Armiya safida xizmat qilish - har bir yigit orzusi

Harbiy libos kiyib, oʻz ona Vatanini qoʻriqlashni orzu qilmagan, jangovar safda jasoratlar koʻrsatishni istamagan yigitning oʻzi yoʻq. Chunki mamlakatimiz tinchlik-osoyishtaligini koʻz qorachigʻiday asrab-avaylash har bir yigitning harbiy majburiyati, burchi.

Men oilada yolgʻiz oʻgʻil boʻlganim uchun ota-onam muddatli harbiy xizmatga emas, muqobil harbiy xizmatga borishimni maslahat berishdi. Nihoyat orzuim ushalib, 2013-yilning 19-oktyabridan 19-noyabrigacha milliy Armiyamiz safida xizmat qilib keldim. Shu qisqa bir oylik harbiy hayot mening dunyoqarashimni juda kengaytirdi.

Eng avvalo istiqlol yillarida shakllangan va taraqqiy etgan milliy armiyamizning yuksak salohiyatini chuqurroq anglab yetdim. Shu aziz vatanimizning sarhadlarini koʻz qorachigʻiday asrab, tinchlik-osoyishtaligini taʼminlab kelayotgan harbiy soha xodimlariga, armiyaga hurmatim yanada ortdi, ona yurtim, yaqinlarim, doʻst-birodarlarimni qadrlashni oʻrgatdi. Har kungi ertalabki badantarbiya mashqlari, harbiy taktik mashgʻulotlar meni yanada chiniqtirdi. Mustahkam harbiy intizom irodamni charxladi.

Men xizmat qilgan guruhga komandirlik qilgan serjant Hakim Aytekov, kichik serjant Anvar Shodiyevlardan olgan saboqlarim bir umr yodimda qoladi.

Shuningdek, birga xizmat qilgan harbiy doʻstlarim mangʻitlik Alisher Yangiboyev, nukuslik Xoʻjaniyoz Otajonovlar bilan bir oy muddatda bir oila farzandlariday ahil, qadrdon boʻlib qoldik. Ular bilan hozir ham hol-ahvol soʻrashib, bir-birimizdan xabardor boʻlib turamiz.

Men hozir avvalgi faoliyatimni davom ettirib, "Mangʻit matbaasi” xususiy korxonasida huquqiy maslahatchi va kompyuter mutaxassisi boʻlib ishlayapman. 14-yanvar – Vatan himoyachilari kuni bu yil mening hayotimda oʻzgacha mazmun-maʼno kasb etmoqda. Chunki men Vatanim oldidagi yigitlik burchimni adoetdim, tinchlik-osoyishtaligimizga oz boʻlsa-da hissamni qoʻshdim.

Xizmat davrining har bir soniyasi masʼuliyatli va sharafli askarlarimizni, harbiy soha xodimlarini, oʻzim xizmat qilgan 4-guruh komandiri, serjant Hakim Aytekov, komandir yordamchisi Anvar Shodiyevlarni Vatan himoyachilari kuni bayrami bilan chin qalbimdan tabriklayman.

Mahmudjon YOʻLDOShEV,

sobiq oddiy askar.