Jayxun ilhomlari

QANOATLI BOʻL

(Maslahat)

Bobolar duo qilsa,

“Qanoatli boʻl”, – derlar.

Qanoatli insonda,

Imon-insof jam boʻlar.

Qanoat oʻzi nedir,

U qandayin fazilat?

Qanoat – nafsni tiyish,

Neʼmatlarga shukr etish.

Kim qanoat-la yursa,

Baxt-u omad unga yor.

Hayoti tinch-osuda,

Huzur-halovatga yor.

Nafs – asli yovuz shayton,

Qanoatning dushmani.

Nafs yoʻliga kirganlar,

Odamzotning shaytoni.

Yelkangga chiqqan shayton,

Buyurar: “tez chop”, deydi.

“– Mol yigʻishdan toʻxtama,

Yana koʻproq top”, deydi.

Qanchalik topgan bilan

Sira koʻzing toʻymaydi.

Nafs qurgʻur, hech qachon

Oʻz erkingga qoʻymaydi.

Agar boʻlsa amali,

Har kimsaning qoʻlida.

Hiyla-nayrang ishlatar,

Pul topishning yoʻlida.

Kim nafsini tiymasa,

Oʻz nafsiga boʻlar qul.

Nafs shayton, u – dushman

Ekanligin bilmas ul.

Qanoat ne, nafs nedir?

Aytdim men takror-takror.

Qanoat ber barchaga,

Karamli Parvardigor.

Qanoatda sobitlar,

Boy boʻladi bir kuni.

Chiqarib yaxshi otlar,

Charogʻondir kun-tuni.

Odil Ollohyor oʻgʻli,

Chordara mahallasi.

VATAN

Daryo boʻlib toʻlib-toshgan,

Quyoshdayin nurin sochgan.

Oʻgʻlim, deya quchoq ochgan,

Vatanimsan, Oʻzbekiston!

Qoʻshiq aytib, chertsam torim,

Boyligimsan, sensan borim.

Nomusimsan, mening orim –

Xazinamsan, Oʻzbekiston!

Osmonimda nur – oyimsan,

Goʻzalligim, chiroyimsan.

Tugʻilib-oʻsgan joyimsan,

Onajonim, Oʻzbekiston!

Porlab turgan chirogʻimsan,

Tengsiz chaman, gulbogʻimsan.

Mening jon-u jahonimsan,

Tanamda jon – Oʻzbekiston!

Aydos IBODULLAYeV.

JASUR OʻGʻLON

Vatanin qoʻriqlar har on,

Ayamaydi aslo jonini.

Tinchlikni asrovchi qoʻrgʻon,

Alpomishdek jasur oʻgʻlon.

U bor ekan, obod har yon,

Tiniq, musaffo osmon.

Safda turar doim sergak,

Ona yurtga udir tirgak.

Vatanimiz oʻgʻlonlari,

Kuch-qudratda mard-u maydon.

Tinchligimiz posbonlari,

Ular yurtga har dam qalqon.

Ona yurtni asrash kerak,

Vatan, deya urar yurak.

Shudir ular qasamyodi,

Dillarida Vatan yodi.

Iroda BEKIMBETOVA, 30-maktab oʻquvchisi.

Sogʻinch (Onamga)

Bu dunyoga kelib koʻrganim,

Quchogʻida jannat koʻrganim.

Duolarda baxtim soʻrganim –

Onajonim, Sizni sogʻindim!

Yoningizga boraman qachon,

Koʻrgim kelar Sizni, mehribon.

Yoʻllarimga koʻz tikkan inson–

Onajonim, Sizni sogʻindim!

Boringizga shukr aytaman,

Sogʻinch toʻla ashʼor bitaman.

Keling, Sizga bir soʻz aytaman:

Onajonim, Sizni sogʻindim!

Sobitdirman sarhadlarda men,

Qoʻriqlayman, tinch boʻlsin Vatan.

Yurtni asrash burching, deb aytgan,

Onajonim, Sizni sogʻindim!

Tun-u kunlar Sizni oʻylayman,

Yulduzlarga, oyga soʻzlayman.

Bagʻringizga bir kun qaytaman,

Onajonim, Sizni sogʻindim!

Qoraqalpoq eli bu yerlar,

Amudaryo tinmay shovullar.

Mangʻitlardan yozaman sheʼrlar,

Onajonim, Sizni sogʻindim!

Yuksaklarga intilib yana,

Ishonchingiz oqlab mardona.

Harbiylikka oʻqiyman, ona,

Onajonim, Sizni sogʻindim!

A.HOJIQURBONOV,

oddiy askar.

SENI GULIM, DEB...

(Askarning sevgilisiga maktubi)

Seni gulim, asrab-avaylab,

Bogʻboningga aylanolmadim.

Kunda ming bor oʻlib-tirilib,

Qalbingga hech bogʻlanolmadim.

Nelar qilsam, bari xatodir,

Xatolarga koʻmilib ketdim.

Uzr soʻrab, kechir, deb takror,

Oxir oʻzim begona boʻldim.

Bogʻbon boʻlib gullar iforin,

Oʻzgalarga etibman ato.

Endi zinhor gullar ekmasman,

Gullar meni qildilar ado

Raʼno RAHIMJON qizi, 38-maktab oʻqituvchisi.

ASKAR ONASINING DUOSI

Oppoq qor yogʻdi, qarang,

Vatan oqqa burkandi.

Quvonchlar berdi jarang,

Xalq bayramga shaylandi.

Yangi yil tantanasi,

Ulandi zoʻr ayyomga.

Askar oʻgʻlon onasi,

Qoʻlin ochdi duoga:

“Omon boʻlsin askarlar,

Hur Vatan posbonlari.

Ular bilan charogʻon

Ona yurt osmonlari”.

Malina MINTURGʻANOVA, 19-maktab oʻquvchisi.