Jayxun ilhomlari
Armon
(Ona Vataniga qaytolmagan, 18-19 yoshida shahid ketgan baynalmilalchi quroldoshlarim armoni)
Oʻz yurtimga kelolmadim men,
Orzularim qucholmadim men.
Onajonim, mehringiz tuyib,
Qonib-qonib icholmadim men.
Yurgan joyim togʻ-u tosh boʻldi,
Koʻrganlarim gʻam-hasrat boʻldi.
“Oʻzga yurtda qon kechdim nechun–?”
Degan savol nadomat boʻldi.
Yashamoqqa haqqim bor edi,
Oʻylarimda goʻzal yor edi.
Onajonim, sizga munosib,
Kelin olmoq ahdim bor edi.
Qattol urush oldi jonimni,
Hijron yoqdi xonumonimni.
Oʻn toʻqqizga kirmay toʻkildim,
Koʻrmay soʻldim Onajonimni!
Sovet qurgan zanjir – tuzoqqa
Tushdim, tutdim oʻzni soʻroqqa.
Qaytib keldim temur tobutda,
Kindik qonim tomgan tuproqqa!
Onajonim, ey aziz Yurtdosh,
Bugun Vatan qanday serquyosh.
Shu quyosh va tuproq ostida,
Men yotibman tan beruh, bir losh.
Men Vatanga xizmat qilmadim,
Erta ketdim, davron surmadim.
Rozi boʻling, mendan Vatandosh,
Afsus, mendan bir iz qolmadi.
Mamatsoliy ABDULLAYeV,
tuman Faxriy askarlar uyushmasi ijtimoiy himoya markazi raisi.
PAXTAKOR QIZLARGA
Chanoqlarda ochilgan rosa,
Oppoq-oppoq loʻppi paxtalar.
Dalalarda qizlar qoʻshigʻi,
Xirmonlarday koʻkka yuksalar.
Bir-biridan qolishmas aslo,
Etak tutgan terimchi qizlar.
Rizqin bergan Alloh taolo,
Yigʻib olar Oybarchin qizlar.
Sanam qizlar, goʻzal opalar,
Baland boʻlsin oppoq xirmonlar.
Oʻzbekiston nomini olib,
Dunyo kezib ketsin karvonlar!
Zuhra AHMEDOVA.
Meni eslarsan
Balki meni eslarsan bir kun,
Koʻzda qatra sogʻinch yosh bilan.
Balki meni eslarsan bir kun,
Xiyonatdan egik bosh bilan.
Balki meni eslarsan bir kun,
Yurakda dard, koʻzda gʻam bilan.
Pushmonlarning oʻtida u kun,
Vujudingda yoʻq bardosh bilan.
Balki meni eslarsan bir kun,
Oʻgʻil-qizim yuziga qarab.
Esga olib mevasi durkun,
Bogʻlarimdan ohista izlab...
Shohsanam OʻROZALIYeVA,
Namuna MFY.
HAYoT OFTOBI
Ona tilim – oʻzbek tilim,
Sen-la yayrar bahri dilim.
Millatimiz yuzi, faxri,
Sevar seni ona xalqim.
Falakda gar hilol boʻlsa,
Yerda oʻzing yagona.
Biz uchun suyuklisan,
Ona tilim, dunyoda.
Yorugʻ etar yoʻlimizni,
Misli hayot oftobi.
Dunyolarga tanilgan,
Oʻzbek tilim kitobi.
Ajdodlarim qoni singgan,
Tilimiz-la suyukmiz.
Navoiyni ulugʻlagan,
Shu til bilan buyukmiz.
Nodira QOZOQOVA, Amudaryo agrobiznes kasb-hunar kolleji oʻquvchisi.
DILDA EHTIROS
Yam-yashil yashargan dunyoning yuzi,
Amu suvlarida tuygʻular oqar.
Vatanning oftobi qizartib yuzni,
Yurtim, chiroyingga mahliyo boqar.
Shoirona tanholikni istadi koʻngil,
Falakdan yulduzlar oqar yoʻlimga.
Ajib bir sukunat, borliq esa jim,
Qalamim tutqazar kimdir qoʻlimga.
Mustaqil yurtimda koʻngildir mulkim,
Tizilib keladi soʻzlar quyuni.
Tubsiz osmon, poyonsiz moviy olam,
Ochib berar goʻyo nazm yoʻlini.
Oshno qilar tabiatning bor sehri,
Kimgadir zor, tashna qalbda tuygʻular.
Oʻlkam kechasining bormikan mehri,
Yoniq yuragimni oʻziga chorlar.
Tashlagan qalamim bugun qoʻlimda,
Orom olmoqdaman, dilda ehtiros.
Oppoq nurlar toʻshalibdi yoʻlimga,
Shoirligim doʻstlar, ekanmikan rost?
Xolimbat XUDOYoROV,
Jumurtov shaharchasi.
Ona tilim
Ona tilim mening, qalbim sururi,
Dilimda joʻsh urgan shirin kalomim.
Xalqimning tengsiz baxt hamda gʻururi,
Oʻzing iftixorim, oʻzingsan orim!
Millat koʻzgusisan, millatning ruhi,
Yigirma asrlik tarixga ega.
Sen bilan barhayot moziy shukuhi,
Ona tilim, seni asramay nega?
Asrayman sendagi buyuk oʻtmishni,
Asrayman, zar misol har bir soʻzingni.
Sharaflab, qadringni tutaman baland,
Aziz va tabarruk bilib oʻzingni.
Ona tilim mening, yasha barhayot,
Zavol koʻrma aslo, oftobdek porla.
Senda hikmatlar bor, koʻp senda bayot,
Qalblarni ezgulik yoʻliga chorla!
Iroda YeRDOShEVA,
38-sonli maktabning
11-sinf oʻquvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
