BOʻSM ochiq birinchiligida amudaryolik kurashchilar umumjamoa hisobida 1-oʻrinni egalladi

Joriy yilning 9-fevral kuni tumandagi Bolalar va oʻsmirlar sport maktabida soʻz mulkining sultoni Nizomidin Mir Alisher Navoiy tavalludining 578-yilligiga bagʻishlangan kurash boʻyicha BOʻSM ochiq birinchiligi musobaqalari boʻlib oʻtdi. 2003-2005-yillarda tugʻilgan bolalar va oʻsmirlar hamda shu yosh toifasidagi qiz bolalar ishtirok etgan mazkur musobaqalarda Nukus shahri, Shumanoy tumanlaridan hamda amudaryolik 100 nafardan ziyod oʻgʻil-qizlar turli vazn toifalarida oʻzaro kuch sinashdilar.

Ulugʻ davlat va jamoat arbobi, buyuk soʻz sanʼatkori Alisher Navoiy dahosiga cheksiz hurmat va ehtirom tariqasida oʻtkazilgan doʻstona bellashularda umumjamoa hisobida tumanimiz BOʻSM sportchilari 1-oʻrinni, Nukus shahri sportchilari jamoasi 2-oʻrinni egaladilar. 3-oʻrin esa Shumanoy tumani sportchilariga nasib etdi.

Oʻgʻil bolalar oʻrtasida Nukus shahridan Ilyos Qodirbergenov va Javlon Moschanovlar, Amudaryo tuman BOʻSM oʻquvchilaridan Jahongir Qozoqboyev, Xursand Qurboniyozov, Abbos Soatov, Jahongir Pajabov, Ogʻabek Gulmirzayev, Zokir Boltaboyev, Pasul Masharipov va Nodirbek Yoʻldoshevlar oʻz vazn toifalarida faxrli 1-oʻrinni egalladilar.

Qiz bolalar oʻrtasida boʻlib oʻtgan bellashularda 33 kg vazn toifasida Amudaryo BOʻSM oʻquvchisi Dinora Xudoyorova va Nukus shahridan Diana Aqpolat 1-oʻrin sohibalari boʻlishdi.

Musobaqa gʻoliblari tashkilotchilar tomonidan medallar, Diplom va qimmatbaho sovgʻalar bilan taqdirlandilar.

Pobiya YOʻLDOShEVA.