Jayxun ilhomlari

ARChA QURAMIZ

(Bolalarga)

Kelingiz uyimizga,

Archa quramiz.

Qoʻl ushlashib hammamiz,

Qator turamiz.

Atrofida aylanib,

Qah-qah uramiz.

Doʻstlik, birodarlik

Zavqin suramiz.

Barcha millat bolasi

Doʻst-u joʻramiz.

Jaranglaydi davrada

“Yasha!” “Ura!”miz.

Qorbobo, Qorqiz bilan

Birga yuramiz.

Bergan sovgʻalarini

Baham koʻramiz

Saʼdulla XOʻJANIYoZOV.

Yana

Yana yarogʻlanib Yangi yil uchun,

Sinay sinmay qolgan qalamim kuchin.

Qogʻoz yozuviga soʻz saylab olgay,

Elga ehtirosim nusxasi qolgay.

Bayram kunin kutgan kuylar quyuldi,

Ayyom havosidan orom tuyuldi.

Besabr sogʻinch sanab kelar ayyomni,

Qarshi olgani qishdan ilhomni!

Salkam yetmish raqam umrimga qoʻshib,

Alloh bersa kuylay, Jayhunday joʻshib!

Jumaboy HIDOYaTOV.

QUVONChIM

Yangi yilda yasanib,

Chiroyli qiz boʻlaman.

Bayram kuni onamga,

Quvonch hadya qilaman.

Qadim-qadim anʼana,

Boʻlar katta tantana.

Qorga burkanib daraxt,

Muzlayapti sharshara.

Koʻzim quvnab ketyapti,

Chana uchgim kelyapti.

Qorboboning sovgʻasin,

Tezroq olgim kelyapti.

Muxlisa RAJABOVA, 12-maktab oʻquvchisi.

Ona Yurt bezandi

Ikki ming oʻn sakkiz – eng zoʻr yil boʻldi,

Islohotlardan koʻngillar toʻldi.

Ikki ming oʻn toʻqqiz – orzular bilan,

Kirib keldi goʻzal tuygʻular bilan.

Ona yurt bezandi oppoq qor yogʻib,

Qor gullarin taqdi bogʻlar, ajoyib.

Yam-yashil archani oʻrtaga qoʻyib,

Bolajonlar oʻynar qulochin yoyib.

Umida Yoʻldosheva,

19-sonli maktab oʻquvchisi.

Qish

Derazamga naqsh solib,

Yuzlarimni chimchilab.

Oppoq qorin yelkalab,

Ayoz bobom keldilar.

Oʻgʻil-qizlar juda shod,

Archamiz atrofida.

Qorbobomiz sovgʻasi

Yetadi barchasiga.

Yangi yilga yarashar,

Shodon oʻyin-kulgular.

Tinch, osuda Vatanda,

Har dilda baxt, orzular.

Shohsanam OʻROZALIYeVA,

Namuna mahallasi.

TABRIK

Yangi yilda yangi orzular sari,

Intilamiz yorqin kelajak sari.

Hayajonli, sirli, ajoyib bari,

Barchani qutlaymiz yangi yil bilan.

Tark etmasin hech qachon dillarni quvonch,

Ertangi kun uchun mustahkam ishonch.

Yuzlarda aks etar shirin tabassum,

Muhabbatga hamroz yuraklar masʼum.

Bayram shodligidan dillar yayrasin,

Baxtli kunlar madhi tutsin dunyoni.

Istiqlol yurtiga tinchlik yor boʻlsin,

Har dilni chulgʻasin doʻstlik ayyomi.

Ziyoda QUVVATOVA, Amudaryo akademik litseyi oʻquvchisi.

Yangi yil

Yangi orzular va yangi rejalar,

Yangi gʻoyalardan shodlanadi dil.

Ulugʻ maqsadlarning yoʻliga chorlab,

Kirib kelar mana, yana Yangi yil.

Butun insoniyat qalbida umid,

Butun borliq bugun qilar tantana.

Yangi yil orzular beshigi boʻlib,

Oppoq qorlar ila kelmoqda, ana!

Soat sayin yaqin kelar yangi yil,

Yaqinlashgan sayin hayajonda dil.

Hayot kitobida yana bir satr,

Oltin varaqlarga tushar eski yil.

Yangi yil kelgani – jumlai bashar

qoldirgani yana bir yoshin.

Insoniyat ulugʻ qalb bilan yashar,

Aslo, soʻndirmaydi dilda quyoshin.

Iroda YeRDOShEVA,

38-maktab oʻquvchisi.

BAYRAM ZAVQI

Zamin uzra yogʻar qor,

Oppoq qorda zoʻr viqor.

Yangi yil bongin chalib,

Otayotir oq tonglar.

Shodliklari bir jahon,

Changʻi uchar bolajon.

Oppoq qorga belanib,

Qizlar oʻynar qorboʻron.

Kuzataman zavq bilan,

Qanday goʻzal bogʻ-rogʻlar.

Olam qorga burkangan,

Oq roʻmol oʻrab togʻlar.

Derazamga naqsh solar,

Ayoz bobo kechalar.

Uy toʻrida tovlanar,

Bezatilgan archalar.

Zuhra AHMEDOVA.