Texnologik audit — sifatli xizmat kafolati

Aholini toza ichimlik suvi bilan taʼminlash, suv resurslaridan oqilona foydalanish hamda kommunal infratuzilmani modernizatsiya qilish masalasiga davlatimiz va hukumatimiz tomonidan doimiy eʼtibor qaratib kelinmoqda. Ayniqsa, iqlim oʻzgarishi va suv tanqisligi sharoitida mazkur yoʻnalishda tizimli va ilmiy asoslangan chora-tadbirlarni amalga oshirish muhim ahamiyat kasb etmoqda.

Oʻzbekiston Respublikasi Prezidentining 2025-yil 14-apreldagi “Qurilish va uy-joy kommunal xoʻjaligi sohasida davlat nazoratini samarali tashkil etish chora-tadbirlari toʻgʻrisida”gi 66-sonli farmoni soha xodimlari oldiga yangi va dolzarb vazifalarni qoʻydi. Farmonga muvofiq, 2025-yil 1-iyuldan boshlab barcha ichimlik suv taʼminoti va oqova suvlarni chiqarib yuborish tizimi obʼektlarini texnologik auditdan oʻtkazish tartibi belgilab berildi.

Mazkur auditning asosiy maqsadi — tizimdagi mavjud muammolarni oʻz vaqtida aniqlash, maʼnan va jismonan eskirgan uskunalarni yangilash, energiya resurslarini tejash hamda aholiga koʻrsatilayotgan xizmatlar sifatini oshirishdan iborat. Bu orqali kommunal xizmatlar samaradorligini oshirish va ichimlik suvi taʼminotining uzluksizligiga erishish koʻzda tutilgan.

Farmon ijrosini taʼminlash maqsadida Qoraqalpogʻiston Respublikasi hududiy qurilish va uy-joy kommunal xoʻjaligi sohasida nazorat inspektsiyasi hamda “Qoraqalpoq suv taʼminoti” aktsiyadorlik jamiyati mutaxassislari hamkorligida texnologik audit oʻtkazish boʻyicha maxsus reja-grafik ishlab chiqilgan boʻlib, tasdiqlangan reja-jadval asosida hududlardagi ichimlik suvi va oqova suv tizimi obʼektlarida keng qamrovli oʻrganish ishlari olib borilmoqda.

Amudaryo tumani Oq oltin ovuli hududida joylashgan suvni chuchuklantiruvchi stantsiyada ham texnologik audit oʻtkazildi. Oʻrganish jarayonida inshootning texnik holati, ishlab chiqarish quvvati va xavfsizlik talablariga rioya etilishi batafsil tahlil qilindi.

Mazkur stantsiyada har biri 500 kub metr hajmga ega boʻlgan 2 ta rezervuar mavjud boʻlib, umumiy 1000 kub metr suvni tindirish, saqlash va chuchuklashtirish quvvatiga ega. Shuningdek, 4 ta yer osti qudugʻi orqali suv olish yoʻlga qoʻyilgan. Oʻrganishlar natijasida barcha suv inshootlari ishchi holatda ekanligi aniqlandi.

Ushbu inshootlar orqali Amudaryo tumanining Oq oltin ovuli hamda Jumurtov shaharchasida yashovchi jami 2414 nafar aholi toza ichimlik suvi bilan taʼminlanmoqda. Bu esa aholining sanitariya-gigiyena sharoitlarini yaxshilash, sogʻlom turmush tarzini taʼminlash va kasalliklarning oldini olishda muhim omil hisoblanadi.

Mutaxassislar taʼkidlashicha, texnologik audit tizimli ravishda amalga oshirilsa, suv taʼminoti sohasidagi kamchiliklar bartaraf etilib, xizmat sifati yanada oshadi. Eng muhimi, energiya tejamkor va zamonaviy texnologiyalarni joriy etish orqali kommunal infratuzilmaning barqarorligi taʼminlanadi.

Orolboʻyi sharoitida toza ichimlik suvi — bu nafaqat kommunal xizmat, balki aholi salomatligi va farovonligining muhim kafolatidir. Shu bois mazkur sohada olib borilayotgan islohotlar hudud ijtimoiy-iqtisodiy rivojida muhim oʻrin tutadi.