HAM RAIS, HAM FERMER

Bugun yurtimizda dehqonchilik madaniyatini oshirishga astoydil intilayotgan , dehqonchilikda  yuksak natijalarga erishib, oʻz faoliyati bilan barchaga namuna boʻlayotgan fermerlar koʻplab topiladi.  Qilichboy ovulida faoliyat koʻrsatayotgan “Yaqubboy Ashirov” fermer xoʻjaligi  raisi, yer bilan tillasha oladigan, qishloq xoʻjaligi sohasida ulkan tajribaga ega Yoqubboy Ashirov ham ana shundaylarning biri.
2009-yildan buyon faoliyat koʻrsatayotgan koʻptarmoqli xoʻjalikda mahsulot yetishtirish rejalari barcha sohalar boʻyicha ado etib kelinayapti.
Mazkur fermer xoʻjaligida hozirgi kunda 138 gektar  ekin maydoni mavjud. Shundan 86 gektariga oʻtgan yillar davomida urugʻlik chigit ekilib, koʻzlanganiday hosil yetishtirildi.Ayni kunda  joriy yilgi ekinlarni ekish ishlari qizgʻin bormoqda.
Shuningdek, fermer xoʻjaligi yerlarining shoʻrlanish darajasi yuqori boʻlishiga qaramasdan soʻnggi  yillarda bugʻdoy ekilgan 18 gektar maydondan olingan hosildorlik 45-50 tsentnerga koʻtarildi. Bulardan tashqari soya, kartoshka, beda ekinlari ham yetishtirilmoqda.
Fermer xoʻjaligi hududida 4.5 gektar intensiv bogʻ, issiqxona,   tabiiy baliq havzasi, bugʻdoy va sholi tegirmonlari tashkil etilgan. Shuningdek,  20 bosh qoramol, 35 quti asal ari boqilmoqda. Bugungi kunda ularning sonini koʻpaytirishga ham alohida eʼtibor berilmoqda.     Fermer xoʻjaligi barcha dalalariga ekin ekish,parvarishlash, oʻrib- yigʻib olishda ishlatiladigan  zarur texnikalarga ega. Yoqubboy Ashirov  xoʻjaligi daromadidan har yili hududdagi kam taʼminlangan oilalarga moddiy yordamlar berib , aholini xursand qilayapti.
Fidoyi, tinib-tinchimas fermer Yo. Ashirov Qilichboy MMTPga  ham raislik qilmoqda.U kabi yurtdoshlarimiz dasturxoni toʻkin boʻlishiga bel bogʻlagan insonlar koʻpayaverishini tilab qolamiz.  

Otabek Rahimboyev,
QQDU talabasi.