IFTIXOR

Mehmonga dil ochib, tutar qoʻshqoʻllab tuz-non,

Har nafas, har makon mehru oqibat ayon.

Mehnati gʻayratidan gul, bogʻ-boʻston har yon

Oʻzbek bir tanti, saxiy xalq, bir shirin zabon,

Har oʻgʻli polvon, har qizi – otini zamon,

Jonajon Oʻzbekistonim, mangu boʻl omon!

Xalqim deb yonib yashamoq – dil shioridan,

Zarra ham qolmas Yurtboshi eʼtiboridan,

Har yumush rejasi sobit, barqaroridan,

Kelmoqda mushkulday ishlar ham baroridan,

Ochgusi Borsa Kelmas ham gʻaznasin nihon,

Jonajon Oʻzbekistonim, mangu boʻl omon!

Qurigan dengiz oʻrnida choʻllarni koʻrdik...

Farosat, ilmu zakosi moʻllarni koʻrdik,

Ochildi qoʻshni-qardoshga yoʻllarni koʻrdik,

Birlashgan dillarni koʻrdik, qoʻllarni koʻrdik.

Orolning tirilganini koʻradi Jahon!

Jonajon Oʻzbekistonim, mangu boʻl omon!

Izlab ilm oʻrganmakning eng zoʻr uslub turin,

Bogʻchaga, maktabga, oliy taʼlimga oʻrin,

Yoʻllagan allomalarning fanga shuurin,

Farzandlar boshiga fido, sochguvchi nurin –

Sen oʻzing bir oftob, Oʻzing bir mohitobon,

Jonajon Oʻzbekistonim, mangu boʻl omon!

Faxrga arzir – salomat boʻlsa imonim,

Jahonda sahihi Kubro bobokalonim,

Xalqimning manfaati – har bilgan farmonim,

Kun-kundan taraqqiy turmush, odil zamonim,

Xizmatda “Davlat – xalq uchun!” boʻlarkan hamon,

Jonajon Oʻzbekistonim, mangu boʻl omon!

Maftundir olam hofizu soz goʻyosiga,

Halvodek meva, zar tuproq, har giyosiga,

Iftixor Magʻribu Mashriq – bor dunyosiga,

Atom ham kelsa xizmatga nur – ziyosiga,

Jahonga koʻz-koʻz boʻlasan – komildir imon,

Jonajon Oʻzbekistonim, mangu boʻl omon!

Istiqlol bayrogʻin tutsak qoʻllarda mahkam,

Bergusi bahoni Vaqt – eng Oliy hakam,

Muammo qolmas, yechilur tugunlar kam-kam

Iqboli yoshlarning beshta tashabbusda jam.

Demak bu eng shonli yoʻldir kelajak tomon,

Jonajon Oʻzbekistonim, mangu boʻl omon!

Bagʻri keng yurtda birodar hamma millatlar,

Tugalar yulgʻich, poraxoʻr – turli illatlar,

Tinchlik shiorimiz-la topdik shuhratlar,

Barobar barchaga Qonun – mamnun Elatlar

Bosh tik, koʻz tiyrak, til burro, yoʻllarim ravon,

Jonajon Oʻzbekistonim, mangu boʻl omon!

Tursunboy ABDULLAYeV.