INTILUVChAN VA IZLANUVChAN MURABBIY
Sport – insonni nafaqat jismoniy, balki aqliy yetuklikka eltuvchi oʻta muhim tarbiya omilidir. Shuning uchun ham mustaqillik yillarida bolalar sportini rivojlantirish mamlakatimizda ustuvor vazifaga aylandi. Ayniqsa, umumtaʼlim maktablari oʻquvchilari oʻrtasida boʻlib oʻtayotgan turli sport musobaqalarida tumanimiz, Qoraqalpogʻiston Respublikasi sharafini himoya qilishga qodir, iqtidorli sportchilar yetishib chiqmoqda.
– Jismoniy tarbiya fani oʻqituvchisi doimiy izlanishda boʻlmasa, oʻz fani boʻyicha hech qanday ijobiy natijaga erisha olmaydi, – deydi 41-sonli umumtaʼlim maktabi jismoniy tarbiya fani oʻqituvchisi Manas Nurjonov. – Ayrim oʻqituvchilar bolalarni maktab sport zaliga yoki ochiq stadionga olib chiqishadi-da: “mana toʻp, mana futbol maydoni, oʻynayveringlar”, deyishadi. Oʻzi esa tomoshabin boʻlib oʻtirib oladi. Bolalar oʻz bilganlaricha toʻp “surishadi”, biri yutib, biri yutqazgan jamoa bormi, bor. Ana xolos, deyman, shu ham darsmi? Bola bir soatlik jismoniy tarbiya darsidan haqiqiy chiniqish sabogʻini olsin. Futbol, basketbol, qoʻyingki, sport oʻyinlari bilan shugʻullanishning metin qoidasini oʻrgansin. Maydonda shunchaki emas, maktab, mahalla, tuman va ona yurt shaʼnini himoya qilishga shay tursin...
Manas Nurjonov taʼlim sifati va oʻqituvchilarning malakasini oshirish boʻyicha tuman miqyosida seminar-treninglar oʻtkazishda, jismoniy tarbiya fani oʻqituvchilarining malakalarini oshirish boʻyicha oʻz innovatsion loyihalari, takliflari bilan ham faol ishtirok etib kelmoqda.
Oʻzi ishlaydigan maktabda esa sinfdan tashqari tadbirlarning yangi shakllarini oʻtkazish boʻyicha sinf rahbarlarining bilim va koʻnikmalarini rivojlantirish maqsadida seminarlar tashkil etayotgani bois, maktab oʻqituvchilar jamoasining qiziqish va eʼtiroflariga sazovor boʻlmoqda. Ayniqsa, Manas Nurjonovning oʻquvchi shaxsini shakllantirishga yoʻnaltirilgan uslubiy dars ishlanmalari, oʻquvchilarning bilim va koʻnikmalarini mustahkamlovchi didaktik materiallardan foydalanish boʻyicha tavsiyalari maktab oʻqituvchilariga qoʻl kelmoqda.
Manas Nurjonovning intiluvchanligi, oʻquvchilar bilan ishlashdagi pedagogik ish uslubi oʻz samarasini berib, maktab oʻquvchilari 2014-2015 oʻquv yilida sportning qoʻl toʻpi turi boʻyicha Respublika bosqichida, 2015-2016 hamda 2016-2017 oʻquv yillarida tuman va Respublika bosqichlarida gʻolib jamoalar safidan joy oldilar. 2017-2018 oʻquv yilida esa qoʻl toʻpi sporti jamoasi “Umid nihollari” sport musobaqasining Qoraqalpogʻiston Respublikasi bosqichida faxrli 2-oʻrinni egalladilar.
Izlanuvchan va intiluvchan Manas Nurjonovga oʻz sohasida yangi-yangi yutuqlarga erishishida muvaffaqiyat tilaymiz.
Robiya YOʻLDOShEVA.
Suratda: M.Nurjonov.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
