Jayxun ilhomlari

AYoL

Mehringizning adogʻi bormi,

Dunyo qalbingizdan bir tormi?

Qaddingizni tik qilgan qudrat,

Gʻururmi yo oʻzbaki ormi?

Siz hammaga keraksiz, ayol –

Dunyolarga tirgaksiz ayol!

Siz Toʻmaris izidagi gul,

Baxshilarning sozida bulbul.

Har dilga xush, zulflari sunbul –

Oʻzbekiston bagʻridagi gul!

Vatanga keraksiz, keraksiz, ayol –

Dunyolarga tirgaksiz, ayol!

Jahongir NURIMOV.

TABIAT JILOLARI

Tong sahar esadi mayin shabada,

Dillarni-dillarga bogʻlaydi har on.

Gulzordagi goʻzal gʻuncha labida,

Bolari oʻz davrin suradi shodon.

Soylardan suv toshib dalaga shoshar,

Toʻlqinlar shiviri soylarga jilo.

Dalalarga singib hayot ulashar,

Quyoshga intilib oʻsar gul – lola.

Bogʻ tomon buraman asta yuzimni,

Chugʻurlab, qushchalar sayraydi shodon.

Mayin kuy, manzara bogʻlab koʻzimni,

Koʻnglim goʻzallikdan topadi orom.

Kuyidan mast boʻlar telba yuragim,

Iforin sochadi bogʻ-u chamanlar.

Joʻsh urar dilimda ezgu tilagim:

- Qalblarda qolmasin zarra armonlar!

Dilafroʻz BOLTABOYeVA,

67-sonli maktabning “Yosh muxbirlar” toʻgaragi aʼzosi.

BIRINChI PREZIDENTIM

Mustaqillik binosiga qoʻyib bergan poydevor,

Tun-u kun xalqimizga boʻlib kelgan madadkor.

Yurt otasi degan ulugʻ nomga sazovor,

Yoʻlingizdan ketyapmiz hamisha ildam-u hushyor.

Bu karvonning sarbonisiz, bu bogʻlarning bogʻboni,

Tinchlik hamda farovonlik binosining meʼmori.

Har bir aytgan soʻzlaringiz hayotimiz shiori,

Siz tufayli bugun Vatan hur insonlar diyori.

Qoldi sizdan buyuk meros – ozod, obod hur Vatan,

El-u yurt ahil boʻldik, har ishda bir jon-u bir tan.

Ruhingiz qoʻllab turar bizni doim, bilaman,

Qoʻllab turing siz bizni olisdagi jannatlardan,

Siz sababli chunki bugun kam emasmiz hech kimlardan.

Barchinoy QURBONBOYeVA.

PORAXOʻR

Oʻtgan zamon ertak va tarix boʻldi,

Nega poraxoʻrning ishlari “yurdi”.

Ammo koʻplar bu illat jabrin koʻrdi.

Hatto ogʻzidagi oshini berib...

Xalq ezildi, boʻlmadi hech bir chora,

Ishlari bitmasdi bermasa pora.

Berganin aytolmay tili boʻldi lol.

Foydalandi shundan poraxoʻr battol.

Hech sohada boʻlgani yoʻq nazorat,

Arz qilsa kim, eshitdi koʻp haqorat.

Korruptsiya ezdi necha koʻngilni,

Noqonuniy ishlar keltirib kulfat.

Xudoga ming shukur, zamon oʻzgardi,

Qonunlar xalqparvar, xayot oʻzgardi.

Poraxoʻr panada, koʻtarolmas bosh,

Korruptsiya bugun boʻlayotir fosh!

Erkin ISMOILOV,

Xizr eli mahallasi.

HAYoT GOʻZAL

Men dunyoni sevaman,

Goʻzal hayot bogʻlarin.

Xayollarni quvaman,

Kuylab quvonch chogʻlarin!

Qarang, shunchalar goʻzal,

Hayotning har lahzasi.

Barcha soʻzlardan afzal,

Amu elim lahjasi!

Sheʼr bitaman sevinib,

Oʻz ona tilim bilan.

Dilimdan gʻam yuvilib,

Yashayman orzu bilan.

Asaloy FAYZULLOYeVA,

55-sonli maktab oʻquvchisi.

KUZ NEʼMATLARI

Yaproqlar sargʻaygan,

Oltin rang onlar.

Qamashtirib koʻzlarni

Bagʻriga chorlar.

Dehqon bobo shod boqar,

Turli-tuman mevalar.

Olma-uzum va anor

Bozorimiz toʻldirar.

Qiz-u juvon dalada,

Paxta terar – “oq oltin”.

Entikib tong pallada,

Men dalaga yoʻl oldim.

Hasharga chiqib xalqim,

Bir-birini qoʻllashar.

Rejadan oshganlarga,

Ezgu tilak yoʻllashar.

Kuz neʼmati yetilgan

Dala bagʻri – ish fasli.

Chanoqlarga egilib,

Rizq terar xalqim asli.

Shohsanam OʻROZALIYeVA, “Namuna” mahallasi.

QIZIMGA

Qizim – qizil oltinim,

Xudo bergan qimmatim,

Qoʻlimdan ishim olgan,

Asal qizim, jon qizim.

Oʻzi goʻzal, yaxshi xulq,

Pazanda, chevar qizim.

Onasining erkasi,

Yoqamdagi qunduzim.

Ilohim bersin baxting,

Gulgun kamolga yetgin.

Mudom olqish yoʻldoshing,

Ilm yoritsin yoʻling.

Tursungul MATSAFOYeVA, 20-maktab oʻqituvchisi.