Ochiqlik va oshkoralik yoʻlida

Bugungi kunda tumanimizda 3 ta ommaviy axborot vositalari – tuman hokimligi va xalq deputatlari tuman kengashi muassisligidagi "Taraqqiyot koʻzgusi” gazetasi, tuman hokimligi muassisligidagi Amudaryo televideniyesi va www.amunews.uz veb-sayti faoliyat koʻrsatmoqda. "Ommaviy axborot vositalari toʻgʻrisida”gi Oʻzbekiston Respublikasi Qonuniga koʻra ushbu ommaviy axborot vositalari oʻz muassislari boʻlgan davlat hokimiyati va boshqaruvi organlarining rasmiy xabarlari va materiallarini, shuningdek normativ-huquqiy hujjatlarini eʼlon qilib kelmoqda. Oʻz navbatida muassislar – tuman hokimligi va xalq deputatlari tuman Kengashi ham yuqoridagi qonunga muvofiq ushbu ommaviy axborot vositalarining chiqarilishini taʼminlab, tahririyatlarning rivojlanishiga imkoniyat yaratib kelmoqda. Natijada, "Taraqqiyot koʻzgusi” gazetasi 2012-yilgacha har oyda 2-marta chop etib kelinayotgan boʻlsa, 2013-yildan boshlab oyiga 3-marta chiqmoqda. 2014 yildan boshlab esa gazetamiz oyiga 4-marta chop etilishi rejalashtirilmoqda. Amudaryo televideniyesi tashkil qilinganidan beri oʻtgan 3-yildan koʻproq vaqt ichida 500 dan ortiq teleefir materiallari tayyorlanib, tumanimizning ijtimoiy-iqtisodiy, maʼnaviy va maʼrifiy sohalarini oʻzida aks ettiruvchi yuzlab maxsus koʻrsatuvlar va informatsion lavhalar efirga uzatildi. 2012-yil 12-sentyabrda tuman hokimining "Amudaryo tumani hokimligi muassisligidagi www.amunews.uz veb-sayti faoliyatini qoʻllab-quvvatlash va rivojlantirish chora-tadbirlari toʻgʻrisida”gi 504-sonli qarori qabul qilinib, veb-sayt faoliyatini rivojlantirish boʻyicha maxsus dastur tasdiqlandi va u har kuni yangilab borilmoqda.