 335 ta namuna tekshirildi va 166 tasi tegishli talablarga javob bermasligi aniqlandi. Ushbu kamchiliklarni bartaraf qilish boʻyicha suv tarmoqlari korxonasiga tegishli tavsiyalar berilib, bajarilishi nazoratga olindi va zararsizlantirish ishlari olib borildi. Oʻtkazilgan tekshirishlar davomida sanitariya boʻyicha qonun buzilish holatlariga yoʻl qoʻygan 91 nafar javobgar shaxsga maʼmuriy ish qoʻzgʻatildi va belgilangan miqdorda jarima solindi. Shuningdek, sanitariya qoida va meʼyorlari talablariga javob bermaganligi uchun 9 ta obʼektning ish faoliyati vaqtincha toʻxtatildi.

Muntazam ravishda oʻtkazib borilgan barcha tadbirlar samarali natija berib, oʻtgan davr mobaynida tumanda aholi, bolalar oʻrtasida oʻta xavfli va karantin, yuqumli kasalliklar qayd qilinmadi.

Tuman Davlat sanitariya epidemiologiya nazorat markazi tomonidan mavsumiy yuqumli va parazitar, kasbiy kasalliklarning oldini olish maqsadida tibbiy profilaktik tadbirlar oʻtkazilmoqda. Shuningdek, hududlarda obodonlashtirish va koʻkalamzorlashtirish ishlarini jonlantirish, sanitariya madaniyatini yanada oshirish boʻyicha ham targʻibot-tashviqot ishlari olib borilmoqda.

O.Xudoyberganova.