Veterinariya xizmatlari sifatini yanada yaxshilash maqsadida koʻrgazmali seminar tashkil qilindi

Bugungi kunda tumanimiz boʻyicha 11 ta zooveterinariya punktlari mavjud. Ularda koʻrsatilayotgan veterinariya xizmati sifatini yanada yaxshilash maqsadida tuman Veterinariya boʻlimi tomonidan koʻrgazmali seminarlar tashkil qilinmoqda. Dastlabki seminar 4-fevral kuni Bobur nomli ovuldagi Jumur ovul mahallasida joylashgan zooveterinariya punktida tashkil qilindi.

Aytish kerakki, hududlardagi 11 ta zooveterinariya punktlariga qarashli sunʼiy urugʻlantirish shohobchalari, hududiy “Nasl xizmat” masʼuliyati cheklangan jamiyati tomonidan tuman boʻyicha 8 ta sunʼiy urugʻlantirish nuqtalari tashkil etilgan boʻlib, bugungi kunda ular toʻliq faoliyat yuritib kelmoqdalar va 2018-yil davomida tuman boʻyicha 26 ming 812 bosh sigirlar sunʼiy urugʻlantirildi.

Tuman veterinariya boʻlimi tomonidan qishloq xoʻjalik va uy xayvonlarini kasaliklardan himoya qilish, aholini odam va xayvonlar uchun umumiy boʻlgan kasaliklardan muhofaza qilish, tuman hududini boshqa hududlardan xayvonlarning yuqumli kasalliklari kirib kelishidan muhofaza qilish, yagona davlat veterinariya nazoratini amalga oshirish, atrof muhitni himoya qilishning veterinariya-sanitariya muammmolarini xal etish, veterinariya xodimlarini tayyorlash va ularining malakalarini oshirish kabi ishlar muvaffaqiyatli amalga oshirilmoqda.

Bugungi kunda tuman hududidagi fermer hoʻjaliklari va aholi qaromogʻida 143 ming 427 bosh yirik shoxli mol, 39 ming 491 bosh sigirlar, 94 ming 358 bosh qoʻy va echkilar, 861 ming 153 bosh parranda, 578 bosh ot, 8 ming 900 bosh itlar roʻyxatga olingan boʻlib, ularga veterinariya xizmatlari koʻrsatilmoqda.

Veterinariya boʻlimida 29 nafar mutaxassis faoliyat koʻrsatib kelmoqda. Shundan 9 nafari oliy, 20 nafari oʻrta maxsus maʼlumotli mutaxassislardir. Sohani rivojlantirish va veterinariya xizmati koʻrsatish darajasini yaxshilash maqsadida tuman veterinariya boʻlimi mutaxassislarini ragʻbatlantirishga alohida eʼtibor berilayapti. Shu maqsadda Qoraqalpogʻiston Respublikasi Veterinariya qoʻmitasi va tuman hokimligi tomonidan veterinariya sohasida faoliyat yuritayotgan xodimlarga 2 ta xizmat mototsikli, 15 ta maxsus kiyim, 14 ta termojamlama, 25 ta veterinariya sumkasi va 19 ta xizmat velosipedlari berildi.

Oʻz navbatida boʻlim xodimlari ham zimmalariga yuklatilgan vazifalarni aʼlo darajada ado qilish yoʻlida fidoyilik bilan mehnat qilmoqdalar.

Seminarda zooveterinariya punktlarida yoʻl qoʻyilayotgan kamchiliklarni bartaraf qilish, ular orqali koʻrsatilayotgan xizmatlar sifatini yanada yaxshilash boʻyicha tavsiyalar berildi va tegishli chora-tadbirlar belgilab olindi.

Bahodir Bekchanov, tuman Veterinariya boʻlimi boshligʻi oʻrinbosari.