Jayxun ilhomlari

KITOB BERING

Dunyolar tinch boʻlsin, desangiz,

Nur – ziyoga toʻlsin, desangiz.

Koʻp narsani bilsin, desangiz,

Kitob bering bolangizga Siz.

Kitob – bilim oʻrtogʻi, derlar,

Hayotingiz mayogʻi, derlar.

Yoʻlingizning chirogʻi, derlar,

Kitob bering bolangizga Siz.

Farzandingiz dono boʻladi,

Soʻzlarida maʼno boʻladi.

Balki Ibn Sino boʻladi,

Kitob bering bolangizga Siz.

Bilmaganin oʻqib biladi,

Yaxshi, ezgu ishlar qiladi.

Sizga olqish olib keladi,

Kitob bering bolangizga Siz.

Yashnar doim oʻng-u soʻlingiz,

Charogʻondur oydin yoʻlingiz.

Dard koʻrmagay bergan qoʻlingiz,

Kitob bering bolangizga Siz.

Qornimiz toʻq, yupun ustimiz,

Boʻlmaydi hech kam-u koʻstimiz.

Kitob sirdosh, odil doʻstimiz,

Kitob bering bolangizga Siz.

Nasib qilsa, oʻynab-kulasiz,

Faxr-u iftixorga toʻlasiz.

Savob ishni qilgan boʻlasiz,

Kitob bering bolangizga Siz.

Shomurod XOʻJANOV,

Doʻrman ovuli.

ONAJON

Onajon, aylanay qarogʻingizdan,

Oftobda qoraygan yonogʻingizdan.

Koʻzlarimga surtib, oʻzim oʻrgilay,

Mehnatda qabargan qadogʻingizdan.

Bizni ulgʻaytirib, duo qildingiz,

“Boshing toshdan boʻlsin bolam,” – dedingiz.

“Mehnatsiz boylikni koʻzlama zinhor,

Doim boʻlsin noning halol”,– dedingiz.

Bu kun qoʻlingizga hassa boʻlayin.

Oyogʻingiz tolsa, opichlab yuray.

Ona, poyingizga boshimni qoʻyib,

Izingiz gʻuborin koʻzimga suray.

Dunyoning tinchligin koʻzlovchi Sizsiz,

Farzand quvonchi deb qaddi bukiksiz.

Hayot falsafasi koʻzingizda jo,

Moziydan ertaklar soʻzlovchi ustoz.

Siz ona, Siz ustoz, Siz oddiy inson,

Suyagi mehnatda qotgan dehqonim.

Uyim farishtasi, koʻnglim sarvari,

Hovlimni toʻldirgan xushboʻy rayhonim.

Onajon, Siz uchun sheʼr yozmoq boʻldim,

Qalamim soʻz topmay boshini egdi.

“Dunyo tashvishlarin ortmoqlab yurgan,

Onalar buyuk va tabarruk” – dedi.

Goʻzalxon SAFARBOEVA,

13-maktab oʻqituvchisi.

Uctozim

Sinf rahbarim G.Yusupovaga

Oʻrgatdingiz ilmga,

Joyladingiz dilimga.

Quvonaman ustozim,

Foydam tegsa elimga.

Necha yillar oʻtsa ham,

Unutmaymiz aslo, hech.

Doim yodimizdasiz,

Eslaymiz erta-yu kech.

Oʻttiz ikki oʻquvchi,

Sizni qiynadik ancha.

Barchamiz birgalikda,

Rahmat aytamiz qancha.

Koʻrib qolsak baʼzida,

Biz shogirdlar taʼzimda.

Boʻling doim sogʻ-omon,

Sizga boʻlsin sharaf-shon!

Iroda YeRDOShEVA,

38-maktab oʻquvchisi.

RAYHON

Savlat toʻkib boʻylaring,

Olam oʻpar hidlaring.

Men koʻzingni nam koʻrdim,

Rayhon, nega yigʻlading?

Barglaring shamol silab,

Xush boʻying eslab-eslab

Bogʻimga sochilgan dam,

Rayhon, nega yigʻlading?

Iforingga choʻmilgan,

Qara, chamanim kulgan.

Bilsam, rayhon, koʻzingda,

Yosh emas, shabnam ekan!

Maftuna QURBONBOYeVA,

Choykoʻl ovuli.

Yashnasin dunyo!

Oradan oy-u yil, asrlar oʻtar,

Kimlardir tugʻilar, kimlardir ketar,

Kelajak bizlardan ezgulik kutar,

Obodlik, shodlikda yashnasin dunyo!

Tun qaʼrini tilib yulduz uchganda,

Boylik uchun kimdir jonin yoqqanda,

Sheʼrlarida Berdaq bobom aytgandek,

Ayting, yuz yildan soʻng ne boʻlur, dunyo?!

Tun-kun oh chekadi munglugʻ Orolim,

Sahro iskanjasida bagʻri – yarolim,

Qayon ketdi kiyik, saygʻoq, marolim,

Buning oqibati ne boʻlur, dunyo?

Taʼrifingiz yetib eldan-ellarga,

Tariximiz koʻchsin tildan-tillarga,

Koʻz surinsin har qadamda gullarga,

Kamalakka doʻnib ketsin bu dunyo!

Hayotda...

Oltin deganlaring mis boʻlib chiqar,

Gohi ekinlaring puch boʻlib chiqar,

Doʻstim, deb yurganing baʼzida iblis,

Ming bor aldanursan turfa hayotda.

Qarchigʻay ham qasd qilganin ololmas,

Baxt qushi bezsa takror qoʻnolmas,

El ichida hamma yaxshi boʻlolmas,

Yaxshi va yomonlar boʻlur hayotda.

Qalbing yaxshilikning boʻlsin anhori,

Shunda fazilat-u maʼno oqadi.

Yurakka dard solur doʻstning yomoni,

Yor-birodar topa biling hayotda.

Jabborbergan ShOMURODOV,

Qoʻngʻirot tumani.