Tabiatga eʼtiborsizlik jinoyatga boshladi

Atrofimizni oʻrab turgan yashil olam – milliy boyligimiz. Bu haqda Oʻzbekiston Respublikasi Konstitutsiyasining 56-moddasida: "Fuqarolar atrof tabiiy muhitga  ehtiyotkorona  munosabatda boʻlishga majbur” ekanligi qayd etilgan. Lekin ana shu fuqarolik burchini hamma ham tushunavermaydi yoki tushunib turib, oʻzlarini bilmaganga solishadi.

"Qangli” ovulida yashovchi fuqaro Oʻtamurod Polvonov (ism-sharifi oʻzgartirildi) ovul hududida tabiiy ravishda oʻsib turgan 345 tup toʻrangʻil daraxtini hech qanday ruxsatsiz chopib, qurilish ashyosi sifatida foydalanmoqchi boʻlgan va oqibatda tabiatga 31 321 646 soʻmlik zarar yetkazgan.

"Doʻsjon bobo” fermer xoʻjaligi joylashgan hududda istiqomat qiluvchi yana bir fuqaro Abror Hamidov esa 2013-yilning 5-sentyabr kuni 73 tup toʻrangʻil daraxtini chopib, tabiatga jami 16 228 269  (oʻn olti million ikki yuz yigirma sakkiz ming ikki yuz oltmish toʻqqiz) soʻm miqdorida zarar yetkazgan.

Afsuslanarli tomoni shundaki, har ikkala fuqaro ham biron marta bu daraxtlar parvarishi bilan shugʻullanmay, tabiiy holda oʻsib, atrof-muhitga goʻzallik baxsh etib turgan daraxtlarni noqonuniy ravishda chopib, moddiy manfaat koʻrishni rejalashtirganlar. Natijada, Qoraqalpogʻiston Respublikasi hududida hayvonot va oʻsimliklar dunyosini muhofaza qilish toʻgʻrisidagi qonun hujjatlariga xilof ravishda jinoyat sodir etganlar.

Jinoyat ishlari boʻyicha tuman sudi tomonidan oʻsimlik dunyosidan foydalanish tartibini buzib, tabiatga juda katta miqdorda zarar yetkazganlari uchun Oʻtamurod Polvonovdan 31 321 646 (oʻttiz bir million uch yuz yigirma bir ming olti yuz qirq olti) soʻm, fuqaro Abror Hamidovdan 16 228 269 (oʻn olti million 228 ming 269) soʻm davlat foydasiga undirib olindi.

Konstitutsiyamizda qayd etilganidek, atrof tabiiy muhitga ehtiyotkorona munosabatda boʻlish har birimizning fuqarolik burchimizdir. Buni unutishga aslo haqqimiz yoʻq.

M.Babatayev,