Vijdon erkinligi kafolati

Hamma uchun vijdon erkinligi kafolatlanadi. Har bir inson xohlagan dinga eʼtiqod qilish yoki hech qaysi dinga eʼtiqod qilmaslik huquqiga ega.

Oʻzbekiston Respublikasi Konstitutsiyasining

31-moddasidan.

Vijdon erkinligi kafolati

Ona diyorimizda yashovchi barcha xalqlar hayotida muhim voqea boʻlgan Asosiy Qomusimizning qabul qilinganiga 21-yil toʻlishini nishonlash arafasida turibmiz. Maʼlumki, asosiy Qomusimizda inson omilining, inson huquqi, shaʼni va qadr-qimmatining eng oliy qadriyat, deb belgilab qoʻyilgani bugungi kunda yurtimizda amalga oshrilayotgan keng miqyosli islohotlar tufayli oʻz isbotini topmoqda. Unga asosan olib borilayotgan faoliyat va saʼy-harakat oʻzining ijobiy natijalarini bermoqda.

Asosiy Qomusimizda jinsi, millati, dini, irqi, yoshi, eʼtiqodi, ijtimoiy kelib chiqishidan qatʼiy nazar inson huquqlarini muayyan darajada kamsitadigan birorta ham moddaning yoʻqligi mamlakatimiz fuqarolarining din-u eʼtiqodda erkinligidan yaqqol dalolatdir.Bu – ajdodlarimizdan meros boʻlib kelayotgan milliy qadriyatlarimiz va bebaho anʼanalarimizning Bosh Qomusimizda beqiyos oʻrni borligini bildiradi. Ming yilliklar davomida ajdodlardan avlodlarga, ota-onalardan farzandlarga, vorislarga oʻtib kelayotgan va dunyoning hech bir burchagida takrorlanmaydigan ajoyib munosabatlarning, insoniy fazilatlarning Asosiy Qomusimizdan oʻrin egallagani tahsinga sazovor.

Diyorimizning barcha hududlarida istiqomat qiluvchi moʻmin-musulmonlar ushbu Qomusda belgilab qoʻyilgan huquq va erkinliklardan keng va teng, bemalol foydalanmoqdalar.

Maʼlumki, Oʻzbekiston Respublikasining Konstitutsiyasi umumxalq muhokamasidan oʻtgandan keyin 1992-yil 8-dekabr kuni qabul qilindi. Mazkur hujjatning qabul qilinishi mustaqil davlatimizning davlatchilik tarixida buyuk voqea boʻldi. Unga binoan 1998-yil 1-mayda qabul qilingan yangi tahrirdagi "Vijdon erkinligi va diniy tashkilotlar toʻgʻrisida”gi Qonunga asosan diniy tashkilotlarning huquqiy maqomi belgilab berildi. Mazkur Qonunning 5-moddasi eʼtiqod sofligi, diniy bagʻrikenglikka asoslangandir.

Mustaqil ona diyorimizda yashovchi barcha millat vakillarining urf-odat, anʼana va qadriyatlari huquq va erkinliklari kafolatlangan Asosiy Qomusimizda inson huquqlari, burch va vazifalari kabi vijdon erkinligi ham alohida belgilab qoʻyilgan. Asosiy Qomusimizning 31-moddasida "Hamma uchun vijdon erkinligi kafolatlanadi. Har bir inson xohlagan dinga eʼtiqod qilish yoki hech qaysi dinga eʼtiqod qilmaslik huquqiga ega. Diniy qarashlarni majburan singdirishga yoʻl qoʻyilmaydi” – deb alohida taʼkidlangan. Diyorimizda amaldagi qonunlar asosida turli dinlarga eʼtiqod qiluvchi va ularga eʼtiqod qilmaydigan fuqarolar, har xil eʼtiqodlarga mansub diniy tashkilotlar oʻrtasida oʻzaro murosa va hurmat oʻrnatilishi taʼ-minlangan.

Muborak islom dini qadriyatlari boy va buyuk maʼnaviyatimiz asosi ekanligini eʼtirof etib, Yurtboshimiz bunday deganlar: "Biz millatimizni mana shu muqaddas dindan ayri holda tasavvur qila olmaymiz. Diniy kadriyatlar, islomiy tushunchalar hayotimizga shu qadar singib ketganki, ularsiz biz oʻzligimizni yoʻqotamiz”.

Milliy Qomusimiz moddalarida nafaqat xalqchil tamoyillar, balki ming yillar davomida rivojlanib kelgan milliy maʼnaviyatimiz asoslari oʻz ifodasini topganligi boisidan barchamiz uchun qadrlidir.

R.Habibullayev,

"Hoji Eshon bobo” jomeʼ masjidi imom-xatibi, Qipchoq qishlogʻi.